chol 'Iv
Qo' jIH HIjang
yIQamchoH 'ej yIngu'egh
taHjaj wo'
bImatlhba' qarqu'mo' bIcholmeH poHlIj
qaSpu' ramjep
QongDaq yIghoS *veranchISqo*
qatlho'bej Qu'wIjvo' choSonmo'
'ej roplaw' tIqwIj
bI'avtaHvIS jot'a'
vIHbe' je ghew
vaj maj
*Horey'So* quv *marSe'luS* je Daghomchugh
jI'avtaHvIS qochma' chaH
vaj tImoDmoH
SuH chaH vIQoylaw'
'eH yIQam
chol 'Iv
qo'vam juppu'
Qo'noS pIn'a' lobwI' je
tlhIHvaD Qapla'
Qapla' SuvwI' yuDHa'
DuSonta' 'Iv
Qu'vaD mucho' *bernarDo*
toH yIja' SaH'a' *Horey'So*
SaHlaw' 'ay'Daj neH
nuqneH *Horey'So* QaQ
nuqneH *marSe'luS*
qaStaHvIS ramvam narghqa''a' HoSDo'Hey
paghna' vIleghpu'
"Sunaj neH" ja' *Horey'So*
ghaH jon qechvetlh 'e' botqu' je ghaH qa'Hey Dojqu''e' cha'logh wIleghpu'bogh Harbe'taHvIS
naDev vaj ramvam tupmey bejlI'meH vItlhejmoHpu'
vaj cholqa'chugh HoSDo'Hey mInDu'maj 'ollaH ghaH 'ej qa'vaD jatlhlaH
narghbe'ba' bIH
toH loQ yIba'
'elbe'meH lutmaj teS Surchem DarIHlaw'
vaj bIH DIHIvqa'meH wanI' wIleghbogh qaStaHvIS cha' ramjep wIja'
'ej maHvaD ghu'vam ja'chu'jaj *bernarDo*
qaStaHvIS wa'Hu' ram lengDI' QuvHov poS yuQvetlh 'ej DaH SepDaq wovmoHbogh bochmeH ghoSpu'DI' lengwI' naDev ma'avtaHvIS *marSe'luS* jIH je ghumDI' rep wa'
bIjatlh 'e' mev
DaH cholqa' bIH
Heghpu'bogh ta'ma' rapmeH chenta' bIH
HaDwI' SoH
bIHvaD vay' yIjatlh *Horey'So*
ta' rurqu' bIH qar'a'
yIqIm *Horey'So*
rurqu'bej bIH
mumerqu' 'ej mubItmoH
bIHvaD jatlh vay' DaH neHlaw'
'eH *Horey'So*
bIHvaD yIjatlh
ram repvam porghvetlh vIDqu' 'IH'e' je ben yItmeH lo'bogh Qo'noS ta' webHa' wInolpu'bogh boDoQta' HattaHvIS
vaj nuq tlhIH jay'
ghuy'cha' Sara' pejatlh
bIH mawlu'law'
Haw'meH moDchoH bIH
Sara' pejatlh
DaH Haw'ta' 'ej jangQo'
nuqneH *Horey'So*
DaH bIchIS
wa'Hu' manaj neH DaH 'e' DaHar'a'
toH vuDlIj nuq
vI'Iprup jay' wanI'vam vIHarQo' 'olbe'chugh tu'chu'bogh 'ej vItbogh mInwIj
ta'ma' lurur qar'a'
bIrur'egh je
*DuraS* pIn tlhIvqu' Hay'taHvIS je ghaH yoDSutvetlh'e' tuQ
qejmeH qabvetlh 'ang ghaH chuchDaq yoDDuj *qInSaya* qIpDI' je QeHtaHvIS ja'chuq
qaStaHvIS ramjepna' tup qar DaH wejlogh vID 'ej nujuSpu' ghaH ma'avtaHvIS
qechwIj vIvangnISbogh vIwIvlaHbe'
'ach nom jIwuqnISchugh jIqelchu'pa' vaj wo'vaD qaS Qugh taQ 'e' pIHmoHlaw'
toH DaH peba' 'ej ja'choHjaj SovwI' qatlh wo' rewbe'pu' negh je vumnISmoH yepbogh 'ej SaHnISqu'moHbogh ram Qu'vam qaSDI' ram Hoch
'ej qaStaHvIS pem Hoch qatlh chenmeH may'morgh baS lutetmoHlu'
qatlh veS mIqta'mey je'meH novvaD mechlu'
'ej qatlh Duj chenmoHwI' lumuvmoHlu'
pavqu'mo' Qu'chaj chaHvaD Hatlaw' len
DaH vummeH pemvaD jIjnIS je ramjep moDmo' Doy'wI'pu'
Hochvam vangnISlu' qaSbeHmo' nuq
'oH QIjlaH 'Iv
SuH jIH
toH joS lutlhuplu'bogh vIja'laH jIH
wanI' DaSov DaH maHvaD narghlaw'pu'bogh ben ta'ma' Hay'meH qaDta' *DuraS* pIn *vortIbraS* ghaH tungHa'mo' qeHbogh DujDaj
'ej Hay'DI' *vortIbraS*vetlh tlhIvqu' HoH ta' *Hamlet* yoHqu'
yoHqu' ghaH 'e' noH mIchvam ngan Hoch
vaj ra'mo' may' mab'e' lu'olchu'pu'bogh chutmey batlh lurDech je yInDaj ghajHa'DI' SepmeyDaj Hoch'e' nIteb ben charghbogh ghaH ghajHa'nIS je 'ej SuqnIS may' QapwI''e'
mabchajvaD rapbogh Sep yoSmey SuDruppu' je ta'ma'
'ej SuqmeH *vortIbraS*vaD yaHnIS bIH chaq lujchugh ta'
vaj ra'mo' may'chaj mab 'ej poQmo' ghItlhvetlh chut lulajpu'bogh *Hamlet*vaD yaHnIS SepDaj'e'
toH qaH *vortIbraS* Qup'e' tujmoHmo' 'ej tebmo' lagh toDuj'e' wej qeqmoHchu'bogh poH yoSvamDaq yoSvetlhDaq je Sepchaj veHDaq chutmey pabbe'taHbogh vIDwI' tlhoQ'e' nom boSta'
Soj jajHuch je SuqmeH chaH HuH Qu'vaD HuHchaj qu'moHta' QupwI'
'ej Qu'chaj ra'bogh ghovchu' wo'maj qum raDmo' rojmabDaj HoSmo' je mangghomDaj Sep'e' ghajHa'bogh vavDaj Suqqa' neHba'
'ej qeqmeymaj meq potlh ram Qu'maj mung je wo'majDaq moDbogh mISHey Hal je 'oHlaw' wanI'vam'e'
toH 'oHba'
'a ghaytan taQbe' wanI' ma'avtaHvIS nucholDI' San HoSDo'Hey nuH qengtaHvIS
ta' rur 'ej ben DaHjaj je veS qeqvam meq ghaH ta'vetlh'e' qar'a'
lam 'ay'Hom neH bIH
'a yab mIn lunuQlaH
tIQtaHvIS chepbogh romuluS wo' quvDaq poS molmey Hoch loQ pumpa' *yulyuS* Dunqu'
'ej chImchu'
romuluS vengHeDaq jawchoH 'ej jach lom'e' wej luqatHa'lu'bogh
lIy tlha' chal qulmey tIqqu' SISbogh 'Iw je
pemHovDaq qIj maQmIgh
'ej Hov QIbmo' ropmo' bIQ'a'mey wuvmoHbogh maS'e' jaj Qav'e' maqlaw' 'oH
ben mIchmajvaD wo'maj nganpu'vaD je wanI'mey qu' nungwI'mey rap San QeH pIHmoHtaHwI' je wa'leS lotna' lIHwI' je 'angpu' je jIjchuqbogh chal ngeHbej je
'a SuH
DaH cholqa'
yIt 'e' vInISrup tugh muSangchugh je
loS Dolqoq
QIch ghoghlaH joq vay' Daghajchugh HIjatlh
bIjotmeH SoH 'ej naD vISuqmeH jIH Qu' vay' vIchav DaH 'e' DapoQqangchugh HIjatlh
wo'maj nem Qugh DaSovchugh vaj SoHvo' leSSov wISuqDI' Do' wIbotlaHchugh HIjatlh
pagh yavmaj chorDaq mIp DanIHta'bogh DaboSta'DI' DaSo'chugh HattaHvIS
'ej pIj wanI'vetlhmo' SuyItnIS qa'pu' SuHeghpu'DI'
vaj HeS yIja'
*marSe'luS* yIt ghaH 'e' yImev
SuH vIqIp'a'
betleHwIj vIlo''a'
yevQo'chugh vaj yIqIp
loj rIntaH
nurna' SuvwI' ghaH
vaj wImawpu'bej yolqoq wInIDmo' muD rur rIQlaHbe'mo'
wIqIpDI' 'ej malujDI' ghaH wIvaq neH
jatlhrup ghaH jachDI' Qa'
'ej jachDI' 'oH DIvwI' Da yay'mo'
ghIjlaw' pIch jabbI'ID
ghogh jenqu' HoSqu' lo'DI' jajlo' Qa''e' povaD chuS'ughHey'e' reH vem pem qa'
'ej ghumDI' 'oH bIQ'a'Daq qulDaq joq chalDaq joq ghorvamDaq joq tu'lu'chugh je vaj tugh bIghHa'meychajDaq moDqu'nIS lengbogh 'ej Hopbogh qa'pu'
'e' vI'Ij
'ej DaH 'e' toblaw' Dolvetlh
ngab jachDI' jajlo' Qa'
'ej ngoDvam ja'lu' qaSbeHDI' QI'lop poH yo' qIj mangpu''e' DIquvmoHrupDI' jach po Ha'DIbaHvetlh qaStaHvIS rammey naQ
'ej jachtaHvIS ghorDaq lengQo' qa' Hoch net Har ngIlbe' chaH
pIvmoH ram muD
'ej tar lIngbe'choH tI
jonbe'nIS Sor HoSDo'
luj qa' SeHwI'pu' quvqu'mo' poHvetlh potlh 'ej Dunqu'mo'
vIQoypu' je 'ej loQ vIHar
'a SuH nIH HuDvetlh jen rambIQDaq yItlaw'taHvIS ngup Doq tuQ po
ma'avtaH 'e' wImev
SaqeS je *Hamlet* QupvaD Hoch wIleghbogh qaStaHvIS ram wItey'
vI'Iprupbej *Hamlet*vaD jatlhrup maHvaD tambogh qa'
ghaHvaD wISovmoH vangmoHmo' wo' Qu'maj 'ej 'utmoHmo' parHa'ghachmaj
wIruch Satlhob
'ej nuqDaq ghaH wItu' qaStaHvIS povam 'e' vISov
lut 'ay'Hom cha' ta'qach'a' qumpa'
*voltImaD* *qornelyuS* jawpu' toy'wI'pu' je]
Heghpu' loDnI'wI' vIparHa'bogh *Hamlet*
wej 'e' wIlIjmeH ghu rur De'vam Qupchu'
'ej 'It tIqDu'maj bIH DIDamoHmo' 'e' ra' lurDech
'IQwI' wa' Huy' lughajmeH tay'nIS 'ej gheghnIS wo'wIj ngan QuchDu'
'ach tIqwIj Suvmo' rIntaH noHbogh yabwIj ta' vIqelmeH jI'IQba' 'ej jIvalba' DotlhwIj vIqawmo' je
vaj ben be'nI'wI' DaHjaj ta'be'nalwI' je Qojbogh wo'vam ta'cho'qoch je
jIQuch 'e' jeylu'law'DI' HaghDI' wa' mIn 'ej nIjDI' wa' mIn latlh nolDaq jIloppu'DI' tlhoghDaq jISaQDI' Dotlh Quch Dotlh 'IQ je 'ay'mey rap vIlelDI'
ghu'vamvaD SuqeSpu' je valwI'pu' quv 'e' vIbotbe'
'ej ghu'vaD SughIbpu' SaraDbe'taHvIS
DaH ghu' boSovchu'bogh wIqelnISchoH
puj HoSmeywIj 'e' noHlaw' *vortIbraS*
pagh Heghpu'mo' loDnI'wI' vIparHa'bogh wo'Daq Dach Sun matlhwI'pu' je 'e' Harlaw'
'ej nIvchoH ghaH 'e' naj
ghaH DorDI' qechvam munuQbe'Qo' ghaH jIHvaD QumtaHvIS
loDnI'wI' yoHqu'vaD ben Sep Hoch'e' jeghpu'bogh vavDaj chaw'taHvIS chut Hoch
vIjeghnIS 'e' Del Hoch muQumpu'bogh
wejpuH ta'meyvam chav
DaH qepvamDaq jIvangmeH jIH malja' wIbuSchoHjaj
chay' Hech be'nI'puqDaj DaH wej 'e' Sovlaw' *DuraS* pIn *vortIbraS* Qup SoSloDnI' reH ropmo' 'ej QongDaqDaq yIntaHmo'
ghaHvaD jIQum
Sepmaj 'ay' latlh Dan nuvvetlh 'e' nISnIS ghaH
Sep latlhDaq muvmoH nuv net tuchnIS SepDaj yoSmeyvo' ngaqwI'pu' ghuvpu' je negh je muvmoHpu'mo'
'eH *voltImaD* *qornelyuS* je pIn qanvaD vanvam boqengmeH DaH SangeH
woQ'e' lIchaw'nISbogh malja'vam neH Sanob
SumoDmo' 'e' yI'ang
qor vol mamoDmeH 'ej latlh Hoch wIchavmeH ta' SoHvaD mamatlh chIch 'e' wI'angrupbej
'e' vIHonQo'
SIbI' pemej
toH SuH
*layerteS* SoHvo' chu' De' nuq
chotlhobqang 'e' choja'
'ut nuq *layerteS*
Qo'noS pIn'a'vaD Qu'lIj vay' DatlhobDI' jochbe'chugh Qu' vaj temlaHbe' pIn'a'
toH nuq DapoQqangchugh *layerteS*oy vaj vIta'Qo' DapoQDI'
pagh qar'a'
wa' porgh lujeSchu'lI' qar'a' tIq yab je
'ej nujvaD toy'chu'lI' qar'a' ghop po'
vaj Qo'noS ta'vaD toy'chu' je vavlI' wo' qum wIjeStaHvIS
yIja' *layerteS* DaH nuq Daghajqang
HajmoHbogh joHwI' romuluSDaq jIchegh tugh 'e' yIchaw'neS
SoHvaD jImatlh bIche'choHDI' 'e' 'angmeH Hu' pa'vo' Qo'noSDaq jIghoSqangpu'
'ach romuluS luqImqa' yabwIj tIq je rInpu'DI' Qu'wIj SoHvaD 'e' vIchID
'ej chaw'lIjvaD yab tIqwIj je vIqoy'moH
'ej vavDaj chaw' ghaj'a' ghaH
'eH *polonyuS*
QIt jIHvo' chaw'wIj ghajchoHta' joHwI' mutlhobqu'lI'mo' ghaH 'ej nIDqu'mo'
vaj rInDI' ghu'vam mejmeH chaw' vInob 'e' chav 'ej naw'ta' QatlhtaHvIS je Qu'
vaj joH qatlhobqu'
mej ghaH 'e' yIchaw' je
toH poHlIj Qup yItIv *layerteS*oy
poHlIj yISeHtaH SoH
'ej poH Dalo'meH wIvlIj DaneHDI' Qochjaj pagh
DaH *Hamlet*
qorDu''a'ghotwI' quvqu' puqloDwI' je
qorDu'Hom 'oH
'ej puqvaD qorlu'law'
qatlh qaStaHvIS poH'a' Sut qIj Dachoq
quploD ghaHbe'law' puqloD'e'
vaj pagh vIcho'laHlaw' joHwI'
luSpetHey Sut yIwoDta' *Hamlet* QaQ
'ej Qo'noSta'vaD jup mInDu' tI'ang
lamDaq vavlI' quv lom yInejtaHQo' reH yav DabejtaHvIS
reH motlhqu' ghu' reH 'e' DaSovbej
HeghnIS yInbogh Hoch
'u'Daq ghomHa'nIS Hoch 'ej 'u'vo' yaH
HIja' joH
toH motlh 'oH 'e' Dalajchugh vaj qatlh DabuSlaw'taH
qatlh reH bI'Itlaw'
Qo' joH
jI'Itbej jIH
"'Itlaw'"'e' vISovQo'
muDelchu'be' wovHa'bogh wepwIj neH SoS QaQ
muDelchu'be' 'ItmeH lurDech Sut qIj tlhuH joq vIraDnISbogh vItlhovchoHDI' mInwIjDaq lIngtaHbogh bIQtIqHey joq
jI'IQmeH chen qoj nargh qoj 'ang'egh DotlhwIj 'ach jIH muDelchu'be'
'Itlaw' Hochvam chIch reHmeH Hochvam DalaHmo' ghot vay'
'ach vay' vIngaS 'ej 'Itlaw'wI'mey jey 'oH
'ej 'oH lu'ang 'ej Dor neH DotlhHey Sey joH
qa'lI' vInaDnIS 'ej "bImatlh" vIjatlhnIS vavlI'vaD 'ItmeH Qu' Davangmo' *Hamlet*
'ach ben vavlI'vaD lojpu' vavDaj'e' 'ej lojbogh vavDajvaD loj vav
vaj 'ItmeH Qu''e' ra'bogh puq lurDech lutoy'nIS yInmey rInpa' poH nI'be'
'ach multaHbogh Dotlh 'IQqu' qaplu'chugh vaj multaHmo' quvHa'qanglu'law' neH
qoHvam DaQo' SuvwI'
lalDanvaD tlhIvqu' 'e' 'ang
boH yabvetlh
Hub'eghbe'law' tIqvetlh
QIp Sovvetlh 'ej DuSaQDaq SaHlaw'Qo'
qaSnISbej ghu' wISovbogh
motlhqu'mo' vay' qetlh'e' neH lutu'bogh nochmaj rur
vaj qatlh maDoghtaHvIS wIqeHtaHmo' wISaHnIS maH
lalDanvaD HeS 'oH
Heghpu'wI'pu'vaD HeS 'oH
'u'vaD HeS 'oH
meqlaHvaD taQ 'oH
"HeghnIS vavpu'ra'" reH maq meqlaH
'ej Heghpu'DI' lom wa'DIch HeghDI' je wa'Hu' lom reH jach meqlaH "qaSnISbej"
Dotlhvam 'IQ lI'be' yIwoD qatlhob
'ej SoHvaD vav jIH 'e' yIHarchoH
'eH qImjaj qo'
ta'cho'vaD wa'DIch SoH
puqvaD muSHa'ghach quvqu' 'angqang vav
SoHvaD muSHa'ghachvam vI'ang je jIH
toH vulqanDaq DuSaQ Da'elqangqa'law'
'ach neHtaHghachwIj Qochqu' nab Daja'bogh
qatlhob naDev yIratlhqangchoH
naDev Dubejjaj Quchbogh belqangmoHbogh mInwIj 'utlhghomwIj la' qorDu'ghotwI' puqwI'
lujbe'jaj Qu''e' neHqu'bogh SoSlI'
vulqanDaq yIghoSQo'
yIratlhneS *Hamlet*
SoSwI' jIloblaHtaHvIS SoH qalobrup
may 'ej muSHa'bej ghaH nujangpu'mo'
toH Qo'noSDaq bIratlhtaHvIS HIDa
reH 'e' vIchaw'
ta'be' yItlha'
QochQo'mo' *Hamlet* raDlu'be'taHvIS batlh DataHvIS ghaH jIHvaD HaghchoH tIqwIj
vIlopchu'meH DaHjaj HIq vay' vItlhutlhDI' jIQuchqu' 'engvaD 'e' luja' bach'a'
'ej tlhutlhtaH ta' 'e' Qoyqa'moHtaH chal 'ej chuSlaw' ralbogh 'engmey
va tetjaj porghwIj lamqu' lamqu' lamqu'
tugh ngoSjaj 'oH 'ej ram SISwI' neH mojjaj
pagh HoH'egh wej quvHa'choHbogh SuvwI' 'e' chaw'jaj neH chaw'Qo'bogh batlh tIgh'e'
va jIHvaD Doy'law' raghlaw' qetlh 'ej lI'be'law' qo' malja'mey Hoch
tI ghom neH ngejHa'be'lu'bogh 'oH
pa' boghpu'DI' tIghu DaH 'oH luDanchu' pujchu'bogh neH 'ej moHbogh Dochmey'e'
wejpuH qaS ghu'vam jay'
cha' jar neH lom ghaH
ghobe' jIlachbej "cha'" vIjatlhDI' je
povpu' ben ta'
DaHjaj ta' qellu'chugh vaj yIH neH ghaH 'ej qeylIS ghaH ben ta''e'
SoSwI''e' ben muSHa'qu'mo' SoS qabDaq vaQchoH chal SuS 'e' botmeH SuSmey ra' ghaH
ghaH wuv SoSwI'
qaStaHvIS ben
pa' SopDI' ghungqa'law'taH
'ach qaSpu'DI' wa' jar neH
pujchu'ghach "be'" 'oH ponglIj'e'
va qaSpa' jar neH Qoppa' waqvetlh'e' vavwI' lom tlha'meH tuQpu'bogh ta'be'nal bIQHalHey DataHvIS reH SaQtaHmo'
tugh tugh vaj
'ItmeH meqlaHbe'bogh targh poH nI' law' loSmeH ghaH poH nI' puS
tugh vavloDnI'wI' nay
vav rurchugh ghaH vaj bong ta' qeylIS Dun vIrurlaH je
rInpa' wa' jar va 'oy'choHmeH mInDu'Daj DoqchoHmoHpa' mInbIQDaj qutmey yuDqu'
QI'yaH qorDu'wem'a' QongDaqDaq moDDI' chaH
chaHvaD ngeDqu'
mIghqu' Dochaj
QaQbe'taH 'ej QaQchoHlaHbe'law' ghu'
'ach tIq yISIQ neH tamnISlI'mo' jatwIj
nuqneH joH quv
jIQuch bIcheplaw'mo'
toH jIlIj'eghchoHruplaw' je
jIHbej joH QaQ
'ej reH toy'wI'lI' jIHrup
jupna'wI' SoH qaH
pongvetlh matlh qamechqang
qatlh vulqanvo' bIghIQchoHlaw' *Horey'So*
*marSe'luS* SoH qar'a'
joH quv
jIQuch qaleghmo' je
nuqneH qaH yoH
'a SuH
yIja' qatlh vulqanvo' bIchegh
jIbuDqu'mo' jIHaDchoHQo' joH QaQ
va pumvetlh jatlhchugh je wa' gholna'lI' vaj vIHarQo'
'ej teSwIj yIngorQo' Dupumbogh mu'lIj'e' DavoqmoHmo'
Ha' qatlh *tlhIn*Daq SoH
bItlhutlhqu' 'e' pIghojmoHlaw' bItlheDpa'
joH vavlI' nol vIbejneSmeH jIcholpu'
DuSaQ tlhejwI'wI' HIvaqQo'
va SoSwI' tlhogh Dabejlaw'meH bIchol
toH quqlaw' taymeyvetlh joHwI'
yIqIm *Horey'So* bIrDI' nol chabmey tlhoghDaj vaSDaq jablu'
QI'tu'Daq jIHtaHvIS veqlargh vIleghchugh vaj ghu' vImaSbej
tlhoghDaj jaj vIlegh not 'e' vImaS *Horey'So*
va vavwI'
vavwI' vIleghlaw'
va yabwIj mInHeyDaq vIlegh *Horey'So*
wa'logh vIleghpu'
toH ta' QaQqu' ghaHlaw'
loDna' ghaH jay'
'ej laHDaj Hoch vIqelDI' vaj not ghaH rurbogh latlh vIleghqa'laH
joH wa'Hu' ram vIleghlaw'
'Iv legh'a'
bIyay' loQ 'e' yISeH 'ej qImjaj teSlIj
nutu'taHvIS cha' qaHvam DaH nom SoHvaD wanI'vam taQ vIja'
vI'Ijjaj jay'
SuH 'avmeH tay'taHvIS cha' qaHvam yoH *marSe'luS* qu' *bernarDo* je 'ej qaSDI' cha' ram ramjep rep chImqu' je luqIHlu'
'etchajDaq nargh vavlI' quv rurbogh vay''e'
porgh naQ yoDSutmey tuQmo' Suvruplaw' ghaH
'ej QIt chaH juS ghaH nurDaj leHtaHvIS 'ej 'IQqu' gho'meH mIwDaj
wejlogh juSta' bejtaHvIS mInchaj bItqu' merbogh ghaH
'ej chuqDaj juvlaH Sa'naQDaj
'ach qaSDI' yay' chaH
vaj pugh lumojlaw' tetlaw'mo'
vaj tam 'ej Qam 'ej ghaHvaD jatlhchoHQo'
jIHvaD ghu' naQ lutey' chaH HajtaHvIS
'ej qaStaHvIS ram wejDIch 'avDI' chaH vItlhej
'ej qaSbej ghu' luja'pu'bogh
pay' mu'meychaj lu'ollu' 'ej lutoblu'
Dochvetlh'e' Hu' luDelbogh rurtaHvIS nuchol narghwI'
'ej ghaH vavlI' rur law' ghopDu'wIj rurchuq puS
'a nuqDaq qaS
joHwI' 'avwI'Daq jenDaq
pa' ma'avtaH
'ej ghaHvaD Sujatlhbe''a'
joH jIjatlhpu'
'ach jangmeH pagh mujatlh
toH wa'logh chaq nach jenmoH
vIHchoHmo' ghaytan vaj jatlhrup
'ach qaSDI' jachqu'choH jajlo'ghogh Qa'
'ej chuSDI' Haw'meH moD ghaH
maHvo' ngab
jI'IpmeH yIn vISuDrupneS joH quv teHqu'
'ej ghu' pIja' 'e' poQ vajQu'maj mamatlhmo' 'e' wIHar
maj maj qaHpu'
'a jIHvaD nub wanI'vam
DaHjaj ramjep Su'avqa''a'
mar ber je HIja'
yoDSutmey tuQ qar'a'
mar ber je yoDSutmey joH
nachvo' qamDu'Daq
mar ber je naQ joH
vaj nach'e' boleghlaHbe'
mInyoDDaj teqpu'
qej'a' mInDu'Daj
nachDaj 'IQlaw' law' joH 'oH QeH puS
reH chISqu'
'ej tlhIHDaq mInDaj buSmoH'a'
chIch buSqu'
pa' jIHchugh neH
bISaHchugh vaj Dumerqu'
ghaytan ghaytan
nI''a' pa' ratlhmeH poHDaj
QIt wa'vatlh toghlaH vay' pa' ratlhtaHvIS
ber mar je nI'qu' nI'qu'
vIleghDI' nI'qu'be'
'ej chISchoH rolDaj qar'a'
yIntaHvIS rolDaj ghajbogh rurchu'
qIj 'oH 'ej 'oHDaq DanchoH ghItlhmey chIS
qaStaHvIS ram jI'av
chaq yItqa'
vavwI' quv qab mInDu' je ghajchugh ghaH vaj poSchoHchugh je ghe''or 'ej jItammeH mura'chugh je vaj ram ghaHvaD jIjatlh
Hochra' Satlhob
wanI'vam taQ bopeghchugh qaSpa' DaHjaj vaj wej 'oH lupeghHa'jaj ghoghmeyraj tam
tugh qaSchugh ghu' latlh vay' vaj vumjaj yabraj 'a vumbe'jaj jatraj
jupwI' boDataHmo' Savan
qaSpa' rep wa'maHcha' 'avwI'DaqDaq SaSuchbej
joH mamatlhtaH 'ej pIvan
HIparHa'taH SaparHa'mo' je
yoDSutmey tuQ vavwI' lomqa'
qay' vay'
Hu' qaS wemna' DaH 'e' vIpIHchoH
tugh SaHjaj ram
yIloSlI' SaHpa' tIqwIj
reH ghot mInDu'vaD narghnIS Haw'bogh HeS
bIH DItu'be'meH So'chugh je qIbHeS
lut 'ay'Hom wej *polonyuS* juH pa'
toH DujDaq tepwIj lanlu'
vaj Qapla'
be'nI'wI' chaw'DI' romuluS neHmaH 'ej boQDI' lengbogh Duj vaj yIbuDQo' 'ej De'meylIj HISovmoH
*Hamlet* bangvI'Hey ram DaqeltaHvIS ngongna' 'IwQuj je neH 'oH 'e' yIHar
DISbov Qup naH 'oH
'eqqu' 'a taHQo'
Doj 'a ratlhQo'
He' tup 'ej belmoH tup
'a tugh loj Hoch
loj'a' neH
'e' yIHar
puqHom mojHa'lu'DI' HoSchoH Somraw 'ej tInchoH porgh
'ach 'ItlhDI' Dotlhmaj Doj po'choH je yabmaj qa' je laH Hoch'e' So'taHbogh porgh
DaHjaj chaq DumuSHa'
'ej HechtaHvIS yuDHa' DaH 'e' Sorghbe'laH naDHa'ghach tojrupghach je
'ach yIyep patlh'a'Daj toy'nISmo' je toy'moHwI'vetlh vaj neHtaHghachDaj loblaHbe'bej ghaH
ghot ram Dabe'nISmo' nay' pe'laHbe' ghaH
pIvmeH 'ej taHmeH wo'maj wIvDaj wuvtaH wo' naQ
vaj wIvDaj vuSnIS wo'porgh vuD Qochbe'ghach je porgh nachHey Damo' ghaH
toH SoHvaD jatlhchugh je "bangna'wI' SoH" vaj mu'Daj tob chav'e' neH ta'laHbogh patlh DotlhDaj je wa' ghot
'ej 'e' DapIHchugh vaj yonnIS yablIj
'ej Do' mu'Daj tobmeH lulajnIS Qo'noS che'bogh ghoghmey law''e'
'ej bIquvHa'choHlaH bomchaj Da'Ijchugh bIvoqchu'taHvIS pagh ghaH toy'chugh tIqlIj pagh boHmo' poQtaHvIS SeH'eghtaHQo'vIS chIch ghaHvaD be'batlhlIj DapoSmoHchugh
DuHvam yIqelchu'
'ej yIyep *'ovelya*
yIyep be'nI'oy
'ej DuDevqangchugh muSHa'ghachDaj vaj 'o'DajDaq yIpol'egh
neHtaHghach pu' chuqvo' Qobvo' je DoH
'IHtaH be' yepqu' maSvaD neH 'e' 'angchugh vaj ngIlqu' be'vetlh
HIvrupchugh pumHa'ghach vaj junlaHbe' je batlh
tIghumey chu''e' pIj ngejtaH gharghmey narghpa' naHmeychaj
'ej SIStaHvIS Dotlh Qup rambIQ pobIQ je nom qaSnIS ngejbogh ropmey
vaj yIyep
Qaghbe'meH vanglu'Qo'DI' toD'eghlu'
lotlh'egh Dotlh Qup wej buQtaHvIS je ghu'
paQDI'norgh QaQ Damaqpu'bogh vIpolbej
'ej tIqwIj 'avjaj
'ach loDnI'wI' QaQ ghobyaS puS yIDaQo' QI'tu' He Qatlhqu' lu'ang He buD qaDbe' lughoStaHvIS
HemwI' SuDwI''a' je tlhIvwI' je Da chaH 'ej qeSchaj qImrupbe'
toH HIpIHQo'
'a SuH DaH chol vavwI'
cha'logh chonaDmo' cha'logh vaj jIDo'
cha'logh mavanchuqmo' vaj Quchbej ghu'
*layerteS* wej tlheD'a'
'eH tIj
jonta'lIj laQchoHlu' 'ej SoH nIloStaH
naD yISuq
'ej yabDaq qeSvam puS yIghItlhchu'
jatlIj lulo'Qo'jaj qechlIj
'ej ghu'lIj SujlaHlaw'chugh qechlIj vay' vaj qechvam yIvangQo' je
yIqejHa' 'a jup DawIvtaHvIS batlh yIQutQo' je
jup Hoch Daghajbogh tobchugh ghu'mey poH je vaj qa'lI'Daq DabaghmeH mIr tIlo'
'ach tachlIj SuchchoHbogh mIywI' vay''e' DatIvmoHmeH Qopbe'jaj vanbogh tochlIj
bISolnISbe'taHmeH yIyep
bISolDI' yISuvchu' SoHmo' yepchoHjaj ghollI'
teSDu'lIj lo'jaj Hoch
'a chIch ghot puSvaD vuDghogh yI'lo'
yIqImqu' noHDI' vay'
yojlIj DapeghtaHvIS
chIch waghjaj SutlIj yapchugh HuchjolIj 'ach taQQo'jaj bIH
qutlhbe'jaj bIH 'ach napjaj bIH loD'e' pIj Del Sut tuQbogh
'ej SutSarmey noHDI' po'qu'bej romuluS patlh ghot chuQun je
ngIpwI' nojwI' joq yIDaQo'
bInojDI' pIj tugh loj Doch Danojpu'bogh juplI' je bIngIptaHchugh vaj vu'meH bIpo'Ha'choH
potlhqu' wa' Qu''e'
SoHvaD yIyuDQo'
ram tlha'ba' pem qar'a'
vaj tlha' je ghu'vam ghot HochvaD bIyuDHa'nISmo' bIquvbej
'ej SoHvaD qeSwIj boQjaj naDwIj
jImejneS 'e' yIchaw'
DupoQlI' poHlIj
vaj Ha' toy'wI'pu'lI' tIvu' yIghoS
Qapla' *'ovelya*
qeSmeywIj qaja'bogh tIqawchu'taH
yabwIjDaq vIweghta'
'ej yabwIj poSmoHwI' DapoltaH SoH
Suja'chuqDI' nuq jatlhpu' ghaH *'ovelya*
joH *Hamlet* qelneSbogh vay''e' mujatlhpu'
'oH qawlu'chu'
nIteb pIj SoHvaD mobmeH poHDaj nobta' qaStaHvIS Hu'mey jIHvaD ja'lu'pu'
'ej mu'meyDaj DaqImmeH nI'pu' poHlIj 'ej ghaHvaD ghIbqu'pu'
toH teHchugh ghu'vam
'ej teH 'oH 'e' muHarmoHlu'DI' Hojlu'
vaj bIyajHa''eghlaw' qaja'nISba'
'ej batlhvaD Qu'Daj yajnISchu' puqbe'wI'
tlhIHvaD tlhetlh nuq
bangDaj jIH Hu' 'e' tobneSmeH joHwI' pIj SoQmey law' mujatlhpu'
"bangDaj SoH"
be'Hom Soy' DaDa
wej ghu'vam Qobqu'vaD bI'ongchoHlaw'
'ej bangqoq SoQmeyqoqDaj DaHar'a'
joH nuq vIHarnIS DaH 'e' vISovbe'
baQa' qaghojmoH
ghu SoH 'e' yIHar SoQvam Da'IjlI'mo' DuSorghtaHvIS
SoQmeyvaD qoghlIj'e' yISoQmoHchu'
'ej qogh DaSoQmoHbe'chugh
mu' vImawbej pe'vIl vIQoDlI'mo'
vaj pumDI' qoghlIj qoHna' jIH 'e' vIpumlu'
'a joH QaQ "bangwI' SoH" jatlhDI' nong 'ej quvqu' mIwDaj
Ha' mIymeH mIwDaj neH 'oH
'ej SoQDaj tobchu'meH 'ej ngaqneSmeH QI'tu' quv buSbogh 'Ip Hoch'e' mujatlh
HIja' qoHQa'mey jonmeH janmey bIH
pubtaHvIS 'Iwmaj tIqvaD ngeDqu' chav jatvaD 'Ip nojDI' tIqmaj 'e' vISovchu'
qulqoqvetlh wovtaH law' 'oH tujtaH puS
'ej qulqoqvetlh cha' Dotlhvam luchu'Ha'lu' lay'taHvIS je chu'wI'
bIH tojmoHmo'
vaj batlh qulna' 'oH qulqoq'e' puqbe' 'e' yIHarQo'
bIquvmeH leS ghaH'e' pIj yISuchQo'
'ej ja'chuqmeH neH bang Dutlhob "ghghgh" jatlhDI' 'e' yIHon
joH *Hamlet* ngoDmeyvam neH tIHar DaH Qupqu' ghaH
'ej yItmeH weghbogh tlheghDaj reH nI' law' tlheghqoqlIj chaw'lu'bogh nI' puS
nom jatlhmeH *'ovelya* 'IpDaj tIHarQo'
SuyDuy bIH
nur'e' lu'angbogh paHchaj lughajbe'
'ach yonmeH Qu' quvHa'qu' qoy'lI' neH
'ej tlhu'moHchu'meH chaH Human 'oSwI' Da SoQ'a'mey batlhqoq je lo'
pItlh jIjatlh joH *Hamlet*vaD QIch mu'mey joq DamechmeH wa' luplIj lenHom Dalo'Ha'
baQa' qaStaHvIS nemmey pe'vIl 'e' vIbotbej
qalob joHwI'
lut 'ay'Hom loS 'avwI'Daq
choptaHvIS jejlaw' muDvam Ho'Hey
HIvruplaw' muDvam vID 'ej chopDI' yoHbej
DaH qaS rep 'ar
wej qaS ramjep qar'a'
DaH jachpu' tlhaq
vaj yItmeH qa' tugh qaS poH motlh
nuq lopmeH baHlu' joH
DaHjaj QongQo' 'ej lop 'ej tlhutlhqu' ta'
chechqu' yupma'Daj
mu'qaD veSvaD SuvDI' yoHqu' SuvwI''a'qoq qochpu'Daj je
'ej romuluS HIq HIvje''a' tlhutlhDI' ghaH Hugh yayDaj Dun lumaq chuS'ugh QoQluch je
tIgh 'oH'a'
tIgh 'oH jay'
toH wo'vam Sung jIH
jIHvaD motlhtaH tIghvam jIyIntaHvIS
'ach vuDwIj tlhoblu'chugh vaj tIghvam'e' wIquvmoHqu' wIbIvDI'
'ej tIgh wIpabtaHvIS chIch maquvHa'
neHmaH qIbHeS je DopmeyDaq nupumtaH 'ej pIchmaj ja'choH wo'mey latlh 'e' qaSmoH nach 'uHqu' chenmoHbogh yupma'vam'e'
"chechwI'na' chaH" lujatlh
'ej targh DIrur pIj 'e' lumaqmo' lamchoH pongmaj QaQ
DInIDDI' jenqu' chavmeymaj DIta'bogh nunoymoHmeH Hombotlh DujQuQ je bIH
bIH jotlh je ghu'vetlh
toH pIj ghotvaD qaS je DotlhDaj Duy' naS lughaj chaH
chaq boghHa'pu'
chuntaHvIS mungDaj wIvlaHbe'mo' ghot
chaq HoSqu' Dujchaj vay' 'ej HoSqu'mo' meqlaHchaj nuH Surchem je pejchoH 'oH
pagh chaq belHa'qu'choHmoH DameH mIwchaj 'oH QopmoHmo' wa' tIgh lupabtaHbogh
wa' Duy'chaj DeghHom neH luqengtaH ghotvam Dotlhchaj lutoy'nISmo' pagh puQmo' Sanchaj
toH qeylIS Dunqu' DameH Dojchugh je batlhmeychaj Hoch 'ej batlhmey ghajbogh chaH leHruplaHbe'chugh je latlh vay' vaj rambej
ghotvam lunoHlu'DI' Sab batlhmeyvam SaHmo' neH Duy'chaj
webmeH batlh baSna' naDHa'ghachvaD butlh mIghqu'
'eH joH
nuQanjaj boQqangbogh 'ej Qumbogh qa'pu'
qa' QaQ SoH'a'
pIch ghe''ormang SoH'a'
QI'tu' naD Daqem'a'
chaq ghe''orvo' qulpummey Daqem'a'
bIHechtaHvIS bIboQqang'a'
pagh bImIgh'a'
ram Hoch
qayu'nISmeH bIchenpu'mo' qajatlh
qapongmeH *Hamlet* pong vIlo'rup
SIbI' yIjang
jIjIvmo' tugh jIQay'rup 'e' yIbot
yIja' neH
qatlh lomSut lughormoHlaw'pu' HomDu'lIj'e' Hu' weghbogh Hegh bIghHa' 'ej naDpu'bogh SonchIy
'ej qatlh DulelmeH poSlaw'pu' naghmey mollIj nujHey 'ughqu'
molDaq pIroQDI' bIvIHbe'chu'bej
chay' ghu' vIyaj
yoDSutlIj naQ DatuQ lomna' neH SoHtaHvIS 'ej maSwov DoS DaSuchqa' ram DaghIjmoHtaHvIS jay'
jotrupbogh 'u' qoH maHbogh tIq DaSujchu'
'ej qechmey'e' SIchQo'bogh qa'pu'ma' jubuSmoH
DaH nuq wIta'nIS
SuH naDevvo' DatlhejmeH ghopDaj vIHmoH
nIteb DuQumqanglaw'
Daq Hop DaghoSmeH DucholqangmoH DochHa'qu'taHvIS mIwDaj
'ach yItlhejQo'
Qo' joH
jIHvaD jatlhlaw'Qo'
vaj ghaH vItlha'
Qo' joH
QobDaj nuq vIHajnIS jay'
jIHvaD mavjop potlh law' yInwIj potlh puS
'ej qa'wI''e' not QIHlaHba' lomqa' jubmo' qa' Hoch
'a joH bIQ'a' DaghoS 'e' tlhu'moHneSchugh
pagh bIngDajvo' bIQ'a' botlh DungDaq HuSbogh 'ej ghIjqu'bogh qoj'a' DaghoSmoHchugh
pa' pumbeHlaw' 'ej chong qoj'a'vetlh jej
pa' chenqa'laH je qa'
'ej qu'mo' qabDaj chaq SoHvo' che'bogh yablIj laHmey nge'laH
bImaw'choHmeH DujotlhlaH
ghu' yIqel
yab HochDaq 'Itchu'meH Qujqechmey lanlaH Daqvetlh neH
'ItmeH DachtaHvIS meq latlh
qelI'qam law' bIQ'a'vetlh ral lubejmo' 'ej bIngDaq jachqu' 'oH reH 'e' luQoymo'
DacholchoH neH ghaH
Ha' yIghoS
pa' bIcholbe'
jIHvo' ghopDu' tIteq
pa' yIghoSQo'
jach SanwIj
'ej porghwIj 'aDHomDu' Hoch letmoHmo' DaH bIH rotlh law' veqlargh Somraw rotlh puS
qaH jIHvo' ghopDu' tIteq
baQa' lomqa'na' moj munISbogh ghot
vIjatlh peDoH
Ha' qa'
'Itqu'choH ghaH qech jochqu' buStaHmo'
mujbej Qu'maj ghaH wIlobchugh
SIbI' vItlha'
wanI'vammo' tlha' nuq
Hu'tegh DaH Qo'noS wo'Daq nonlaw' vay'
Do' ghu'Daj naQ che' San
SuH wItlha'
lut 'ay'Hom vagh 'avwI'Daq yoS latlh
nuqDaq choDev
tugh qaSqa' bIjmeH repwIj
'ej joy'bogh 'ej He'So'bogh qulmeyDaq jIjegh'eghnIS
va bIDo'Ha'ba' qa'
Qo' HIvupQo'
'a ngoD qaja'rupbogh tI'Ijchu' 'ej tIbuS
bortaS Data'rup je cho'Ijpu'DI'
vavlI' lomqa' jIH
qaStaHvIS ram jIyItnISmeH vIqIchlu' taHtaHvIS HupmeH bov
'ej qaSDI' po jIpaylI'meH bIjqulmeyDaq vIweghlu'
HeSmeywIj webqu' Hoch vIta'pu'bogh qaStaHvIS yInwIj jaj vISay'moHpa' 'ej bIH vIqIlpa'
toH bIghHa'wIj peghmey vIja' net chaw'chugh vaj lut Doj vIja'laH
'ej qa'lI' QommoHlaH lut mu'Hom neH
chaq ghoDajvo' bavHa'laHchugh yuQ vay' vaj mInlIj rurlaH 'oH lut mu' Da'IjDI'
chevchuqlaH bagh'eghbogh 'ej jeDbogh jIblIj
'ej Qammo' jIb tlheghDu'lIj Hoch bIyay'DI' to'baj pachDu' rur bIH pay' HajDI' 'oH
'ach 'Iw neH ghajbogh teSvaD bov SanbIjvam ja'be'nISlu'
baQa' yI'Ij
qaSDI' poH vay' vavlI' DavuvchoHchugh
vaj vavvetlh chotlu'mo' quvHa'lu'taHvIS qorDu'Daj wemlu'DI'
bortaS yIta'
quvHa'qu' chotDI'
reH quvHa' chotwI'
'ach chotDI' Hujqu' wemqu' 'ej quvHa'qu'
SIbI' HISovmoH
vaj yabqech bang choH joq vIDataHvIS jImoDqu'mo' bortaSvaD jIHIv
bISuvnISDI' chaq vulqan tI DaDachugh je bIbuDmo' vaj Qu' Davangrupbej
HI'IjchoH *Hamlet*
naHSormey ghomwIjDaq jIQongtaHvIS mu'aw'pu' ghargh net maq
'ej Qo'noS qoghHey lutojbejpu' webwI'pu' Hegh luja'DI' chIch ngebmoHmo'
SuvwI' quv ngoD yISov vavlI' mIv'e' DaH tuQ vav 'aw'pu'bogh Hu' gharghqoq'e'
tIqwIj leSSov vIghajlaw'
tlhogh wembogh 'ej qorDu'Daj ngaghbogh petaQ
DaH nga'chuq tuHnIStaHvIS chaH 'e' lajmeH quvlaw'qu'bogh be'nalwI' 'urmangDaj nobmey much 'ej 'ongchu' yabDaj
vaj Qapta' ghaH
Qu'vatlh bImIghbej yab
SumIghbej nobmey be' botojlaHchu'mo'
Sab be'nal Dotlh jay' *Hamlet*
jIHvo' pum
'ej reH nur leHtaHmo' muSHa'ghachwIj vaj tlhoghvaD 'Ip vIlay'bogh DorbeHbej 'oH
'a DaH petaQDaq pum
'ej SupwIj vay' QaQ law' petaQvam jo QaQ puSqu' jay'
batlh'e' not ponlaH ngaghbogh wem qar'a' ponmeH QI'tu'ngan rurmeH chenchugh je
toH vaj quv wovqu' muvchugh je wemDotlh vaj DalchoH batlh QongDaq 'e' Har 'ej tugh veQ Sopqang
jajlo' vIlarghlaw'
nom jIja'nIS
qaStaHvIS pov SorghomwIjDaq jIQong
reH tIghwIj 'oHtaH
pa' jIQongtaHvIS qaStaHvIS jIHubbe''eghmeH len rep mucholmeH pegh'egh vavloDnI'lI' 'ong
'ej *He'benon* tItaS HIvje'Hom qengDI' qoghDu'wIj 'ochDaq DIrroptaSvam chaghmoH
yoq 'IwvaD ghol luDamo' taSvam HoSmey tugh porgh lojmItmeyDaq porgh HemeyDaq je moDqu' bIH
moDDI' 'aj toQDuj lurur
jeDchoH 'ej SubchoH pIvtaHbogh 'Iw yIQ 'ej ghu SojtaS rur nonmo' wIbchoHDI'
tugh nom 'e' chav 'oH
jeDchoHpu' je 'IwwIj
'ej vaQbogh porghwIj Dech DIrnaghHey letqu'
'ej muroSHa'moH HIghbogh rop DIr mo'Hey web'e'
vaj jIHvo' be'nal yIn je ta'mIv je nge'pu' loDnI'wI' ghop 'ej quqpu' Hoch
murInmoHta' jIchun'eghchoHmoHpa'
mInDu'wIj bej 'ej lomDaq jach pagh vaj
yo' qIj vI'elrupbe'
loj paymeH 'ebwIj
'ej Duy'wIj Hoch vIqengtaHvIS tugh mughIpDIjchu'meH veqlargh mungeH
Ha' QI'yaH
vav Davuvrupchugh vaj ghu'vam yISIQQo'
qorDu'wIj wemmeH 'ej ngaghmeH neH taHqeq lI' ta' QongDaq Qo'noSDaq 'e' yIbot
'ach Qu' DanIDDI' SoSlI' DaQIHmeH SoH 'oghbe'jaj qa'lI'
'ej joch'eghQo'jaj yablIj
ghaH lubIjjaj veqlargh meqba''a' tIqDaj 'oy'moHbogh 'ej 'aw'taHbogh pach jejqu''e' je
naDev jIratlhlaHbe'
tugh qaSchoH po 'e' 'ang ghargh wov
'ej qulDaj tlhIb rIHHa' 'oH
QI'tu' mangghom
QI'yaH nuq latlh
ghe''or vIpongnIS'a' je
SuH SIQ SIQ SomrawwIj 'ej SIbI' peqanchoHQo'
jIQamlaHmeH HIboQ
lomqa' Do'Ha'qu' tamey leHlaHtaHvIS maw'rupbogh nachvam
HIja' yabwIj HablI'vo' ghItlhmey Dogh ram Hoch vIQaw'bej
paq paQDI'norgh Hoch
qech Hoch
ngoDmey Hoch'e' ben qonpu'bogh qoj tu'bogh yablaHwIj Qup
nIteb yab paqwIjDaq HablI'Daq je ratlh Qu' chora'pu'bogh
pa' lam quvHa' DuDbe'lu'bej
be' mIghqu'
Haghbogh webbogh taHqeq
nuqDaq ghItlhpaqwIj
ngoD vIqonnISba' HaghlaH 'ej HaghtaH je taHqeq quvHa'
Qo'noSDaq qaSlaH DaH 'e' tobbej ghu'
pItlh vavloDnI'
DaH SoQ vIqelnISqa'
nuq jatlhpu' ghaH
" vI'Ipchu' rIntaH
Hor mar joHwI'
joH *Hamlet*
Qanjaj qeylIS
toH vaj qaSjaj
Ha' joHwI'
Haghlaw' mang
joH DotlhlIj nuq
De' nuq Daghojpu'neS
merqu' De'
vaj 'oH ghoja'neS
De' DapeghHa'ba' SoH
jIjatlhpa' jatlhbej Hovmey
jatlhbej Hov joH
vuDraj nuq
'oH HarlaH'a' tIq vay'
'a De' bopegh qar'a'
Hor mar wIpeghbejneS
Qo'noSDaq yInbogh wa' taHqeq web law' Qo'noS latlh Hoch web puS
toH petaQ ghaH
De'vam nuja'meH 'utba' molvo' cheghbogh pagh qa' joHwI'
HIja' bIlugh
vaj lIHmeH wa' mu' latlh vIja'choHbe' je
mavanchuq 'ej matlheDchuq 'e' vIwuq
Qu' neHtaHghach je pabnIS Hoch qar'a' Sar Hoch wIqelchugh
vay' vIpabnISmo' je
vaj SuH Somraw vIqeqmeH DaH jIjaH
maw' neH 'ej taQqu' mu'meyvam joH quv
Dumawmo' bIH jIQoSqu' jup
mawbe'ba' joH
qarbe' *Horey'So*
'oljaj ghe''or Qang
chIch mawqu'lu'bejta'
HoSDo' vIqelDI'
yuDHa'bej qa'vetlh
De'vam'e' Saja'laH
'a nuq wIbuSpu' pa' maja'chuqtaHvIS
wej 'e' boSovqangchoHchugh vaj petung'egh
'ej tugh Do' Qap SutammeH Qu'
toH jup SuvwI' HaDwI' je jupna'wI' je tlhIHmo' jIHvaD wa' Qu'Hom neH yIta'
Qu' nuq
wanI'mey'e' DaHjaj boleghpu'bogh not bopeghHa'
Hor mar luq joH
pe'Ip je
Hu'tegh not vIpeghHa'bej joH
not vIpeghHa' je
'etlhwIjDaq 'e' yI'Ip
wI'Ipta' joH
'ach 'etlhwIjDaq pe'Ipqa'
baQa' nuqjatlh
Ha' lomoy
pa' SoH'a'
juppu' Ha'
SomDaq ghotvetlh chuS boQoy
nuq wI'IpnIS 'e' ghoQIjneS
not ghu'vam Hoch boleghpu'bogh boja' 'etlhwIjDaq 'e' yI'Ip
*Here and everywhere*
vaj Daq wIchoHjaj
qaH naDev ghoS
'ej 'etlhwIjDaq ghopDu'raj'e' tIlanqa'
'eH 'etlhwIjDaq yI'Ip not ghu'vam Hoch boQoypu'bogh boja'
'eH 'etlhDajDaq pe'Ip
majQa' lamto'baj
nom yav bIng DalenglaH
po'qu' tlhIlwI'vam
Daq yIchoH juppu'
Hat ghu'
vaj Hat yISIQ 'ej tujDI' DoplIj qul yIchenmoHQo'
chalDaq ghorDaq je law'bej Doch *Horey'So*
'ej puS Doch'e' neH najlaHbogh je QeDlIj
toH Ha'
jaS peDaQo'
'ej batlh yo' qIj bo'elmeH JitaQchugh qoj jIHujchoHchugh jIDaDI' leS chIch qoH tlhaQ vIDa chaq 'e' vIwuqDI'
qaStaHvIS poHmeyvetlh tuleghDI' tlhIH 'eH not DeSDu' tIbagh
not nach tIjoqmoH
not Honbogh mu'tlhegh vay' tIjatlh je jay'
vaj not "toH toH ghu''e' wISov" "mata'laH mata'qangchugh" joq "maja'qangchugh neH" joq "net chaw'chugh vaj 'e' ta'meH lutu'lu'" joq
'ej not SuloymoHmeH SoQghoch yIjunmoH
toH ghu'wIj'e' boSov not 'e' yIqImmoH
'ej "Hochvam wIvangQo'" SIbI' yI'Ip
vaj rInDI' Heraj 'ej bo'elrupDI' Do' lomrajDaq yo' qIjvaD jachlu'jaj
yIleS yIleS qa' Sot
vaj juppu'wI' Savan 'ej jupna'ra' vIDarupbej
lIvuv 'ej lIparHa'taH *Hamlet* puj Do' not net 'angmeH Dachjaj 'eb chavlaH je
Qo' HItlha'Qo' matay'
patlh tIgh yIbIv
'ej SuH lojmIt vay' poSDaq DaqlaH pagh
pupHa'law' bov
va noDbogh San vIpay
va qatlh vIlughmoHmeH jIboghpu' jay'
Ha' matay'
lut 'ay' cha' lut 'ay'Hom wa' *polonyuS* juH pa'
'eH ghaHvaD Huchvam ghItlhvam je tInob
luq joH
*reynalDo* QaQ bIvalqu' Qu' Data'chugh chay' Da ghaH latlhvaD 'e' yIyu' DaSuchpa'
joH 'e' vIHech
yIqIm wa' romuluSDaq Qo'noS 'Iv lutu'lu' 'e' vISovmeH yIyu'
chay' ghoSta' chaH
'Iv chaH
chay' chep chaH
Huchchaj law'moH nuq
'Iv lutlhej
chay' wagh mIp
puqwI' luSov QIt 'e' Datu'DI' DechlI'mo' moDQo'bogh bIyu'meH QIch ghu' potlh yIcholchoHchu'
'oH chollaHbe'mo' yu'chu'wI' yuDHa'
DaSovqu'be'law' pa' 'e' HarnIS Hoch
"vavDaj juppu'Daj puS je neH vISov
'ach ghaH vISovchu'be'
" qIm'a' *reynalDo*
qaqImchu' joH
"vISovchu'be'bej jIH" Dajatlh net chaw'
"toH ghot vIqelbogh ghaHchugh vaj DaHa'taH
chavvam lI'be' parHa'qu'
" DaH DapummeH DubelmoHbogh ngoD ngeb tI'ogh
'ach Hu'tegh not luquvHa'moHlaw'meH ramnIS bIH
Qu'vam yIqIm
wej SuvchoHbogh loD Qup'e' tlhejtaHmo' reHbogh HeSHom motlhqu' tlhIv vaj HeSHommeyvam ghov 'ej SovtaH Hoch
qaH HeSvammo' yIpum
chaq SuDlaw' joH
chaq chechlaw' Hay'law' tIchlaw' Sollaw' toH chaq ngaghHa'law'
pumvam'e' qachaw' je
'ach joH ghaytan bong ghaH quvHa'moH pumvam
Hu'tegh ghobe'
DamaqDI' pum yIpujmoH
ngaghqangDI' SeH'eghbe' ghaH yIja'Qo'
naDHa'ghach taghlaHmo'
not 'oH vIHechpu'
pumDaj DatlhuptaHvIS qapHa'nIS QIchlIj
wej Qu' lupabbogh mangHom'e' lulammoH HeSHomvam neH vaj 'e' luHarnIS latlh
Daw'choH 'ej joq neH meQlI'bogh wa' yab
vaQ 'IwDaj'e' wej lobmoHpu'bogh Sun 'ej Doch Hoch HIvqang ghaH
'ach joHwI'
qatlh Qu'vam yuD Data'nIS
joH HIja' vISov vIneH
qaH ghu'vam'e' vIHech
'ej maytaH tu'meH mIwvam 'e' vIHar
puqwI' puqHeSHomvam Damaqpu'DI' 'ej "lamchoH je mIv chu' 'oH mupDI' muD" Daja'DI' vaj yIqIm HeSmo' Daja'bogh DIv QupwI' DajoSbogh wa'logh 'e' leghchugh ghot DangonglI'bogh Suja'chuqtaHvIS vaj qaH DIch yIghaj Suja'chuqtaH 'e' rInchoHmoHmeH ghotvetlh Dujatlh "vajna'" "jupwI'" ghap "qaH QaQ" ghap Segh wo' je tIgh pongmIw je pabtaHvIS
lu' joH
toH qaH ta'vam vang
chay' vang
va nuq vIjatlhruppu'
Hu'tegh vay' vIjatlhruppu'
nuqDaq vIja' 'e' vImev
"Suja'chuqtaH 'e' rInmoHmeH" "jupwI'" latlh ghap je "qaH QaQ" je
"Suja'chuqtaH 'e' rInmoHmeH
vaj SoHvaD jatlh "toH qaHvetlh Qup vISov
wa'Hu' vIleghlaw' pagh wejHu' vIleghlaw' pagh qaSDI' vay' pagh qaSpu'DI' wanI'vetlh 'ej vay'vam tlhejpu' ghaH pagh vay'vetlh tlhejpu'
'ej qarbej ghu' Daja'bogh
SuDtaH chaH
pagh chechqu'mo' lengHa'taHvIS loQ vul
pagh SolchoH 'ovmeH vI'qeq jeStaHvIS
pagh chaq vIlegh malja' qach 'eltaHvIS
vaj ngagh 'e' DIlmeH qach
"pagh latlhDaq ghaH
" toH qIm vIt Qa'vam jonba' tojbogh chablIj ngeb
'ej DoS wIpuSmeH Sup 'ej SoDnIS pu'maj
maQoDpu'DI' maDoQ mavalqu'mo' matu'chu'mo' je
SoQwIj qeSwIj je Dapabchu'mo' puqloDwI''e' DapuS je
'ej peghDaj Sov DaDoQ je SoH bIQoDDI'
choyaj qar'a'
HIja' joH
lu' joH
chay' Da ghaH 'e' yItu' je SoH
'ej QoQDaj qeq 'e' yInISQo'
lu' joH
nuqneH *'ovelya*
qay'law' nuq
QI'yaH vIghIjqu'lu' joHwI' joHwI'
DughIj maQmIghHey nuq
joHwI' pa'HomwIjDaq SutDegh vIchenmoHtaHvIS muchol joH *Hamlet*
'ej QeyHa'chu' wepDaj
mIvDaj tuQbe' ghaH
ghIH paSloghmeyDaj pumpu' bIH 'ej qama' qammIrmey rur
yIvbeHDaj rur ghaH chISmo'
mupchuq qIvDaj
'oy''a' luQummeH Hechlaw'mo' mInDu'Daj Qugh ja'meH ghe''orvo' ghaH ghImlu'law'pu'
maw''a' DuneHqu'mo'
'e' vISovbe' joH
'ach 'e' vIpIHbejneS
toH nuq Dujatlh
ghopDu'wIj tlhapchoH 'ej jIHaw' 'e' nISchu'
DeSDaj naQ tIqmoH
Huy'Daq latlhDaj lanmeH mIwvam pab
qaSDI' qabwIj bejchoHchu'mo' 'oH Hotlhlaw'
Dotlhvam leHmeH nI'qu' poHDaj
rInmoHmeH DeSwIj QomchoHmoHlaw'DI' 'ej wejlogh joqmeH nachDaj mIwvam pabDI' tlhuHchu' ghaH
vupmoHmo' 'ej HoSmo' tlhuHDaj vaj roDaj DejmoHlaw' 'ej yInDaj HoHlaw'
rInpu'DI' muweghHa'
volchaHDajDaq mubejmeH nachDaj tlhe'taH HeDaj SammeH mInDu' lo'be'law' ghaH pa' HurDaq ghoSpa'
'ej HurDaq mejpa' reH mubuSlI' tIHchaj
HItlhej Ha'
ta' vISamnIS
maw' muSHa'mo'
'ej ralmo' Dotlhvetlh Qaw''egh bang 'ej SuDbogh Qu'mey nIDmeH yabDaj tlhu'moH
wanI'vam motlhtaH law' pIj Dotlh nong latlh Hoch tlhu'moH puS
SoHvaD jIQoSqu'bej
toH Hu' Daqunta''a'
ghobe' joH QaQ
'ach qeSmeylIj vIpabta'
jabbI'IDmeyDaj vIlajQo'
muchollI' reH 'e' vIbot
wanI'vammo' DaH maw'law'
jIQoS vIqImtaHvIS ghaH vInoHHa' 'ej muj leSSovwIj
SoHvaD reHpu' neH 'ej leS SoH DuquvHa'moH 'e' vIpIH
'a Hu'tegh
qanDI' ghot reH qaDDaj lachruplaw' 'ej QuptaHvIS reH qaDDaj machrupmoH
Ha' ta' wIghoS
De' SovnISlu'
wIpeghtaHvIS maSoy'DI' pegh lot QIH law' ta' QeH QIH puS
De' QoyDI'
lut 'ay'Hom cha' ta'qach pa'
maj *roSenQatlh* maj *ghIlDeSten* nuqneH
Salegh vIneHba'
jIHvaD 'ut je Qu' Satoy'moHbogh
vaj "tugh pechol" vIra'DI' jImoDnIS
*Hamlet* choHHey De' boQoypu'
vIpongmeH "choH" vIjatlhnIS DotlhDaj ngo''e' DaH luleHbe'mo' tIqDaj porghDaj je
yaj'eghlaH pe'vIl 'e' lunISchu' rIntaH nuq vavDaj Hegh je 'e' vIloylaHbe'
vaj tlhIH Satlhob
qaStaHvIS jajraj Qup Sutay' tlhIH ghaH je batlh boghojtaHvIS
boSumtaH je SuQupmo' 'ej SuvIDmo'
vaj loQ naDev monjuHwIjDaq peratlhqang
chaq ghaH botlhejmo' belmey nejqangqa' ghaH
ghaH SotmoH'a' vay''e' wej Do' vISovbogh chaq 'e' botu' boloy 'e' chaw'DI' 'eb
'ej Seng bo'angDI' Do' chaq 'oH vIvorlaH
jatlhtaHvIS pIj lIbuSpu' ghaH qaH QaQ
'ej qarbej tlhIHvaD tIqDaj SumtaH law' yInbogh cha' vay'vaD tIqDaj SumtaH puS
yInmeH 'ej chepmeH ghu' wItullI'bogh Suquvqang 'ej Suvupqang 'e' che'angchugh 'ej loQ naDev SumImchugh vaj SuSuchmo' ta' vanvaD 'umbej tlho' boSuqlI'bogh
maHvaD voDleH DIbHoS boghajneSmo' Qu' chav boneHneSbogh boraDlaHbej
'ach batlh relobrupbej
'ej tlhIH retoy'rupqu'mo' baHbogh pu'HIch wIDaqangbej
vaj DaH majegh'eghneS
chera'meH qamrajDaq Qu' laHmaj Hoch wIlan cheraDpa'
*roSenQatlh* *ghIlDeSten* je quv retlho'
*ghIlDeSten* *roSenQatlh* je quv retlho'
'ej 'eH tugh choHqu'pu'bogh puqloDwI' yISuch Satlhob
Ha' 'eH peghoS mang puS
'ej *Hamlet* DaqDaq qaHvam'e' tIDor
maSaHmo' 'ej maQorghmo' beljaj *Hamlet* 'ej ghaHvaD QaHjaj ghu'
'e' chaw'jaj San
*DuraS*vo' cheghpu'neS Duypu' joHwI'
'ej cheghDI' Quchqu'
reH De' QaQ vav DaDa
qar'a' joH quv
toH DIch yIghajneS jIHvaD potlhchugh qa'wI' vaj jIHvaD potlhqu' ta'vaD qa''a'vaD je Qu''e' vIpabbogh
'ej qatlh maw'choH *Hamlet* Do' 'e' vItu'pu'
mujchugh vaj jISammeH po'Ha'choHlaw' ben po'qu'taHbogh yabwIj ngoDmey vIwamtaHvIS
DaH 'e' vIHarqu'
De'vetlh lI' vI'Ijqangqu'
nISuch Duypu'ma' 'e' yIchaw' jIjatlhpa'
rInDI' 'uQ'a'Daj naHHey Dajaj De'wIj
vaj nay' tIlIHneS SoH
naDev tIDor
puqlI' QuchHa'ghach meqHey Hal je Hoch tu'pu' ghaH 'e' muSovmoH *ghertlhuD* bang
wa' neH meq potlhmo' qaSpu' 'e' vIHar Heghmo' vavDaj 'ej moDqu'pu'mo' tlhoghmaj
tuQDoq vIlo'rup je
nuqneH jup QaQ
'eH *voltImaD* nuq Qum *DuraS* loDnI'wI'
DurI' je 'ej Duvan Davanpu'mo'
maja'chuqDI' vaj muvmoH *vortIbraS* tugh 'e' lumevmeH pa' Duypu' ngeH pIn
*qInSaya* HIvmeH qeqtaH Hu' 'e' Har ghaH
'ach nuDchu'DI' nIQojmeH qeqtaH chaH 'e' tu'bej pIn
'ej Qay'qu'
tojlu'pu'mo' roptaHvIS qantaHvIS HoSHa'taHvIS ghaH
vaj mevmeH *vortIbraS* jabbI'ID lab
nom ghu' vIja' lob latlh
ghaH qunqu' pIn
'ej not DuQoj 'e' nIDqa' vavloDnI'vaD 'e' 'IpnIS ghaH
vaj Quchqu'mo' pIn qan *qInSaya* HIvmeH neghvetlh muvmoHta'bogh DaH ghaHvaD woQDaj nobpu' pIn
'ej Qu'vaD DISHuchDaj bIHmeH wejSaD DeQmey nob je
tlhobmeH ghItlh'e' lu'angbogh navvam qon je Qu'vetlhvaD SeplIj lenglaHlI' mangghomDaj tugh 'e' yIchaw'neS
Qob SIQbe'meH 'oH 'ej chaw'lIj leHmeH Qu''e' Delbogh navvetlh yIpab je
toH mubelqu'moHbej ghu'vam
vIqelmeH chaw'DI' poHwIj ghItlh vIlaD
ghu'vam'e' tugh vIbuSchu' 'ej vIjang je
'a qaSpa' tlhIH Satlho' Suvumchu'ta'mo'
yupma' wItaghbej qaSDI' ram
majQa' Sucheghmo'
Qu' luchavchu'law'ta'
ta' ta'be' je nuq 'oHnIS ta'Dotlh'e' nuq 'oH Qu''e' nuqmo' pem 'oH pem'e' qatlh ram
ram'e' 'ej qatlh poH 'oH poH'e' Hochvetlh vIQIjchugh vaj pem ram je poH je Hoch vIlo'Ha' neH
toH SovlaHvaD qa'botlh Damo' SoQ vI' 'ej Sov DeSDu' HaQchor je Damo' SoQ Dalqu' vaj DaH nom vIja'
maw'neS puqra'
toH maw' ghaH 'e' vIpong neH
maw'lu' net QIjchu'chugh vaj maw' QIjwI'
'ach ramjaj SoQvetlh
law'jaj De'na'lIj 'ej puSjaj mu'QujlIj
qa'Iprup joH not mu' vIQuj
toH maw'mo' teHbej SoQwIj
teHmo' Do'Ha' 'oH
'ej Do'Ha'bej teH
Dogh mu'Qujvetlh
'ach 'oH vIghImbej rIntaH mu' vIQujQo'mo'
maw' ghaH 'e' wIloyjaj
'ej yabDaj nISchoH nuq DaH 'e' wItu'nIS
toH "yabDaj mISmoH nuq" DaH jaS vIjatlhnIS qaSba'taH nISbogh mISvam lISmo' vay'
vaj ratlhtaH ghu' 'ej ratlhlI' ghu' vIDelbogh
puqbe' vIghaj
vIghaj vIghatlhtaHvIS
'ej batlh mulobmo' ghaH 'ej Qu'Daj pabmo' SuH navvam nobta' ghaH
peqIm penoH
quvmoHbogh qa'wI'
*'ovelya* 'IHchu'vaD
mujbej mu'vetlh
moHbej mu'vetlh
moHbej "'IHchu'vaD"
'a tugh Hoch bo'Ij
ghItlh povqu'bogh roDaj DoqDaq Dochvam
*Hamlet*vo' De'vam Hevpu''a'
joH quvqu' loQ yIloS
ghItlh naQ vIlaDchu'
meQ Hovmey 'e' yIghoH
ratlh pemHov 'e' HIpon
ngeb vIt chIch 'e' yInoH
bang jIH not 'e' yIHon
*'ovelya*'oy bom mu' vIqontaHvIS jIpo'be'
'ItmoHwI'meywIj Hoch QumlaHchu'be' ghItlhlaHwIj
'ach banglI' jIHbejbogh nong law' bangmey Dabogh latlh'e' nong puS toH nongbe' latlhvetlh 'e' yIHar
Qapla' jawoy
reH banglI' porghDaj yInmoHtaHvIS neH QuQDaj *Hamlet*'e'
mulobmo' jIHvaD navvam 'ang puqwI'
'ej ghaHvaD tlhobDI' *Hamlet* teSwIjvaD poH mIw je Daq je Hoch muja'pu' je
'ach ghaH muSHa'choH *Hamlet* chay' 'e' laj
toH 'Iv jIH 'e' DaHar
loD quv loD matlh je
vItob vIneH
'a nuq DaQublaH joH moD muSHa'ghachchaj tuj bong 'e' vItu'DI' ('ej 'e' vItu'bej ja'choHpa' puqbe'wI'
tlhIHvaD vIchIDnIS) nuq boQubneS ta' ta'be'lI' quv je peghghItlhpaq vIDachugh qoj tIqwIjvaD mInDu' vISoQmoHchugh QIchwIj vIlojmoHDI' qoj ghu' vIleghDI' nochDu'wIj vIyajbe'chugh nuq boQubneS
SIbI' jIvang
puqbe'wI' QupvaD vIjatlh "chavqo'lIj HurDaq *Hamlet* tu'lu'
" 'ej vIra'choH SuchtaH *Hamlet* 'e' nISmeH wegh'eghnIS
'oSwI' lajbe'nIS
nobmey Suqbe'nIS
'ej jIra'DI' rIntaH yabDajDaq qeSwIj poch
vaj nom vIja' *Hamlet*vaD janglu'Qo'DI' 'ItchoH ghaH
tugh Qongbe'choH
tugh HoSbe'choH
tugh mISchoH
ghaHvaD qaSDI' choHvam Hoch DaH maw'
DaH wam'egh yabDaj
DaH ma'IQ
ghu'vetlhmo' SabchoH ghaH 'e' DaHar'a'
ghaytan ghaytan
joH qaSDI' vay'
ghu' vI'olmeH "qaS" vIjatlh'a' qaSbe'bej 'oH net tobpa'
wanI'vetlh vISovbe'
teHbe'chugh vuDwIj muchaw'chugh 'eb vaj nuqDaq So''egh vIt tugh 'e' vItu'
yuQbotlhDaq So''eghchugh je
toH chay' wItobchoH
qaStaHvIS loS rep naDev rut HeDaq yIttaH
'e' DaSov
vaj pa' puqbe'wI' vIweghHa'
'ej qaStaHvIS nuSo'taHjaj HaSta
chay' ghomchuq 'e' yIqIm
ghaH muSHa'be'chugh 'ej ghaH muSHa'qu'mo' Sabbe'chugh yabDaj vaj wo' qumboQ jIHbe'jaj
Du' veQDuj je vIvu'choHjaj jay'
toH nab'e' wInID
DaH chol Do'Ha'wI'
Sagh 'ej laD
pemejneS joH
SIbI' pemejneS cha'
SIbI' vIDorchoH
Ha' HIchaw'neS joH
DotlhlIj nuq joHwI'
choghov'a' joHwI'
qaghovchu' verengan mut 'oH mutlIj'e'
ghobe' joHwI'
vaj bImutbe'mo' qanaD
jImutbe''a' joHwI'
HISlaH wa'netlh nuvvo' le' wa' mutbe'wI'
teHqu' joHwI'
"pe'vIl targh lomDaq SISDI' 'otlh vID gharghHom Sepchugh yInroHHom notlhHa'moHlaHchu'mo' woj'a'
" puqbe' Daghaj'a'
HIja' joHwI'
SISbogh Sep'e' bong 'el ghaH 'e' yIbot
lopmoHbej ghu muvtay 'ach SeplaHmo' puqbe'lI'
jup qeS yIqel
nuqjatlh jay'
puqbe'wI' buStaH qar'a'
'a mughovbe'pu'
verengan jIH 'e' noHHa'
loj lojqu' yabDaj
'a jIQuptaHvIS je jIH reH muSHa'qu'bogh tIqwIjmo' jIbechbej
ghaH vIrurba'pu'
nuq DalaD joHwI'
mu' mu' mu'
nuq luqel joHwI'
vangmeH qel 'Iv
'ach De' nuq luqel mu' joHwI'
qon qoH tlhIv "loD qan porghDaq chIS rol Hab Quch DughHa' 'ej Hurgh bIQ jeD nIjbogh mInDu''e' 'ongHa'chu' yab 'ej pujqu' 'uS
" may tIchbogh mu'vam Hoch 'ach maybe' mIw mu'qaD veSvam noDlaHbe'mo' qanwI'
nawloghwIj Qup DamuvlaH bIHeDmeH vetlh nuch DaDachugh
maw'bej 'ach meqlaw'taH
muDvo' bIyItqang'a' joHwI'
toH muDvo' 'oH mol'e'
pIj jangDI' 'ongqu' SoQDaj
SoQvam 'ong lo'laHbe' nuj pIv Dupvam tuchmo' mISbe'ghach
vImej 'ej ghomchuq ghaH *'ovelya* je tugh 'e' vInab
SoHvo' jIjaHnISneS joHwI' quvqu'
jIHvo' bIyaHDI' SoH jIH Quch law' yaHDI' HochHom jIH Quch puS -- wa' neH latlh vImaS yaHjaj yInwIj neH yInwIj neH yInwIj neH
SoHvo' jIyaHnIS
qoHvam qan qetlh
*Hamlet* quv bonejlaw'
pa' ghaHtaH
Dutlho'jaj qeylIS qaH
joHwI' quv
joHwI' webHa'
juppu'wI' QaQqu'
Dotlhraj nuq *ghIlDeSten* *roSenQatlh* je
wa'Hu' may' yoS wutlhDaq 'Iwghargh Dotlh yon 'oH Dotlhmaj'e'
Do' yapmo' neH Dotlhmaj Do' maQuch
mIvDaq tuQbogh San maQambe'
DaSmeyDaj bIngDaq SuQambe' qar'a' je
vaj qoghDaq tuQbogh botlhDaj yonDaq joq SuQam
jojDajDaq neH maQam
wejpuH teHqu'
ngaghHa'wI' ghaH
De' chu' HIja'
chu'law' ghu'vam neH
maychoH 'u'
qaS maQmIgh'a'
'ach teHbe' De'raj
HeSraj nuq bIjmeH San naDev bIghHa'Daq lIngeH
bIghHa' 'oH Qo'noS'e'
vaj 'oH je 'u''e'
bIghHa' tIn'e' 'oH 'oHDaq weghbogh pa'mey Surchemmey je qama'DISmey je lutu'lu' Qo'noS qab law' Hochvetlh qab puS
'e' wIQoch
vaj 'oH boqelDI' bIghHa' botu'be'
QaQbe' 'ej qabbe' ghu' 'a QaQ pagh qab 'e' tu' qelwI' neH
vIqelDI' bIghHa' vItu'
toH bIchav 'e' Danabmo' bIghHa' Datu'
chavnablIj wegh
QI'yaH muweghchu'chugh je naH vaHHomHey mIch'a'mey'e' not luvuSlu'bogh vIche' 'e' vInoHlaH
'ach vInoHbe' muSujmo' wanI' vInajbogh
tugh bIchav 'e' Danajbej
QIb najlu'bogh 'oH chav'e' nablu'bogh
QIb neH 'oH je wanI' Hoch najlu'bogh
tISmo' 'ej tunmo' chavnab QIb QIb neH 'oH 'e' vInoH
vaj porgh 'oH qoHma''e' 'ej qoH QIb neH chaH chuQunma''e' chavbogh SuvwI'ma''e' je
vaS'a'Daq wIghoS'a' Hu'tegh jImeqlaHbe'mo'
baQa' Qo'
tlhejwI'wI' tIDaQo' toy'Ha'qu'mo' mutlhejtaHvIS
'ach jupwI' tlhIH pIj ben 'e' botobmo' DaH peyuDHa'
qatlh *tlhIn*Daq tlhIH
latlh wIneHbe'
mIpHa'wI' vIDamo' jItlho'DI' jIchuSbe' 'ach Satlho'
'ej jupoy yapqu' mu'DeQwIj
naDev SupawmeH bora'lu''a'
boneH'a' tlhIH
Ha' Ha' HIlob
Ha' Ha'
Qo' pejatlh
nuq wIjatlh DaneH
jISaHbe' 'a yIjangchu'
SupawmeH lIra' vay' 'e' luDISlaw' qabraj DIv'e' jechlaHbe'bogh SunaDmeH mIw
lIra' ta' ta'be' je QaQ 'e' vISov
qatlh qaH
'a taHmeH boqmaj yuDHa' tuvItjaj
boqmaj matlhmo' parHa'ghachmaj Qupmo' jupbatlhmaj yuDHa'mo' Hoch potlhmo' je DellaHbogh gharwI'na' jIHbe'bogh HIlob 'ej pevIt SupawmeH bora'lu' qar'a'
nuq DanoH
vaj Qo' jIDughrup
tuparHa'chugh vaj pemImQo'
joHwI' mapawmeH wIra'lu'
Sulay' 'e' boquvmoHlaHmeH 'ej notlhchoHbe'meH 'Ipraj qatlh lIra' 'e' vIloychu' jIH
qaStaHvIS Hu'meyvam bong belwIj vIjegh meq vIyajbe' je
jIHaghqangbe'law' jIreHqangbe'law' 'ej 'u' qo''a'vam je qelDI' maw'wI' vImojlaw'pu'bogh Dalbogh ghe''orHey'e' tu'
Dung'a'maj pov'e' SuS'e' nuDechbogh moQ'a' 'IH'e' yItu'
toH chalvetlh jenDaq HuS meQbogh Hovmey wov
wejpuH jIHvaD He'So'bogh SIptlhoQ ngIm rur
toH chovnatlh Doj ghaH tlhIngan'e'
valqu' meqlaHDaj
HoSqu' porghlaHDaj
chentaHvIS 'ej vIHtaHvIS po' 'ej le'
Dol'a' jub rur SuvtaHvIS
QI'tu' moch rur QubtaHvIS
'IHchu'bogh qo''a'Daq pupchu' mutvam 'IH
'a jIHvaD ramlaw' chenmeH porghmeyvam lam'e' tlholHa'moHbogh 'u'
mubelmoHbe' loD
be''e' je 'ach SuHaghmo' jaS boQublaw'
joHwI' yabwIjDaq 'oHpu'be' qech tlhaQ'e'
qatlh bIHagh vIjatlhDI' "mubelmoHbe' loD
nIbelmoHbe'chugh loD vaj DawI'pu' DabejDI' Human tejpu'Hey DaqIHlaw'
chaH DIjuS naDev maqughtaHvIS
toH naDev nItIvmoHmeH chol chaH
batlh paw ta'qoq
ghaH vIvanchu' jIH
SuvmeH vaj yoH 'etlh yoD je lo'jaj
jachDI' muSHa'wI' lI'chu'jaj HughDaj
SoQ naQ rInmoHchu'jaj nongwI'
taghDu''e' reH luchu'beHlu'bogh jormoHjaj HaghmoHwI'
bom mu'tlhegh pabjaj be''a' pagh ghaH lupab bIH jatlhtaHvIS
DawI'ghomvam nuq
vengvo' lot ja'wI''e' reH DatIvqangbogh ben DabejtaHvIS
nuqmo' DaH lengtaH
juHvengchajDaq chepchu' batlhchaj malja'chaj je
Qapla'chaj lutunglaw' noywI' chu'
ben DaHjaj je rap'a' naD luHevbogh
DaH lunaDlu''a'
chay' qaS
ghobe' chaHvaD laH po' polmoH qeqchaj
'ach nIS puqtlhoQ chu''e' Qa'Hompu''e'
DataHvIS SoQchaj chuS lachmo' chaH naDqu' je bejwI' Seyqu'
DaH noychoHpu' 'ej Qoplaw'bogh DawI'yaHmeyqoq tIchqu'mo' ghItlhtaj vaQ law' 'etlh vaQ puS 'ej 'elvIp 'etlh qengwI'
toH puq chaH'a'
Qorgh 'Iv
je' 'Iv
bomlaHbe'DI' ghoghchaj notlhchoH'a' Qu'chaj
nem beprup'a' DawI' qan mojDI' (ghaytan qaS wanI'vam jaS malja' ghajlaHbe'chugh) chaH nuS'eghmoH ghItlhwI'chaj DawI' qan cho'nISbogh naDHa'qu'mo'
QI'yaH pIj Qay'qu' cha' jaghHeyvam
SoltaH DawI'pu' 'e' lutungHa'mo' rewbe' Qu'chaj lunaDtaH
qaStaHvIS benvam lut ghItlh'e' reH DIlQo' muchwI' Hoch lutDaq DawI' veSmo' tonSaw' luqaSmoHbe'chugh je ghItlhwI' DawI' je
va yabtonSaw'na' luqaSmoHqu'bejtaH cha'
Qapla' lunge''a' QupwI'
toH HIja' jay'
qo'qengwI' tepDaj je lunge' je
net pIHbej
ta' ghaH vavloDnI'wI''e' 'ej DaH DeghDaj DIlmeH cha'maH loSmaH vaghmaH wa'vatlh ghap DeQ nobqang ben ghaH luvanHa'qu'bogh ghotpu''e' yIntaHvIS vavwI'
Qu'vatlh ghu'vam motlh law' 'u'pab motlh puS ghu' QIjjaj QeD
paw DawI'pu'
batlh *tlhIn*Daq Supawpu'
DeS tIlo' pevan
vanwI'vaD tay quv ra' lurDech tIgh je
SavanmeH jIjatlh pagh DawI'pu'vaD (jaqnISba'bogh) vanwIj jaq law' tlhIHvaD van jaq puS
batlh Supawpu'
'ach vavqoqwI' SoSHeywI' je toj ghu'
ghu' nuq joHwI'
000 DoD 2 QuvDaq jImaw'
choHDI' lurghvetlh pIm toQDuj to'baj je 'e' vIghovlaH
Saghom loDpu'
HI'Ij *ghIlDeSten*
SoH je
cha' qoghDaq cha' QoywI''e'
ghuSutHom tuQ wej 'e' mev loDqoqvetlh
chaq cha'logh 'oH tuQ
puq chaHqa' loD qan'e' rut net joS
paw DawI' muja' 'e' nabba'
toH bIlugh
Hoghjaj wa' qaS
lughqu' mu'
joHwI' De' qaja'
joHwI' De' qaja' jIH
rIymuS luDanchoHDI' romuluSngan
paw DawI'pu' joHwI'
not mev peghmeyHey
baQa' qavIt
'ej targhDaj lIgh DawI'pu' Hoch
laHchaj Doj law' laH Hoch Doj puS lotlut tlhaQbogh lut qunlut noybogh lut tlhaQ tlhaQbogh lut noy qunlut noy qunlotlut tlhaQbogh qunlotlut noy 'ay' wavbe'lu'bogh bom tlhab joq ja'meH DataHvIS
"morab qeylIS je" ja'meH 'IQqu'be' qoj "verengan'a' Qagh" ja'meH Quchqu'be'
DataHvIS lurDechvaD pablaHchu' pagh bIvlaHchu' chaH
bo'DIj pIn'a' toH *ghaw'ron* qan
tev'a' Daghajbejpu'
tev'a' nuq ghaj ghaH
toH 'ej ghaHvaD wa' puqbe' neH tu'lu'
puqvetlh muSHa'taH ghaH 'ej Qan
puqbe'wI' buStaH
lugh qar'a' mu'wIj *ghaw'ron*oy
chopongmeH *ghaw'ron* Dajatlhchugh vaj wa' puqbe' vImuSHa'taHbogh 'ej vIQanbogh vIghajbej
ghobe' qarbe'
vaj qar nuq
toH ra'taHvIS San Dach Sun
'ej qaS wanI''e' DaSovbogh vaj ghaHvaD qaSpu' qun wanI'
SoHvaD ghu' naQ Del bomvam mu'tlheghmey wa'DIch'e'
toH ghoS mevmoHwI'wI'
batlh naDev Supawpu' pInpu' batlh Savan
naDev tlhIHmo' jIlop
Savan juppu' QaQ
toH jupwI' nI' ben qaleghbogh DaH jIbvam chu' Suqba'pu' qab
qab laHlIj 'e' chotemmeH naDev Qo'noSDaq SoH'a'
toH be'oywI' bang je
Hu'tegh chalDaq SaltaH nachlIj DaH qajuvmeH DaSpu' vIchel
ghuy'cha' bombogh HoS lIngwI' rurmo' ghoghlIj Qup va 'oH Sorghbe'lu'jaj
pInpu' batlh Savan
romuluSngan wamwI' DIDa HochDaq wIleghbogh maSupqangmo'
SIbI' SoQ wIQoy
Ha' laHraj po' yItob
Ha' SoQ nong
D1 SoQ nuq joHwI' QaQ
ben SoQ chojatlh 'ach not naQ lutDaj
naQbejchugh vaj wa'logh neH naQ
rewbe' motlh vuD vIqaw chaH belmoHbe' lut
to'baj 'uSDu' SopQo' qaSbe'taHvIS QI'lop
'ach QaQqu' lut 'e' vInoH jIH vuD nIv ghajwI'pu' je
pov lut 'ay'meyDaj buvchu' 'ej mu'mey 'ongmoHqu' lachbe'taHvIS qonwI'
mu'tlhegh wIbHa'moHbe' HaQchorHey net joS 'ej mu'Daq qech ngeb chellaw'pu' net pumlaHbe'
'ach yuDHa'chu' net maq belmoHbejtaHvIS pov 'ej reH mIybe'law'taHvIS Doj
lutvo' wa' SoQ'e' vIparHa'chu' *DI'Do'*vaD SoQ'e' jatlhbogh *'enyaS*
Hegh *pIray'am* 'e' qelDI' SoQ vIparHa'qu'
qawbogh yablIjDaq yIntaHchugh vaj mu'tlheghvamvo' yIruch toH jIQub jIQub
rughtlhoQ rurlaw' pob qIj *pay'ruS*
SoQ tagh *pay'ruS* mu'tlhegh
ramjep rurlaw' pob qIj *pay'ruS* DeSDu' Dugh HoH 'e' Hechmo' Sanchaj SomDaq QojrupmeH QottaHvIS
pe'vIl porghDaj qIjqu'Daq qu'Daq DuQwI' DeghHey'e' DaH ngoHpu' ngotlhwI'
qabDaq qamDu'Daq je Doqchu' DevwI'
ghaHDaq ghomHa'pu' qorDu' quppu' je 'Iw'e' 'uybogh 'ej QIt QaDmoHbogh qechmey qul'a'
vaj che'wI'chaj chotrupwI'vaD HeSrupbogh HoSDo' QIbHey Qobqu' qemlaw' qul'a'vetlh
meQmo' 'ej muSmo' DaSpu'DajDaq DuD'egh Hommey HuH je
puyjaq pImbe' mInDu'Daj maw'
pay' *pIray'am* qup'a' qan noDmeH nejtaH pejqangbogh *pay'ruS* ghe''or ghungwI'
vaj yItaH
Hu'tegh joHwI' bIjatlhchu' 'ej ghogh DalISchu' 'ej mu' DanongmoH
D1 tugh ghaH tu'
mangpu' mupHa' gholvetlh
ghopDaj lobHa'mo' letbogh betleHDaj buDlaw' pumDI' 'oH
poQqu' tlhaptaHwI'Daj 'e' tlhIvlaw'
HIghbejmeH HI' Hay'choH *pIray'am* *pay'ruS* je
mayHa' may'chaj
HIv HurghwI'
QeHmo' QapHa' 'etlhDaj
'ach 'aw'mo' naSbogh nuHDaj SuSHey Sey vulchoH vavnI''a' Doy'
Dej je vanglaHbe'bogh veng DungDaj DechtaHvIS qorqanglaw'bogh qul
ghatlh ghaH 'e' ghovlaw' 'oH
chuSqu'mo' chenHa'taHvIS tojwI' teSDu' vonglaw' veng
vaj peplu'DI' pumlaw'Qo' nurnuv nach chISDaq chungbeHbogh tochDaj taj'a'Daj
HI' Hotlhlu'bogh rurchoH rojQo'wI'
QeHDaj Qu'Daj je vangbe'choH vIHbe'wI'
'ach rut ralpa' muD morgh 'e' mevlaw' chal
chuSQo' Sachbogh SuSmey
'ughlaw' 'engmey
peghlaw' je puH HeghvIplaw'mo'
'a HatlhDaq tIHmeyDaj'e' tugh mupmoH muD
jaS ja'be'lu'
yevpu'DI' je yovwI' ghaH vumqa'moH vembogh bortaS
baSDaq qIptaHvIS qeylIS yovwI' yayyoD chenmoHbogh chamwI'pu''e' vaQbej
'a vIDchu' 'Iwmey 'etlhDaj *pIray'am*Daq pumDI'
Sorghqang neH San
laHmeyDaj lIqjaj qa''a'pu' qep
gho'a'Daj gho'wI'mey naQmey je notlhmoHjaj
QI'tu' QuQvo' botlhDaj bachjaj
laghlu'DI' luchvetlh ghupjaj ghe''or
tIqqu' SoQ
vaj chIpwI'Daq rollIj tlhej
SuH yItaH
chaq DaH ghaHvaD qaq SoQ tlhaQ lut Qut joq
jaS yonbe'
*He'quba* yIqelchoH
D1 bortaS be'nal'e' Huy''a'Du' *He'quba*'e'
Huy''a'Du' *He'quba*
QaQbej mu'vetlh
QaQbej "Huy''a'Du' *He'quba*"
D1 tu''a' toDlaHwI'
DachtaHvIS DaSmey qevpobDajvo' qulmey boch buQlaw' leghwI' laHDaj mISmoHbogh mInbIQ'e'
Dat DughtaH
nachDajDaq narghpu' qutmey qogh
DaHjaj 'oH Dech qatwI' qutlh
mopDaj mechpu' je
boghmeH batlhvaj law' QeyHa'lI'bogh 'ej Qopbogh chorDaj chIS'e' ma'nIS mep'ay' neH
ghumtaHvIS ghong vubvam vupnISlu'
be'nalvetlh bejchoHchugh vay' vaj vaQnIS
'urmang 'oghpu' SotmoHbogh San 'e' maqnIS meqwI'vetlh SuQtaHvIS SoQDaj
bIjmeH ghaH bejchugh qa''a' qep
QujmeH QutwI' loDnalDaj lommey puy *pIray'uS* 'etlh 'e' 'olDI' ghaH
vaj vItmo' vI'bogh ghoghDaj ghum'a' qa''a'pu' qImmoHlaHchugh jubbe'wI' jIp vaj vangrup je veSmey joH'a' 'ej jeDnIS meQbogh muDmIn'a'
toH yItu' choHbej qabDaj qoj nIjbeHbej mInDaj
va taHbe'jaj
pItlh maj
tugh SoQ naQ Daja' 'e' vIchaw'
joHwI' QaQ DawI'pu' Dama'meH yIHeQ
Dotlhchaj yIqel
bovmaj ta qengwI' qun qawwI' je chaH
HeghlIjvaD SonchIy Hat qaq law' yInlIjvaD naDHa'ghachchaj qaq puS
joHwI' 'umchugh Hochvam vIma'chu'
ghuy'cha' qaH majQa'
'umbe'chugh tIma' je
Hochma' muHlu' vaj net bot
Dama'meH ra'jaj batlhlIj nurlIj je neH
reH 'umbe'chugh vI'bej tevlIj
Ha' qaHpu'
yItlha' juppu'
wa'leS lut wIbej
choQoylaH'a' jup
"*ghonja'gho* Hegh"'e' boja'meH SuDalaH'a'
D1 lu' joHwI'
wa'leS ram 'oH wIbej
wa'maH cha' jav joq mu'tlhegh'e' vI'oghbogh 'ej vIchelbogh chIch DaHaDlaH qar'a'
D1 lu' joHwI'
qaHvetlh yItlha' 'ej yIvaqbejQo'
[mej DawI' wa'DIch] juppu'wI' QaQ DaHjaj ram Saghomqa'
batlh *tlhIn*Daq Supawpu'
vaj taHjaj wo'
DaH jImob
baQa' Qovpatlh toy'wI''a' qal je jIH
nonglaw' 'e' najpu'mo' neH wa' lutmo' neH qechlaHDaj qu'vaD qa'Daj raD DawI'vam
webmoH qar'a'
'oH raDDI' chISchoH qabDaj
yIQ mInDu'Daj
qImHa''egh DataHvIS
ghor ghoghDaj
chenlI'mo' porghlaHmeyDaj qechDaj luDelchu' bIH
'ej paghvaD qaS jay'
*He'quba*vaD neH
qatlh *He'quba*mo' SaQmeH wIchvetlh SaH ghaH
nongchu'meH meq tungHa'wI' je vIghajbogh ghajchugh ghaH vaj nuq vangrup ghaH
nuq ta'
DawI' yaH SoDnISlaw' mInbIQDaj ngeng
ghom'a' teSDu''e' DuQnIS ghIjbogh QIchDaj
DIvwI'pu' maw'nISmoH
chunwI'pu' 'ItmoH
HeS Sovbe'wI'pu' mISnISmoH
mInDu' teSDu' je laHmey yay'nISmoHbej ghaH
'ach jIH
lam DataHbogh toDSaH neH qetlhqu' jIH
najbogh vulqangan neH vIrur jItammo'
Qu'wIjvaD chav vIvangmeH jIyatlhQo'
'ej pagh vIjatlhlaH
ta'vaD pagh vIjatlh je 'ej ta'vetlh mIpmey yInDaj quvqu' je QIHlu'chu'pu'
va nuch jIH'a'
"taHqeq SoH" jatlh 'Iv
va nachwIj qIpmeH ngIlqang 'Iv
rolwIjvo' jotlh 'ej qabDaq pob vo' 'Iv
va ghIchwIj bochmoH 'Iv
"HughDaq bInep" taghwIjDaq pumvam yuvmeH je jatlh 'Iv
vISIQnISba' jIH
*be'tatlheD*ngan HuHqoq vIghaj muwIblaHbe'law' HI'tuy pujqu'mo' HuHwIj
chaq puSbe'chugh 'oH vaj Hu' chal Qa'mey Hoch vIrornISmoH bIHvaD toDSaH chor'ochDu''e' vIje'mo'
ngaghHa'bogh chotqangbogh taHqeq
quvHa'bogh payQo'bogh qurbogh 'ongchu'bogh taHqeq
toH targh vIDalaw'
wejpuH yoHlaw' ghu'
vav vImuSHa'bogh chotlu'
DaH bortaSvaD puqloDDaj jIHbogh ra' ruv QeH je Hoch
'a nuq vIvang
tera'ngan neH vIDa mu'meyDaq tIqwIj vI'ughHa'moHlaw'mo'
'ej mu'qaD vIjawHa'mo' chom vIDa
tach toy'wI''a'
Ha' yabwIj
ngoD vIQoypu' DawI' lut qImmeH ba'taHvIS DIvwI' po'mo' neH lut muchwI'pu' qa'Daj'e' pIj qIpchu' lut
SIbI' vaj HeSDaj maq
jatDu' ghajbe' chotwI' Dotlh
'a jatlhmeH porgh laH Hoch lo'rupmo' vaj HochvaD mer
qImtaHvIS vavloDnI'wI' ror vavwI' HoH rurlaw'bogh lutHom'e' lumuch DawI'vam 'e' vIqaSmoH
'ej qabDaj Dotlh vItu'
vIDaj wej 'oy'taHvIS
bong bItlaw'chugh vaj He vISov
chaq ghe''orvo' nucholta' lomqa' vIleghbogh
chenDI' belmoHmeH laH ghaj veqlargh
jIpujmo' 'ej jI'Itmo' muqIchmeH rIntaH chaq mughongpu'
DuH ghaH HoSmoHlaw' 'Iw 'It net Sovmo'
toH 'olmeH ngoD meq qaq law' qa' QIch qaq puS
ta' ghob vIchu'meH DawI' lut vIghuS
lut 'ay' wej lut 'ay'Hom wa' ta'qach pa'
'ej qatlh mISwI' Da 'e' boghojlaHbe' Suja'chuq 'e' boSeHtaHvIS qar'a'
DaH maw'mo' Qobmo' ngojmo' jaj jot Hoch Sujchu' ghaH jay'
bItlaw' ghaH 'e' DIS
'a bItmoH nuq reH 'e' QIjQo' ghaH joH
ghaH yu'lu'DI' jIjQo' ghaH 'e' wItu' je
'ach 'ongmo' maw'taHvIS maHvaD jangQo' yabDaj Dotlhna' nuDISmeH pIj wInIDDI'
qej'a' lIleghDI'
toH SuvwI' quv Dabej
'ach DameH raD'eghqu'
'ach ghaH wIyu'DI' maHvaD jatlhruptaH
yupma' vay' jeSmeH botungHa'pu''a'
joH lut DawI' DIjuS malengtaHvIS
ghaHvaD DIDel 'ej QoyDI' QuchchoHlaw'
ta'qachDaq chaH
DaHjaj ram ghaHvaD DameH chaH ra'pu' ghaH
"lut yIleghneS joH" SatlhobmeH jIH muqoy'pu'
vIleghqangbej 'ej ghu'vetlh neHlaw'mo' jIbelqu'bej
qaH QaQ yIneHqu'moH
'ej belvam tIvchoHmeH ghaH yItungHa'
luq joH
SuH *ghertlhuD* 'IH ghomej je SoH
jIH neH mughommeH *Hamlet* DaH jIra'pu'
vaj bong naDev *'ovelya* ghomlaw' ghaH
maSo''eghmo' jIH vavDaj je
ghoqwI' mub mabejtaHvIS maH nubejbe'taHvIS chay' ghomchuq 'e' wIchovmeH vaj maqarlaH
'ej chay' tugh Da ghaH 'e' wIqelchu'mo' wIwuq muSHa'ghachDaj 'oy'mo' bech'a'
pagh meq latlhmo' bech'a'
*'ovelya* Hujlaw' *Hamlet* Do' 'e' qaSmoH qa'lIj QaQ neH bI'IHba'mo' vIneH
vaj DotlhDaj motlhDaq ghaH DacheghmoHlaH bI'Ilmo' 'e' vItul
'ej tugh Suquvjaj
joHwI' vIqaSmoHjaj
*'ovelya* 'eH naDev yIyIt
joH quv maSo''eghneS
lalDanlIj Qu'Heyvetlh DuleghDI' *Hamlet*
ghuy'cha' lalDan vuvwI' DIDataHvIS 'ej tay DItaghtaHvIS veqlargh wIjun je
pIj pIchvam'e' wIghaj net tobqu'
ngaghwI' qevpobDaq bochmoHwI'qoq ngoHDI' qevpob moH law' taS boch moH puS
vIrur je
ta'wIj moH law' SoQwIj vI'IHmoHbogh moH puS
baQa' tep 'ugh
chol 'e' vIQoy
maSo''eghneS joH quv
taH pagh taHbe'
DaH mu'tlheghvam vIqelnIS
quv'a' yabDaq San vaQ cha pu' je SIQDI'
pagh Seng bIQ'a'Hey SuvmeH nuHmey SuqDI' 'ej Suvmo' rInmoHDI'
Qong neH
'ej QongDI' tIq 'oy' wa'SanID Daw''e' je cho'nISbogh porghDaj rInmoHlaH net Har
yIn mevbogh mIwvam'e' wIruchqangbej
QongDI' chaq naj
toH waQlaw' ghu'vam
HeghDaq maQongtaHvIS tugh nuq wInajlaH volchaHmajvo' jubbe'wI' bep wIwoDDI' 'e' wIqelDI' maHeDnIS
Qugh DISIQnIS SIQmoHmo' qechvam
Qugh yIn nI'moH 'oH
reH vaq 'ej qIpqu' bov mayHa'taH HI' Dochchu' HemwI' ruv mImlu' tIchrup patlh 'oy'moH muSHa'ghach 'Il vuvHa'lu'bogh quvwI'pu' tuv quvHa'moH quvHa'wI'pu' qatlh Hochvam lajqang vay'
wa' taj neH lo'DI' Qu'Daj Qatlh qIllaH ghaH
tep qengqang 'Iv
Doy'moHmo' yInDaj bepmeH bechqang 'Iv mISbe'chugh neHtaHghach ghaH ghIjmo' DuHvam Hegh tlha' vay' Hegh tlha' qo''e' tu'bogh pagh
not chegh lengwI'ma' qo'vetlh veHmey 'elDI'
vaj Seng DIghajbogh lajtaHmeH qaq law' latlh DISovbe'bogh ghoSchoHmeH qaq puS
vaj nuch DIDa 'e' raDlaw' ghobmaj qelDI'
'ej pIvmo' wovqu'taHvIS wuqbogh qab 'oH ropmoH rIntaH Sotbogh qech ghom Hurgh
'ej Qu'mey potlh DItulbogh qIl je qechvam
vIDHa'choH nab
*'ovelya* 'IH
toH be' qa''a'pu'vaD bItlhobtaHvIS jIyempu' 'e' yIQIjchoH je
joH QaQ qaStaHvIS Hu'vam chay' bIpIvneS SoH
qatlho' choquvmoHbej
jIchep jIchep
SoHvo' qaqawmeH nobmey law' vISuqta'
qaStaHvIS jajmey vIHevHa' vIneH
qatlhobneS joH
pagh'e' qanobta'
Danobta' 'e' DaSovbejneS joH quv
bIH tlhejmeH 'IHqu'mo' bang QIch DatlhuHbogh vaj waghqu'choH
'a DaH Dajbe'choH pIwchaj
vaj tItlhapqa'
yab quvvaD qutlh nob wagh SuqwI' maghDI' nobwI'
vaj boq vIlagh
tItlhapneS joH
be'batlh Daghaj'a'
nuq jatlhmeH bIHech joH
be'batlh Daghajchugh 'ej bI'IHchugh vaj be'batlhvaD tamnIS DotlhlIj 'IH
joHwI' be'batlh van tamlaH'a' Dotlh 'IH
HIja' teH
batlh rurwI' moj 'IHwI' 'e' qaSmoHpa' batlh HoS DotlhDaj ngo' lon batlh 'ej ngaghwI' quvHa' moj batlh 'e' qaSmoHbej 'IHwI'
ben Hujpu' mu'tlheghvetlh
'ach DaH 'oH tob bov
HISlaH joH Hu' 'e' vIHar 'e' DaqaSmoH
ropmaj ngo' ngejHa'moHlaHbe' batlhqoq
reH He'So'taH ropvetlh
not qamuSHa'
vaj vItojlu'bej
ngaghQo'wI' nawlogh yImuv
qatlh yemwI'pu' DaboghqangchoHmoH
machbe'bogh quv vIghaj
'a HeS Dunmo' jIpum'eghlaHmo' vaj qaq not muboghmoHchugh SoSwI'
HeSmey vIta'qangbogh law' law' HeSvetlh vInabmeH qech'e' vIQublaHbogh law' puS HeSvetlh vIchenmoHmeH 'oghwI' laHmeywIj law' puS HeSvetlh vIta'meH 'ebmey law' puS
yav chal je jojDaq yIttaHvIS mururbogh petaQpu' nuq wIvangnIS
taHqeq maH Hoch'e'
paghma' yIvoq
tugh ngaghQo'wI' nawlogh yImuv
nuqDaq vavlI'
juHDajDaq ghaH joHwI'
ghaHvaD SoQjaj lojmItmey
vaj juHDajDaq pagh latlhDaq je qoH Dajaj
va yIboQ qa'pu' quv
bInaychugh vaj tlhogh nob tammeH maQmIghvam qanob
chuch Darurchugh je bIngaghHa'Qo'mo' peDwI' Darurchugh je bIquvmo' vaj Dapumlu' 'e' DabotlaHbe'
ngaghQo'wI' nawlogh yImuv
Ha' qamej
pagh bInaynISchugh vaj qoH yInay
Qovpatlh moj loDnalra' chay' 'e' boqaSmoH 'e' luSov valwI'
ngaghQo'wI' nawlogh'e' nom yImuv
qeylIS HoS ghaH yIQaw'Ha'
chay' SuchoH'eghmeH taS Doq bolo' 'e' vIQoybej je
'u'vo' wa' qab boghaj 'a tlhIHvaD latlh bochenmoH
SuyItHa' 'ej SureHHa' 'ej SujawHa'
'u' DolmeyvaD Saj pongoyqoq bonob
SuDaHa' 'e' boQIjmeH SujIv 'e' boqap
yIDoH vISIQQo'
not tlhogh wIqelqa'
wa'leS yInlaw'taH tlhogh jeSbogh Hoch'e'
yInbe' wa'chaj neH
choHbe' latlh Hoch Dotlh
ngaghQo'wI' nawlogh yImuv
baQa' DaH Sab yab quv
tej vaj gharwI' je 'etlh jat mIn je
wo' Do' ro' nembatlhna' je
ghaH Dapu' 'ej ghaH rurqangpu' vaj Hoch
ghaH tu'qangpu' tu'wI' Hoch
va DaH Sabchu'
'IpDaj QoQ yuch vISoppu'
DaH jIH'e' 'It 'ej Do'Ha' law' be' Hoch latlh 'It puS
DaH che'pu'bogh meqlaHvetlh quv yIqIm
chuS'ugh mupHa'lu'bogh rur tlhov 'ej taQ
Dotlh Qupqu' 'oSbogh chenchu'wI''e' Qaw'pu' meqHa'ghach QIH
Qugh 'ongvaD jeghtaH
wIgh naQ vIleghpu' 'ej maQmIgh vIleghtaH
'e' 'angbe'ba' neHtaHghachDaj
maw' 'e' tobbe' je QIchDaj ja'pu'bogh chenHa'taHvIS je
qa'Daj nuQtaH vay'
'ej vay'vam retlhDaq 'avmeH ba' Dotlh 'It
chaq Qob 'avwI' Qu' Qubmo' ghaH 'ej nabmo' 'e' vIpIH
Qob vIbotmeH nom jIwuqDI' vIra' tugh vanmaj luqImHa'pu'bogh poQmeH tera'Daq ghoSnIS ghaH
vaj Do' pImmo' yuQ logh je Dechbogh Dochmey je Do' tIqDajvo' qech buStaHbogh lughIm
reH yabDaj mupmo' qechvetlh DotlhDaj motlh'e' QIt HopchoH ghaH
SuH chay' choqeSneS SoH
muSHa'ghachDaj qImHa'lu'mo' chenlaw'pu' 'IQtaHghachDaj mung taghwI' je toH wej 'e' vIHarQo'
nuqneH *'ovelya*
nuq jatlh joH *Hamlet* DaH juja'nISbe'
QIch Hoch wI'Ijpu'
nab yIwIvneS joH
'ach latlh yIchaw' je
'IQ ghaH rInDI' lut SoSvaD 'e' 'angmeH ghaH nIteb ghaH tlhobjaj SoS'e' ta'be''e'
ghaHvaD qu'jaj qunDI'
ja'chuq chaH 'e' vIDaqneSmeH jIlan'egh
ghu'Daj tu'be'chugh SoS vaj nom tera'Daq bIghHa'Daq ghap yIngeH
Daq lugh yIwIv bIvalbejmo'
DaH SIbI' vIruch
maw'DI' ghot potlh tugh QoblaH 'e' wItuch
lut 'ay' wej
lut 'ay'Hom cha'
ta'qach'a' vaS
SoQ'e' DajatlhtaHvIS HIrur
jat yISupmoH
DawI' motlh mIw Dalo'chugh je vaj chetvI'vo' mu'meywIj baH DIvI'may'Duj 'e' vImaS
muD yISIjlaw'Qo' ghop DajoqmoHtaHvIS 'ach Hoch yISeH
SIStaHvIS jevtaHvIS 'ej (chaq vIDellaH) jorlaw'taHvIS QeHHeylIj vIt rurlaw'meH SoQ Dajatlhbogh QeH jot yIchenmoH
va SoQ SangDI' mIybogh toDSaH ral SoQ Qaw'DI' qa'wI' tIch
yavDaq bejwI' teSDu' neH DuQlu'bogh belmoH lut tam luQIjbe'lu'bogh QIch chuS je neH yajlaHmo'
chIch veqlargh DameH lachchugh DawI' vaj vImuHrup
*molor* rurmeH ghaH 'um law' *molor* 'um puS
D1 qaHeQneS
'a yIjotqu'Qo' je bIDachu'meH Duj yIvoqtaH
mu' DalISmeH yIvangchu' 'ej bIvangmeH mu' tIlISchu'
ngeHbej vIt yIwemQo' 'ej wa' qech'e' yIqelchu' DawI' Qu' ta'Ha'qu' lachbogh 'ej wembogh DawI' ben DaHjaj je 'u'vaD qabna'Daj 'angmeH quvvaD batlhna'Daj 'angmeH quvHa'ghachvaD porghDaj moH 'angmeH chay' chenpu' 'ej chay' tlhetlhtaH bov ro lupDaj je chaHvaD 'e' cha'chu'meH Qu''e' ghaj DawI'
bIlachchugh pagh bIyapbe'chugh vaj bejwI' motlh DaHaghmoH 'ach noHchu'wI' DabepmoH neH
bIqeltaHvIS SoHvaD wa' noHchu'wI' yoj potlh law' qach naQDaq latlhpu' yoj potlh puS
va rut lachmo' DawI''e' vIbejbogh 'ej naDqu'bogh latlhpu' vaj QI'yaH
tlhInganna' rurHa'qu' jatlhDI' 'ej tlhInganna' novna' ghap yaghna' ghap rurHa'qu' jay' vIHDI'
'ej Soy'chu'taHmo' 'ej chuSchu'taHmo' chaH chenmeH chaH lam lutlholHa'moHlaw'pu' yo' qIj jonwI' ghojwI'pu'
(lalDan vItIchQo' 'ach) 'e' vIHarqang ghotna' DaHa'qu'mo' DataHvIS chaH
D1 malIS'eghlaw'pu'neS
toH pelIS'eghchu' jay'
'ej chIch ghItlh neH lupabnIS HaghmoHbogh DawI'ra'
toH HaghmoHmeH HaghmoHwI' Hagh ghaH neH 'ej lururmeH bejwI' Dogh Hagh je chaH
'ach HaghtaHvIS Hoch lut potlhmey'e' wej lumuchlu'bogh mIm
Hat 'ej tlhetlhHa'ghach neH Hech Dupqoqvam lo'bogh qoH'e'
'eH peDarupchoH
toH jay' qaH lutvam Qoyrup'a' ta'
ta'be' je
moDmeH DawI' tIra'
moDmoHmeH SuH yItlhej tlhIH
luq joH
naDev jIH joH
*Horey'So* SoH quv law' jIjatlhtaHmeH ghot Hoch vIqIHpu'bogh quv puS
toH joH
qatoj 'e' yIHarQo'
chochepmoHlaH chay' 'e' vIHarlaH jIH
Soj SutmeylIj je Daje'laHmeH yapbe'ba' mIp Daghajbogh yabDotlhlIj QaQ qelbe'lu'chugh
*Horey'So* qatlh mIpbe'wI' vItojqang
va patlh Dogh neH roSnIS HaQchorHey jat
'ej chep'eghmoHmeH mIpqangbogh qIvDaj SIHmoH neH yuDwI'
vaj naDDI' numchoHlu' 'e' tul
wIvlaHmeH ra''eghchoHDI' qa'wI' quv 'ej ghotpu'vo' QaQwI'na' ngu'laHDI' DuwuvmeH vaj DuDoQ Dutu'taHmo'
bIbechlaw'be' Hochmo' bIbechtaHvIS je
DutIchDI' 'ej DunaDDI' San ghu' Hoch DaSIQmeH nIbtaH tlho'lIj
Do'bej ghot ghotvamDaq 'IwDaj qelbogh laHDaj je DuDlu'chu'chugh
QoQ vay''e' maSbogh lIngmeH lu'uymeH San nItlhDu' vaj San chuS'ugh DaQo' batlhghotvam
ghotvam'e' HI'ang
'ej DotlhDaj nong toy'wI''a' puj DaQo'chugh vaj tIqwIj botlhDaq tIq tIqna'wIjDaq ghotvam vIqeng
vaj SoH qaqeng
'a pItlh
DaHjaj ram ta'vaD lutHom muchlu'
vavwI' Hegh ghu' qaja'bogh Dellaw' 'ay'Daj
qatlhob jup
'ay'vam muchlu' 'e' DabejDI' QaptaHvIS tu'bogh qa'lI' laHmey Hoch ta'ma' yIqIm
wa' SoQ lumuchtaHvIS 'ejyo'waw'vo' narghQo'chugh DujDaj DIv reH So'taHbogh vaj qa' quvHa' wIleghpu' 'ej tlhIvmo' qechmey Hoch vI'oghpu'bogh *bajor* mangghom lurur neH
ghaH yIqImchu'
'ej qabDajDaq mInDu'wIj tIH vIpuS je
'ej rInDI' ghu' chay' Dapu' 'e' wIchovmeH cha' yojmeymaj DIchelchu'
lu' joHwI'
lut muchlu'DI' batlhDotlhHey nIHchugh ghaH ghaH tu'lu'pa' vaj lojbogh Hoch vIDIlrup
lutDaq chollI' chaH
pagh vIbuSlaw' 'e' vI'angnIS
*polonyuS* *'ovelya* *roSenQatlh* *ghIlDeSten* latlhpu' je]
pIv'a' qorDu' ghotma' *Hamlet*
pIv pov
ghew vIDa muDDaq ngoSpu'bogh 'Ipmey'e' vISopmo'
to'baj nay' tamlaHbe'
mu'wIj Daqelbe'law' *Hamlet*
mu'wIj jangpu'be' mu'lIj
jangbe''egh je bIH
toH ben DuSaQ'a'Daq DawI' SoH qar'a'
HISlaH 'ej vIqellu'DI' DawI' QaQqu' jIH net noH
'Iv DaDa
*yulyuS* *qaySar* vIDa
monDaq jIHegh
muHeghmoH *beru'tuS*
Sor rur ghaH QamtaHvIS
yol yoSDaq qay' Sor
vaj val HeghmoHwI'Daj
Darup'a' DawI'pu'
HISlaH joHwI'
DaQoyqangchoH 'e' luloS
Ha' naDev *Hamlet*oy jIba'taHvIS HItlhej
Qo' SoSoy QaQ pa' jIghoS
muSIgh peQvetlh 'IHqu'
toH Hu'tegh yItu' jay'
be'oy 'uSDu'lIjDaq jIQot 'e' Dachaw''a'
Qo' joHwI'
'a 'uSDu'lIjDaq nachwIj'e' vIQotmoH 'e' vIHech neH
lu' joHwI'
ngaghlu' 'e' vIHech 'e' DaQub'a'
pagh vIQub qaH
be' uSDu'Daq QotmeH QaQba' qechvam
qech nuq qaH
0 DaHub
bItlhaQ qaH
baQa' tagh QommoHwI''a'lI' jIH
Qombe'chugh taghDu' vaj chay' jaS vanglaH porgh
toH Quchqu'bej SoSwI' 'e' yItu' 'ach Heghpu'DI' vavwI' qaS cha' rep neH
ghobe' qaS loS jarmey joH
Qo' jay' San Quch choS veqlargh
choS SutwIj vItuQHa'
QI'yaH Heghpu' Hu' ta' 'ej qaS cha' jar neH wej ghaH lIjlu'taHvIS
Heghpu'DI' DunwI' chaq batlh ghaH qawlu'taH qaStaHvIS DIS bID'e' net tul je
'ach Hu'tegh yuQmey pongnIS
pongbe'chugh vaj qawbe'lu' 'e' SIQ 'ej qolotlh San ghaj
ghaH qaw bom mu'vam'e' neH "toH va toH va qolotlh pong gho' *Serman*
QIDchuqmeH pachDu'chaj lo'
ta' qIvDu' jojDaq HIvmeH tor ta'be'
ta'be' Hu'moH 'ej mong chop ta'
ta' woH 'ej yavDaq pummoH ta'be'
belpu'mo' Qonglaw' ta' 'e' leghDI' mej ta'be'
tugh 'el loD latlh
ta' mIv teq 'ej roS
ta' qoghDaq tar chagh 'ej mej
chegh ta'be'
Heghpu' ta' 'e' leghmo' pe'vIl SaQ
'elqa' chotwI' tlhejwI' puS je
vIHbe'bogh ta' lomHey lunge'
ta'be' bang moj 'e' nID chotwI'
nayqangmoHmeH nobmey Hev ta'be'
lajqangbe' 'ach tugh latlh muSHa' ghaH 'ej bang DalI'bogh chotwI''e' laj
qaSpu' nuq jay' joH
va HeS'a' 'ong'e'
qaSbeH lot 'e' 'ang 'oH
chay' lut'a' lumuch ghaytan 'e' QIj lutHomvam
'e' luQIjbej nuvvam'e'
peghlaHbe' DawI'pu'
Hoch luchID
De''e' luja'meH nIDbogh DawI'vetlh luQIjqang'a'
HISlaH De' law' luja'mo' QIDtaHvIS chaH
bIQIDqangchugh vaj bIghoj
QIDmeH 'ay'Du'lIj jej ghov QIjwI' 'ej ghojmoH
bIQut bIQut
DawI' lut'e' vIbej
DaH lutmaj 'It wIjeSqu'nIS
checherghchoHmeH matortaHvIS gho'Ij
'ej wej ghonIS
lIHbogh SoQ 'oH'a' QIchvam'e'
Degh mu'tlheghHom 'oH'a' neH
nI'be' joH
vaj be' muSHa'ghach rur
D1 wejmaHlogh bIQ SoD wIb yuQ moQ je bavpu' pemHov Duj wejvatlh javmaHlogh DIS wavpu' maSwovDaj ngIpbogh maS rInpu'DI' ghu' tIq muv tIq bang DIDamo'
Qap je Qu' matay'taH tlhoghvaD muvchuqmo' ghopDu'maj
D2 pIj maS pemHov je leng DItoghqa'pu'jaj rInpa' muSHa'ghachmaj
'ach DaH bIropmo' qaStaHvIS Hu' 'ej Dotlh ngo'vo' bIHopmo' pay' bI'IQtaHvIS QI'yaH
Qugh vIpIH
toH joH jIpIHchugh jIH vaj not DuQIH SaHqu'mo' be'nal loD muSHa'taHvIS je
muSHa'DI' be' 'ej SaHDI' rap
reH Dach cha' pagh (qamuSHa'qu' 'e' Datu') reH lach cha'
ngojDI' muSHa'wI' ngojnIS je SaHwI'
muSHa'chugh nuv vaj HajnIS HonchoHDI'
'ach Hajqu'chugh ghaH vaj muSHa'rupchu'
D1 bangwI' va tugh qalonnIS
puj 'ej ru' porghlaHmeywIj
qo' 'IHDaq leS bImob
'ej Do' DuSaw
D2 not latlh vIlob
not tIqwIjDaq 'urmangvetlh web vIlaj
loDnalqoq cha'mo' jIquvHa'nIS
vaj loD cha'DIch nay neH be'
loD wa'DIch HoHDI'
D2 muSHa'be' be' tlhogh cha'DIch ruchmeH boHDI'
'ej chepmeH neH quvHa''eghmoH
loDnal vIHoHqa' wuSwIj chopDI' latlh
D1 DaH vuD Daja' DaQubmo'
'e' vIHar
'ach nuQbogh nabmaj qIlmeH pIj maghar
leS qawtaHghachmaj wuv DaH nabbogh Duj
vIDqang 'oH boghDI' 'a wIDajDI' luj
DaH naH Qup rur 'oH
SorDaq HuS qar'a'
'ach qanDI' pum 'oH Sorchaj yuvlu'pa'
Qu'maj DIlay'pu'bogh DIlIjnISlaw'
chavvetlh wIchuppu'bogh manongDI' Qaw' SaHQo'ghachmaj manongqu' 'e' wImevmo'
Sorgh'egh Dotlh Quch Dotlh 'IQ joq ral QIt jevmo'
lopchugh QuchwI' vaj SaQnIS je 'IQwI' butlhmo' neH 'IQ yonwI' 'ej Quch 'ItwI'
ru'nIS ngeHbejmaj
vaj Hujbe' wanI' choH mamuSHa'ghach choHDI' je San nI'
wej ngoD wIwuq muSHa'ghach wuv'a' San
pagh San wuv'a' muSHa'ghachvetlh
ghaytan quvHa'DI' potlh Haw' bangDaj
jup moj ghol 'e' SIgh mIpbe'pu'wI' ghaH DuvDI' yol
San toy' muSHa'ghach
vay'vaD chaq 'utbe'DI' reH SaHqang jup
jupqoq buDqu'ghach nge'DI' vay' ghaHvaD tlhobmo' tugh jupna'vo' cheH
'ach taghbogh DaqDaq SoQ vIrInmoHmeH Sanmaj DonHa'moH neHtaHghachmeymaj
reH nabmeymaj Hoch ngeplu'
qech DIghaj 'ach qechvam ghochmey DIghajbe'
toH mub loD cha'DIch DanayQo' DaH 'e' yIQub
'ach HeghnIS vuDvam HeghDI' je loD wa'
D2 yavvo' Soj vISuqbe'jaj Hurghjaj qa' reH jIHvo' Quj leSpoH je nge'jaj moch jIvoqtaH 'ej jItul 'e' mevjaj ngoch bIghHa' Saj'uQ vIpIHjaj qaqbogh ghu' ghomjaj 'ej Qaw'jaj qab Quch ghol Hoch qu' Dat naDev je mutlha'jaj nI'bogh Seng
be'nal vImojqa'chugh jIH
'Ip vIqeng
DaH 'Ip pabHa'jaj
D1 bI'Ipchu'ta'
'ach bang DaH loQ HImej
Doy'choHtaH qa'wI'
Qatlhmo' pem jIDej
vaj DaH jIQong
D2 bIQongDI' jotjaj yablIj
lot vay'mo' qabwIjvo' Hopbe'jaj qablIj
joH DubelmoH'a' lutvam
wejpuH Hoch 'Iprup be'
'ach 'Ip quvmoHbej ghaH
lut DaSov'a'
luja'taHvIS HeS'a'
ghobe' jay'
SaghHa' HeS neH
SaghHa' tar
lutvam pong nuq
"ghew jonwI'"
toH qatlh
wejpuH lutDaj Del pongDaj
romuluSDaq HoHwanI' rur lutvam
*ghonja'gho* ghaH ta'qorDu'loD'e' *batlhISta* ghaH be'nalDaj'e'
tugh Dabej
HeSwI' ghu' luDel
'a maSaHbe'ba'
ta' qa' chun polwI' je ghob'e' muplaHbe'
chut DIlobbogh maH'e' nujoy'laHbe' pe'vIl nov DIv DISmoHbogh tuQDoq'e'
*luqyanuS* ghaH
ta'qorDu'loD ghaH je
lut DaQIjmeH SoH val law' QIjbogh DawI' val puS
SoH bangHeylI' je jojDaq Quj vIQIjmeH jIval je taj'e' vItu'laHchugh
bIjej jawwI' bIjej
tajwIj DajejHa'qangmoHchugh bIboghnISmoH
Dub 'ej Sab QIch
nayqangmeH be' Dup SapmoH QIch
yIchot yIruch SoH
Qu'vatlh Ha'DIbaH qablIj tIlon 'ej yIruch
Ha' bortaS QaQ jablu'DI' reH bIrqu' nay'
D3 qech qIj ghop po' tar 'um poH lugh Samuv
boq jeS 'eb poH
'ej DaH mulegh pagh nuv
ramjep tI boSlu'mo' bIchen molDargh
wejlogh Dungej 'ej DunaDHa' veqlargh
pay' pIvbogh yInDaj lurIHHa'meH jIj je wIchlaHlIj motlh ghIjbogh toDujHeylIj je
patlhDaj nIHmeH ngemHomDaq QottaHvIS ghaHDaq tar chagh *ghonja'gho* 'oH pongDaj'e'
noy lut 'ej romuluSngan Hol pov lo' qonwI'
ta'be' muSHa'ghach SuqmeH mIw'e' tugh Dalegh
Qam ta'
yay'moH ghum muj
joHwI' Dotlh nuq
lut rInmoH
vaj rIQDI' Haw'jaj to'baj jay' 'ej reHjaj pIvbogh Qa'
reH yepnIS vay' reH QongnIS vay' reH ghu'vetlh ngo' wIma'
chavvammo' Qa'pobngemmo' je vISuqbogh
jIcho'meH SanHeywIj'e' wa'leS Sorghchugh SermanyuQngan 'ej mInwIj nIjmoHlaHchugh Haq
vaj DawI'tlhoQDaq ghuv jIHlaH qar'a'
ghuv bID SoH
naQ jIH
loDnI' yISov chIch wo'vamvo' qeylIS lunge'pu' chaH
povpu' voDleH 'a DaH ghaH cho' 'ej DaH wo' che'
bommu'tlhegh DarInmoHlaHchu'pu'
majQa' *Horey'So* lom qa' 'Ip quv law' may'vaD SuvtaHbogh wa'SanID 'utlh quv puS
vItu'chu' joHwI'
tar mIw vIDelDI'
ghaH vItu'chu'qu'
Ha' QoQ
Ha' chuS'ughmey
toH lutmaj parchugh ta' ghaytan vaj
par baQa'
Ha' QoQ
qaH mapeghchuqjaj
vaj gharwI' SoQ naQ vI'Ijqang je
toH ta'
ghaHvaD qaS nuq jay'
pa'DajDaq ghaH ngejqu'lu'law'
chaq ngej ghew
ghobe' joH QeH
bIval 'e' DatobmeH QelvaD bIja'nIS
toH ghew QeHvo' ghaH vIvormeH jInIDchugh jIH vaj ghaytan ngejtaHbogh ghew puq vISepmoHqu'
lumej bIH 'ej tugh chegh tlhejtaHvIS porghDaj yIvqangtaHbogh ghew negh'e'
joHwI' QaQ meqDaq SoQlIj yIlan 'ej pay' Qu'wIj yIjunQo'
ta'be'vaD SoSlI'vaD nuQlu'mo' 'ej qay'lu'mo' SoHDaq mungeHta' ghaH
ghobe' DaH jInaD 'e' vIHechbe'
'ach chojangqangchu'chugh vaj SoSlI' vIloblaH
bIjangchu'Qo'chugh vaj rInmeH mIwvam bIchaw'jaj 'ej jImejjaj
nuq'e' joHwI'
pIvHa' yabwIj
'ach jIjanglaHmeH jInIDqu'qangmo' chaq cho'Ij pagh mu'Ij SoSwI''e' (pongHeyDaj'e' Dalo'pu'bogh)
'a yap
vaj yIjatlhqa'
Dajatlh SoSlI'vaD nuQlu'
jatlh ghaH nuq Da *Hamlet*
Damo' muyay'moHpu' 'ej muSIvmoHpu'
puqloD yaymo' SIvnISbe' SoS
'ach DaH SoSwI'vaD nuq qaSmoH yay'moHlaw'pu'bogh wanI'wIj'e'
pa'DajDaq Suja'chuq neH ghaH bIQongchoHpa'
'e' vIlobchu' wa'maHlogh SoSwI''e' (pongvetlh Dalo') ghaHchugh
latlh tujatlhnIS'a'
joHwI' ben choparHa'
DaH qaparHa'taHmeH je jagh HuH lungaS ghopwIj
pIvHa'moHwI'lIj nuq
Dotlh pIvDaq lojmIt DawaQ juplI'vo' qay'wI'meylIj Dapeghchugh je
qaH qaSHa' cho'wIj
'a qItbe' ghu'vam Qo'noSDaq bIcho'meH ta' woQna' 'oHmo' woQlIj'e'
HIja' qaH 'ach "yaptaHvIS loSpev"
mu'tlheghvam noy DaSovbej
toH chuS'ugh
wa' HInob
'a qapegh nIteb jIjuntaHvIS qatlh choyu'meH bIjonqang
baQa' qaqeSmeH chaq jIvaQ vaQmo' je parHa'ghachwIj neH
'e' vIyajchu'be'
chuS'ughvam Damup'a'
joHwI' laH vIghajbe'
laH vIghajbe' jay'
vImupmeH mIw vISovbe'
mupmeH mIw ngeD law' nepmeH mIw ngeD puS
naQvam DaQoDmeH nItlh tIlo'
tlheghmeyvam DabommoHmeH naQ yIlo'
vaj QoQ 'IH lIng
SuH QoQSeHlaw 'oH Dochvam'e'
'ach 'IHmeH QoQ vIQoDlaHbe'
vImupmeH jIpo'qu'be'
vaj chorammoH
jIH choqelDI' chuS'ugh neH Datu''a'
jIH'e' chomupqang tlheghmeywIj DachuSqangmoHlaw' SengwIj ghogh DabomqangmoH Se'wIj DalISmeH jIH choQoDqang ghogh 'IHqu' lInglaH chuSwI'vam mach 'ach 'oH DajatlhmoHlaHbe'
Qu'vatlh jIH chomupmeH mIw ngeD law' chuS'ugh DamupmeH mIw ngeD puS 'e' DaHar'a'
chuS'ugh vIrur 'e' DaqaSmoH
jISaHbe' Se'wIj DalISmeH SeHlaw'e' Daghaj 'ach choSeHlaw' 'e' vIchaw'Qo'
joHwI' Dujatlh neH ta'be'
loQ Qogh rurbogh 'engvetlh Dalegh'a'
Hu'tegh Qogh rurbej 'oH
'er'e' rur 'e' vItu'
'er Dub ghaj
ghargh ghap rur
ghargh rurbej
vaj tugh SoSwI' vIghoS
muDoghmoHlaw'mo' jIpuQqu'
tugh vIghoS
ngeD "tugh" jatlhmeH Qu'
HImej juppu'wI'
DaH qaS wIchHoSmey rep
DaH Hoblaw' molmey
DaH qo'Daq ngejmeH tlhIchDaj tlhuchlaw' ghe''or
DaH 'aD 'Iw tuj vItlhutlhlaH
'ej jIwemchu' DaH 'e' vIvanglaHmo' vaj HajnIS pem 'oH leghchugh neH
SoSwI' pa'Daq jIjaHnIS
'eH tIqwIj matlhbogh laHlIj yIchIlQo'
not rowIj letDaq 'eljaj *molor* qa'
jInaSjaj 'ach HeS'a''e' vIta'Qo'jaj
tajmey vIjatlhnIS 'ach pagh taj vIlo'nIS
Qu'vaD mIyjaj neH jatwIj qa'wI' je
mu'wIjmo' tuHjaj ghaH
'ach mu'wIj tob ta'wIj'e'
qa'wI' 'eH not 'e' yIlob
lut 'ay' wej
lut 'ay'Hom wej
ta'qach'a' pa'
mubItmoH ghaH
'ej jIHvaD QIHtaH ghu' wej DotlhDaj maw' vIweghtaHvIS
vaj SuH tugh Qu'ghItlhraj vIqeqta' 'ej tera'Daq lItlhejnIS ghaH
Huy'Du'Dajvo' chen Qob qaSDI' rep Hoch
'ej jIH muSumqu' Qobvetlh 'e' SIQlaHbe'bej ta'Dotlh
Qu' wIQorghchu'
je'meH 'ej yIntaHmeH nIwuv ghot law'qu'
Qobvo' DIleHneSmeH lalDanvaD potlhqu' 'ej quvqu' Qu'
reH lotvo' leH'eghmeH yab yoD HoS Hoch je lo' wa' yInwI' neH ram
vaj lo'nISba' qa' Dunqu'
cheptaH ghaH reH 'e' luwuvmo' yIn law' 'ej Do' ghaHmo' chaHvo' Hop QIH
rInDI' ta' poH nIteb Heghbe'ba' ta'Dotlh
luSpet Da
Sumchugh vay' vaj Hochchaj tlha'moH
gho'a' 'ugh rur ghaH
'ej HuD jenqu' DungDaq 'oH lanlu'law'
ghonaQmey tInqu'Daq muvchuq 'ej HuStaH wa'netlh Dochmey ram
vaj pumDI' gho pe'vIl QIH chuS lutlhej chachmey mach Hoch tlha'wI'pu' ramqu' Hoch je
vaj not nIteb vIng ta'
DaH 'ItDI' potlh tugh bepnIS je mangghom 'ej jegh vaj rotlh
tera'Daq nom SulengmeH 'eH peghuHchoH
DaH tlhabqu' Qob qamDu'Hey
DaH Dat yIt
'a tugh qamDu'Daq mIr wIlan
roS gh je mamoDlI'
joH SoSDaj pa'Hom ghoS
wanI' vI'IjmeH tugh HaSta'a'DajDaq jISo''eghneS
ghaH qunqu'bej ta'be'
'ej vuD Daja'pu' 'ej valqu' vuDlIj ja'chuqtaHvIS chaH QIchchaj 'Ijbe'nIS SoSDaj neH qar'a' SoS SIghtaHmo' qorDu'
'ej boQbogh DaqDaq Hoch DaqnIS vay'
vaj qamej ta' quv
qaSuch QongDaq DaghoSpa'
'ej qaSuchDI' SoHvaD De' Hoch vIQum
qatlho' jawwI'
He'So'ba' HeSwIj
va QI'tu'Daq He' je
naDHa'ghach wa'DIch ngo'mo' bechmoH 'oH
loDnI' vIchot
qa''a'pu'vaD jItlhob vIneHqu'bej vIHechDI' 'ach jIluj
vIHechmeH HoSwIj jey jIDIvmeH HoS
'ej cha' malja'vaD vumnISwI' vIrur Qu' wa'DIch 'oH nuq'e' QIt 'e' vIqelDI' jIyev 'ej tugh cha' Qu'vetlh vIqImHa'nIS
loDnI'wI' 'Iwmo' jeD quvHa'bogh ghopvam net tu'chugh je vaj ram qar'a'
chal quvDaq SISbeHba' bIQ peDwI' chIS rurmeH ghopwIj Say'moHmeH yap qar'a' tugh SISbogh bIQ
HeS qabHey puSmeH 'oH qar'a' pung tu'lu'
'ej cha' Qu' ta'meH qa''a'vaD tlhob Hoch qar'a'
wIbotlu'meH mapumruppa' pagh wInoDHa'lu'meH mapumpu'DI'
vaj chal vIbejjaj
pIch vIqIlbej rIntaH
'ach DotlhwIj ngo' vIleHmeH chay' jItlhoblaH
"jIchotmeH jIquvHa' 'e' yInoDQo'
" DuHbe'
mIp law' vIghajchoHmeH jIchotpu'
'ej mIpvetlh Hoch vIghajtaH ta'DotlhwIj Hoch'e' vItulbogh je ta'be'nalwI' je
toH wej HeSDaj pop ghajQo'chugh vay' vaj ghaH noDHa'laH'a' ruvpIn
vIchID pIj qo'vam mIwmey qalDaq ruv lujotlhlaH DIlbogh HeSwI' DeQghopqoq
'ach veqlarghvaD moSlaHlaw' pagh
pa' tojlaH pagh 'oghwI'
pa' ta'meymaj Dotlhna''e' leghlaH Hoch
'ej pIchmeymaj Ho' QuchHey je DIbej net ra'taHvIS mapum'eghchu' net raD
tlha' nuq
ratlh nuq
toH vay' vIchavlaHchugh jIpayDI' vaj vInIDjaj
SuH vInID
Hoch vanglaHlaw' paywI' jay'
'ach nuq vanglaH paylaHbe'wI'
baQa' Dotlh 'It
baQa' Hegh rurbogh tIqwIj qIjqu''e'
baQa' qa'wI''e' jonlu'law'bogh
bItlhabqa'meH bInoghDI' vaj Dubaghqu'choH jonwI' jan
HIQaH boQqa'pu'
SuH jInIDqu'jaj
peSIH qIvDu'wIj mul
baS tlhogh Daghajlaw' tIqwIj
yItun 'ej ghu Somraw yIrur
tugh QaQjaj Hoch
DaH jIHvaD ngeDqu' Qu'
DaH tlhobtaH ghaH
vaj DaH vIta' yo' qIjDaq Suvjaj ghaH
mIwvammo' bortaSwIj vIchav'a'
vavwI''e' HoH taHqeq
puq latlh ghajbe' vav
HoHpu'mo' taHqeqvetlh yo' qIjDaq ghaH vIngeH
vaj ghaHvaD boQ vIDIllaw'
luj bortaS jay'
vavwI''e' chotmeH merDI' pI' vavwI' 'ej Suvrupbe'
HeS yembogh payta'meH 'eb SuqlaHbe'
'ej lomDaq jach pagh vaj
chay' ghaH lulajpu' yo' qIj negh pa' pawDI' vaj 'e' luSovlaw' chaH pagh latlh je
'ach ghob nuq wIHar 'ej chay' yo' qIj wIloy net qelchugh vaj DaH ghaHvaD 'ughlaw' ghu'
'ach DaH bortaS vISuqmeH vIHoH'a' qa'qoqDaj Say'moHtaHvIS
vIHoH'a' yo' qIjDaq tlheDmeH ghuHDI' ghaH 'ej 'umDI'
Ha' 'etlh qaroQ
Qu' naSvaD tugh qalel
chechDI' pagh QongDI' vupDI' pagh QongDaqDaq qorDu' ngaghwI' HeSbelmey tIvtaHvIS SuDtaHvIS ghartaHvIS ta' vay''e' vangDI' ghe''orvo' qa'Daj pollaHbe'chugh ta'vam
'ej qaSDI' ta'vam 'eb SIbI' yImagh
DaqIpDI' chalDaq pupqu'jaj qamDu'Daj
vaj webmo' 'ej He'So'mo' qa'Daj non ghe''or'e' rurbej ghe''or ghoStaHvIS
muloStaH SoS
qa'lI'vaD wej bIlImmeH ghobHergh Danoblaw'
'ach bIHegh 'e' mIm neH
puv mu'meywIj 'ach bIngDaq ratlhtaH yab
mu'mey DorQo'DI' yab QI'tu'vo' ngab
lut 'ay' wej
lut 'ay'Hom loS
ta'be' pa'Hom
naDev tugh chol
SuH ghaH yIqunqu'neS
yIja'neS "tlhIvqu'pu'mo' QujlIj taQ luSIQlu'Qo'
'ej SoH QeHtuj je botlhDaq jIQampu' 'ej qayoDpu' yoD DaraDmo'
" naDev jItam'eghmoH
qatlhob joHwI' ghaHvaD yIvaQ bIjatlhDI'
DIch yIghaj
'ej HIHonQo'
chollI' ghaH
toH SoS qay' nuq
*Hamlet* vavlI' Damawqu'bejpu' SoH
SoS vavna'wI' Damawqu'pu'neS SoH
Ha' Ha'
bIjangDI' Doghlaw' jatlIj jay'
va va
bIyu'DI' mIghlaw' jatlIj jay'
toH *Hamlet*
qalIjta'be' joHwI'
ta'be' SoH
loDnallI' loDnI'qoq be'nal
SoSwI'Hey SoHlaw' je
baQa' nIvuvmoH lobmoHwI' tugh 'e' vIpoQ
naDevvo' bIvIHchoHbe'
'ej bItlheDbe' HotlhwI' vIchenmoHpa'
HotlhwI'vetlhDaq tIqlIj Somraw DaleghlaH
DaH nuq Davangqang
jach'a' 'er
DaH Hegh ghaH
'e' vISuDmeH DeQ vInobrup
nuq Data'
va ta' ghaH'a'
chav boH chav ralqu' je Data'
chav ral
'ej mIghmo' chavwIj HeSlIj rurlaw' 'oH
ta' HoHlu' 'ej loDnI'Daj naylu' je
ta' HoHlu'
mu'tlheghvetlh vIjatlhbejneS
qoH puj qoH boHqu' nISbogh qoH Qapla'
mochlI' SoH 'e' vIHar qaleghchu'pa'
SanlIj yIlaj
De' pegh DaSovqangDI' vaj chaq Do'Ha' DaH 'e' Datu'
ghopDu' DaqIptaHmo' tIQopmoHQo'
DaH tIqlIj'e' vIQopmoHnIS
vIQopmoHbej Somraw Hap ghajchugh 'oH 'ej pay 'oH wej 'e' nISqu'chugh 'ej botchugh Dotlh motlh quvHa'qu' tIqlIj letmoHpu'mo'
HeS nuq vIta'pu'mo' mupummeH rIntaH chuS jatlIj tlhIvqu' 'e' DangIl
ta' mIghqu'
quvmoH 'ej tuHlaH batlhmaj 'e' ghItlhHa' 'oH
ngeb matlhwI' Hoch 'e' maq
bang Quch chun 'IHvo' Hommey ghegh teqDI' tam naDHa'ghach Degh
tlhogh 'Ipmey nepmoHmo' SuDwI' 'Ip rurchoH
paywI' tay'a' porghvo' qa''e' yaHmoHbej ta'vetlh
'ej verengan ghItlh neH moj je lalDanmaj quv
wew chal je tuHmo'
va ta'vetlh qelDI' Haj je yuQmaj Sub
'IQmo' tlhoQ'a'vetlh mIn San bIjHey pIHlaw'
va lIH'eghtaHvIS chuS 'ej buQ ta' nuq
naDev 'eH Deghvam Deghvetlh je yIlegh
DeghmeyDaq cha' loDnI'pu' HotlhmeH 'oghlu'
Huy'vamDaq ba' batlhna' 'eH 'e' yIlegh
qeylIS Quch
*ghorqon* jIb
ra'meH 'ej buQmeH veSmey joH'a' mIn
Qumbogh qa''a' 'uS chal yuvbogh HuDDaq ghoSmeH moDta'DI'
chenchu'mo' ghaH 'ej joDaj DuDlu'chu'mo' loDna' ghaH qo'vaD 'e' lu'olmeH woQ lunoblaw' qa'pu'
loDnallI''e' ghaHpu'
tlha'wI' yIqIm
DaH loDnallI''e' ghaHtaH chovnatlhvetlh'e'
loDnI'Daj pIvqu' ngejmeH pomrop tIr'etlh Da
mIn Daghajbe''a'
HuDHeyvam 'IH DalonDI' Debvetlh moHDaq bIrorchoH'a' 'ej pa' bISopqang'a'
mIn Daghajbe''a'
net HarQo'
DotlhlIj qan'e' SIchlu'DI' jot 'ej HemHa'nIS reHpu'bogh 'Iw tuj 'ej chay' noH yab 'e' lob
'ach ghotvamvo' ghotvetlhDaq gho'ta'meH qatlh noHqang yab
bIQublaHbe'chugh vaj bIvIHlaHbe' je
'ach bIQubmeH laH roSHa'moHlu'law'
Qaghchugh je maw'wI' 'ej vay' yab che'chugh je valHa'ghach jay' vaj pIm ghotpu'vam tugh net ghovba' je wej lojchu'mo' wIvmeH laH Hoch
Dutojpu' veqlarghHey 'Iv "leghbe'bogh wIv" DaQujDI'
QIpqu'meH mISlaHbe' HotQo'bogh mIn bejQo'bogh nItlh joq cha' teSDu''e' joq ngaqQo'bogh mIn nItlhDu' joq wa' ghIch'e' joq ngaqQo'bogh Hoch nochDu'lIj 'ay'Hom rop joq
qatlh bIDoqQo' Dotlh tuH
lotlhtaHbogh ghe''or chuQunbe' HomDu' DaqIQmoHchugh vaj meQlI'bogh Dotlh QupvaD weQ rurjaj batlh
'ej qulDajDaq neH tetjaj
vaj petuHQo' lIraDDI' 'IwlIj tujqu' ngaghqangmeH meQtaHmo' je SISbogh chuchHey ngaghwI'Du' toy'taH neH meqlaH
'eH Hamlet yIjatlhlI'be'
qa'wI' lutu'taH mInwIj DaraDmo'
ghItlhmey qIjqu' Sub vIlegh
bIH Say'moHlaH qoj teqlaH pagh
QongDaq ghIHqu' porghbIQ He'So'Daq yInlu' neH
naDHa'ghach'a'Daq yIQlu'
targh puchpa'Daq yachchuq 'ej chopchuq
jIHvaD yIjatlhQo'
teSDu'wIj 'elDI' mu'vam taSmey Da
yImev neH *Hamlet* 'IH
chotwI' mIghwI' je
toy'wI''a' neH ghaH
wa'ben loDnallI' Dun bID bID vatlhvI' ghaHbe' je
qoH voDleH ghaH
chIch wo'vaD qumvaD je nIHwI''a' Da beQwI'vo' ta'mIv wagh'e' nIHpu'DI' yopwaHDajDaq 'oH So'
tera' voDleHqoq Da neH
HIboQ 'ej DungwIjDaq telDu' tIpuvmoH chal'a' 'avwI'pu'
nuq DaneHneS joH
QI'yaH DaH maw'
moDHa'bogh puq DaqunmeH DaH bIchol qar'a'
loSqu'mo' 'ebwIj DotlhwIj nong je HajmoHbogh Qu'wIj pav Dara'pu'bogh vImIm neH
Ha' yIja'
Qu' yIlIjQo'
jejHa'choH neHtaHghachlIj
vIjejqa'moHmeH neH qaSuch
SoSlI'Daq Danqu' yay'meH Dotlh
Suv'eghbogh qa'Daj 'It yInIS
porgh pujDaq HoSqu' qech Qobqu'
ghaHvaD 'eH yIjatlh
nuqneH joHwI'
baQa' nuqneH Do'Ha'wI'
logh chImDaq neH mInDu' DaQeqlaw'taH 'ej pagh porgh ghajbogh muDvaD neH bIjatlh
mInDu'lIjDaq jotHa'qu' bejbogh qa'lI'
'ej Qongbogh negh pay' ghumDI' Dalaw' jIblIj
QottaHvIS yInchoHlaw' porgh'ay'vetlh buD yay'law' 'ej QamchoH 'oH
yIjot puqwI' quv
tujlI' 'ej meQlI' QeHlIj
DaH meQHa'meH QeHlIjDaq tuvbogh bIQHey yIghomHa'moH
nuq'e' Dabej
yIqIm neH
chIS 'ej qej
muvchuqmo' porghDaj Qu''e' Hechbogh je vaj naghmey ra'DI' je lujangqangbej
'eH HIbejQo'
Qu' Sagh vIHechtaHbogh DachoHlaH vupmoHlaHmo' Dotlh DaDabogh
jIvupDI' loj jIvangnISmeH qab qu'
'ej pumnIStaHvIS 'Iw chaq pum mInbIQ
'IvvaD QIchvam Dajatlh
pagh Dalegh'a'
'ej Doch Hoch tu'lu'bogh vIlegh
pagh DaQoy'a' je
maH vIQoylaH neH
Ha' pa' yIqIm
Ha' So''eghtaHvIS mej
yIntaHvIS Sutmey tuQbogh tuQ vavwI'
DaH mej ghaH
DaH lojmItDaq mej
wanI'vam 'oghbejpu' yabqechlIj neH
HoSDo'Hey chenmoHmeH reH po' Dotlh maw'
tIqlIj rur tIqwIj Se'Daj moDmoHbe'mo' 'ej pIvmo' QoQDaj
maw'pu'be'neS QIchwIj
'ej ghu' vIja'meH mu' vIjatlhqa' mu'vetlh pabbe'nIStaHvIS Dotlhqoq maw'
SoS quv yIquvmoH
SoHvaD jatlh Dotlh maw' 'ej jatlhbe' HeSlIj qa'lI'Daq 'e' maqmeH DunaDbogh Herghvetlh yIngoHQo'
Daq ragh'e' So' neH 'ej yoD 'oH porghlIj ngejtaHvIS rolIj QanHa'lI'bogh quvHa'ghach yuD'e' 'oH leghlu'be'taHvIS
chalvaD yIDIS
qaSpu'bogh ta' tIpay
qaSbeHbogh ta' tIjunchoH je
'ej webqu'meH nov tI bIHDaq chorDI latlh yIlanQo'
toH SoS jIquvqanglaw' 'e' yIbIjQo'
bIjQo'meH HeSvaD tlhobnISlaw' je batlh reH pI'taHvIS tlhuHHa'bogh bovvam
'ej HeS vor batlh net chaw'meH naDnIS je
va *Hamlet* jIHvaD bIDDaq tIq Dachevta'
Ha' bIDDaj qab yIwoD
bID latlh Dapolmo' bIquvtaHmeH yIyIn
'ach SoS vavloDnI'wI' QongDaqDaq yIjaHQo'
wej quvvam'e' Daghajchugh vaj yISuq
mIwmeymaj motlhmoHmeH veqlarghHey Da 'ej qay' 'e' tlhojbogh laHmaj Sopchu'lI' tIgh buD
'ach Qu'vamvaD QI'tu'ngan Da 'oH QaQbogh 'ej quvbogh ta' DIvangtaHmeH HIp mop joq nob je
tuQmeH ngeDqu' bIH
DaHjaj ram yIngaghQo'
bIngaghqa'Qo'meH 'eb latlhlIj ngeDmoH ghu'
tugh ngeD 'eb Hoch
Duj'e' ben ghItlhbogh Sanmaj choHlaHlaw' ghu' motlh
vaj veqlargh'e' Do' SevlaH 'oH pagh ghImmeH rIntaH merqu' HoSDaj
toH Qapla'
DunaDchoH bortaSqa' DaneHDI' chonaDqa' 'e' vItlhob
jaw HoHvam'e'
'ach SanvaD belmoHlaw' wanI'vam
SanvaD vIbIjlaw' 'ej mubIjlaw' lomvam
vaj SanvaD 'oy'naQ 'oy''utlh je vIDa
lomvam vIlan
'ej ghaHvaD Hegh vInobmo' jIbechnIS
qaboQmeH neH qabuQ
DaH qaSnIS Qugh 'ach Do' lot latlhvaD SuQ
'ach wa' mu' latlh vIja'neS
nuq vIvangnIS
not Qu' vIDelchoHbogh tIvangbej
'eH QongDaqDajDaq Dutlhu'qa'moH ta' ror
bIngaghqangmeH qevpoblIj qIp
"ghghgh" jatlh
'ej wuSlIj chopmeH ghIHDI' monglIj'e' yachmeH ghaH nItlhDaj webqu' lo'taHvIS ghaHvaD ghu' naQ DayajmoHlaH 'e' pon maw'be'taH DotlhwIj 'ach jImaw'law'meH jI'ong
ghaHvaD 'e' yISovchoHmoH
chIch yIntaghvo' targhna'vo' ghu'vetlh potlh qelnISbogh peghba'Qo' ta'be'nal 'IH ta'be'nal quv ta'be'nal valqu' je
not peghba'
yab peghDuj je yIlobQo'
qach DungDaq mo' yIpoSmoH
Haw'meH puvjaj chalHa'DIbaHmey
'ej qoH noy yIDa
bIngongmeH mo' yI'el
'ej ghorjaj monglIj bIpuvchoH 'e' DanIDDI'
tlhuHmeymo' chenmo' QIchmaj 'ej yInmo' chenmo' je tlhuHmeymaj vaj DIch yIghaj QIchlIj choja'pu'bogh vIja'qa'meH yInlaH pagh tlhuHwIj
tera' vIghoSnIS
va QI'yaH vIlIjpu'
SoQtaH pum peghghItlh
'ej ghItlh luqeng cha' DuSaQjupqoqwI'
vIvoqchugh vaj verengan'e' vIvoqrup
HewIj luHuvmoHlI' 'ej tojbogh nabvaD muDevlI' chaH
toH ruchjaj
tlhaQbej ghu' ngattej luSangchu'DI' jorwI'mey lanbogh
'ej chIch jorwI'meyHeychaj bIngDaq 'och vIchenmoHbe'chugh 'ej ngat latlh vIyongDI' maSDaq chaH vIjorbe'chugh vaj jItlhIb
Do' vaj wa' Qu'vaD muvchuqDI' 'och nIb
mumoDnISmoHlaw' ghotvam
retlh pa'HomDaq chorDu' vIteq
Qapla' SoS
DaH tam 'ej Sagh 'ej peghqanglaw' qeSla'
'ach yIntaHvIS jawbogh Qovpatlh Dogh Da
Ha' jaw
DaH rInjaj ja'chuqghachmaj nI'
Qapla' SoS
lut 'ay' loS
lut 'ay'Hom wa'
ta'qach'a' pa'
vay' Qumbej tlhutlhmeylIj Datlhovqu'bogh
nuqDaq ghaH puqlI''e'
loQ maHvaD Daq yIjegh
ghuy'cha' joHwI' DaHjaj maQmIgh vIleghpu'
toH nuq *ghertlhuD*
chay' *Hamlet*vaD tlhetlh ghu'
SuS ngeng joq Da 'Iv HoS law' 'Iv HoS puS pay' 'e' lughoHDI'
maw'qu' ghaH
chut lobHa'taHvIS yab Sab HaStawIj bIngDaq vIHchoH vay' 'e' 'IjDI' pay' 'etlhDaj lel
pay' jachchoH "ghew
vIH ghew
" 'ej qechvam mulqu' najtaHvIS qup QaQ'e' wej leghbogh HoH
'ej jIHvaD qaS je jISaHchugh neH
Hochma' nubuQtaH tlhabDaj
SoH jIH je Hoch je buQlI' ghaH
chay' 'Iwvam chav vIQIj
tugh jIH vIpumlu'
QupwI'vetlh maw' vISeHmeH 'ej vIvuSmeH Hochvo' vIweghlI'meH leSSov vIghajnIS
'ach vIparHa'qu'mo' chay' ghaH vIvornIS 'e' vIyajQo'
rop web SIQwI' vIDapu'
Sovbe'meH latlh chIch ropvaD yInwIj 'Iw vIje' je reH vIpeghtaHvIS
DaH nuqDaq
lom HoHbogh rIntaH lellI'
tlhIlHey ramDaq baS SuD'e' rur ghaH 'ang'eghchu'mo' batlhDaj maw'taHvIS je ghaH
paymo' SaQtaH ghaH
va *ghertlhuD* Ha'
HuD HotchoHDI' pemHov nom naDevvo' vIngeHnIS
'ej HeSchavvam mIgh vIngoy'meH 'ej 'oH vIQIjmeH ta' Dun po' vIDanIS
'eH *ghIlDeSten*
juppu' boQwI' tImuvmoH
*polonyuS* HoHpu' *Hamlet* maw'taHvIS
'ej SoSDaj pa'vo' lomDaj jotlhpu' ghaH
Ha' ghaH yInej
'ej chIrghHomDaq lomDaj yIqeng
Satlhob SIbI' pemoD
*ghertlhuD* juppu'ma' valqu' Hoch wISuch
'ej qaSpu' nuq Do'Ha' 'ej nuq vIHech tugh chaHvaD 'e' vISovrupmoH
tar vo'laH pum'a' pum tlhuplu'DI' je yuQ bIngvo' 'oH QeqDI' je
'ej qarmo' baHtaHvIS voDleH puSwI''a' Da
DaH pongwIj'e' Do' tu'laHbe'jaj pum 'ej muD neH mupjaj 'oH rIQmoHbe'ba'mo'
Ha' bang
jotHa'qu' qa'wI' Doy'
lotmo' jI'It
lut 'ay' loS
lut 'ay'Hom cha
ta'qach'a' pa' latlh
vIpegh vIpol
roS ghIl *Hamlet*
joH *Hamlet*
'eH jay'
*Hamlet* jach 'Iv
toH mughoSlI'
lom'e' joHwI' nuqDaq Datlhappu'
lam mojqa' vIchenHa'moHmo' wutlhDaq DornIS no'
naDevvo' wItlhapmeH 'ej chIrghHomDaq wIlupmeH DaqDaj yIpeghHa'
'e' yIHarQo'
nuq HarQo'
Satey' jItey''eghlaHbe'taHvIS Qo'
'ach wem je ghu'vam yu'DI' HerghwI' chay' jangnIS ta'puqloD'e'
choqelDI' HerghwI''e' Datu''a' joHwI'
HISlaH qaH ta' DIb HoS woQ je Qay 'oH'e'
'a reH ta' lutoy'chu' 'utlhpu'vam'e'
nuj HeHDaq chaH pol Sopbogh mughato' rurtaHvIS DaH vup 'a nem ghup
De' DaQay 'e' poQDI' Du'uy neH 'ej HerghwI' bIQaDqa'
qayajbe' joHwI'
vaj jIQuch qoH qoghDaq Qong QIch 'ong
lom Daq ghopeghHa' 'ej ta'Daq ghotlhej
ta' tlhej lom 'a lom tlhejta'be'
ta' qa' 'oH
ta' joHwI'
'oH Doch'e'
'oHDaq HIqem
Dejpu'bogh Hov rur qablIj
lut 'ay' loS
lut 'ay'Hom wej
ta'qach'a' pa' latlh
ghaH lom je Samta'meH toy'wI' vIngeHta'
reH Qobqu' ghotvam weghlu'pa'
'ach ghaHvaD chut HoS Hoch vIlo'laHbe'
ghaH luparHa' matlhbe'taHbogh ghom'a' wIvbe'mo' yojchaj
wIvlaH mInchaj neH
'ej wIvDI' chaH HeSwI''e' bIjlu'chugh vaj bIj lunoH 'ej HeSDaj lunoHQo'
pay' ghaH vIghImnIS
'a vIta'taHvIS wo'Daq jIrojmeH 'ej jImaylaw'meH vIqelchu' jImoDbe'taHvIS
net HarnIS
ghurqu'DI' rop 'ej SuQDI' vorlu'meH SuQnIS je Hergh
SuQbe'chugh vaj not vor
qaS nuq
joH nuqDaq lomvetlh So'pu' wej ghaHvo' 'e' wISovlaH
nuqDaq ghaH
HurDaq ghaH joH
ghaH 'avlu'
chay' jura'neS
'eH jIHDaq ghaH yIqem
SuH *ghIlDeSten*
naDev joH quv yIqem
'el *Hamlet* *ghIlDeSten* je
SuH *Hamlet* nuqDaq ghaHtaH *polonyuS*'e'
pa' Sopbe' ghaH 'a ghaH Soplu'
ghaH DantaH wutlhwo' ngIvbogh ghewQaS'e'
wo' pIvDaq ghatlhlaH ghew ruv neH
mapI'meH Ha'DIbaH Hoch wIpI'moHtaH maH 'ej maHmo' pI'taH ghewmey
Soj Sar bIH ta' pI''e' qoH lang'e' je
cha' nay' chaH qaStaHvIS wa' 'uQ neH
ghu' Qav 'oH
va va
chaq ta' Soppu'bogh ghew'e' lo' wamwI'
chaq ghew Soppu'bogh to'baj'e' jon wamwI' 'ej Sop ghaH
nuq choyajmoHmeH bIHech
paghHey 'a chay' petaQ burghDaq DuvlI' ta' chaq 'e' qa'ang neH
nuqDaq ghaHtaH *polonyuS*'e'
pa' SammeH vay' yIngeH
pa' Sambe'chugh nejwI' vaj latlhDaq DaSammeH yIngeH'egh SoH
'ach qaStaHvIS jarvam DaSambe'chugh tlhonlIj mupbej ghaH 'ochDaq bIyItDI' 'ej vaSHom Da'elDI'
pa' yInejlI'
Supawpa' mejbe'
'eH *Hamlet* Qob DaSIQchoHbe'taHmeH
'ej DaSIQbe'taH 'e' vIQorghqangbej HeSchavlIjmo' jI'IQqu'taHvIS je
DaH naDevvo' Dunge'nISmoHbej HeSlIj
'ej tugh bItlheDtaHvIS qul Do DaleHnIS
vaj DaH yIghuHchoH
jaHbeH DujHomlIj
ma'beH pIvghor
nIloSlI' je tlhejwI'lI'
tera'Daq ghuS
toH "maj" Dajatlhqang nabwIj DaSovchugh
lubejbogh lInDab naw'wI' vIbej
'a Ha' tera'Daq
qamej SoSoy
DuparHa'bogh vavlI''e' jIH *Hamlet*
loDnal be'nal je chaH vav'e' SoS'e' je tay' loDnal be'nal je porgh vaj SoSwI''e' SoH
Ha' tera'Daq
toH "maj" Dajatlhqang nabwIj DaSovchugh
lut 'ay' loS
lut 'ay'Hom vagh
Qo'noS ta'qach'a' pa'
ghaHvaD jIjatlhQo'
tlhobqu' ghaH
mISchoH je
'ej yabDaj Dotlh vuplu'bejneS
jIHvo' nuq'e' neH ghaH
reH vavDaj buS ghaH jatlhtaHvIS
reH jatlh "qo'vamDaq tojlu' 'e' vItu'"
"toH" jatlh
'ej tIqDaj qIptaH
pe'vIl Quj jeSQo'
jatlhDI' chay' Hech QumHa'bogh mu'meyDaj net wuqlaHbe'
Dap jatlh
'ach tlholmo' Dapvetlh vaj yajchoHlaw' 'IjwI'pu' chaHvaD motlhDI'
QIchDaj luQeq 'ej qechmeychaj Qochbe'meH mu'Daj ngongHa'
'ej mu'Daj tlhejtaHmo' nach mIn je porgh je mIwDaj vaj qech Hoch luQubmoHlaH
DIch lughajbe'bej qechvetlh 'ach pIch lughaj 'ej pIchvaD Soy' 'ej QIHlaH
ghaHvaD bIjatlhnIS
QuSmey Sepbogh yabvaD loyHa'moHlaH
loyHa'DI' maHvaD QoblaH
va reH yemwI'vaD qaStaH
qa'wI' 'oy'vaD lot Doj lununglaw' ghu' Hoch ram
'ej joy' qaD
DIvDI' ghot pIHqu' ghaH
HeS ghItlhDaq Hotlh'egh
'ej QotlhvIplu'taHmo' ghot DIv tugh Qotlh'egh
SuH nuqDaq 'IHbogh rIntaH Qo'noS be''a'
nuqneH *'ovelya*
leS chay' bangna' vIngu'
chay' latlh vIDoH
lengmIv baSDaS je tuQ
naQ'a' tIq woH
QI'yaH be' quv nuq HechlI' bom Daja'bogh
'o nuqjatlh
Qo' Qo' yIqImneS
Heghpu' 'ej lojpu' joH
Heghpu' 'ej loj
DaH porghDajvo' Haw' qa'
yo' qIjDaq Qoj
'a SuH *'ovelya*
lomSut chIS law' peDwI' chIS puS
QI'yaH naDev yIbej
luDech SuvwI'na' Degh
'a molDaj retlhDaq jach pagh wuS ghaH mupDI' rIntaH Hegh
nuqneH be' 'IH
'ov toH Duvanjaj qeylIS
pIpyuS moj yonmang puqbe' net ja'
DaHjaj Dotlhmaj DISov 'a leS Dotlhmaj DISovbe'
Dunumjaj qeylIS
vav buSba'
qechvam qelqa'lu'neSQo'jaj 'a nuq Hech lutlhobDI' yIja' neH
DaHjaj 'oH bangjaj'e'
SuH 'eqDI' po qaghoS
'ej batlh tugh mamuSHa'chuqmeH lojmItlIjDaq jIloS
vaj Hu'DI' loD lojmItDaq joD
vay' tuQpa' poSmoHpu'
'el be'
bel be'
'ej be'batlh woD
tugh be' lon loD net tu'
*'ovelya* 'IH
Su' qatIchqangbe' 'a vIrInmoHbej
ghay'cha' chomaghpu'
qatlh choHup
ghay'cha' yItuH
ngaghmeH loD Qup pIj tojqu'rup
'ej pIch lughajbej chaH
jatlh be' qanay not 'e' DanIS chongaghpa' 'e' cho'ol
jang qar 'a vIDIS vIlay'taHvIS qangaghmeH wej chochol
ghorgh qaSchoH Dotlhvam
'ov QapmeH ghu' QaQ vItul
'ach wutlh bIrDaq lulan 'e' vIqelDI' jISaQ 'ej jaS jIvanglaHbe'
SovchoHbej loDnI'wI'
vaj Satlho' batlh tuqeSpu'mo'
Ha' tlhejwI'wI'
revan be'pu' revan be'oypu' revan revan
yItlha' yISum
yI'avchu' 'e' Satlhob
Dotlh 'IQqu' tar wISIQ
va vavDaj HeghDaq Hal ghaj ghu' naQ
'ej QI'yaH
*ghertlhuD* *ghertlhuD* nucholDI' lot nIteb ghoqwI' DaQo' bIH
nawloghDaq ghomlaw' jay'
wa' vavDaj HoHlu'
cha' tlheD puqlI'
ruvna'vaD ghaH vIghIm pe'vIl 'e' raDmoH ghaH
wej jorrup wo'
jeDlaw' 'ej roplaw' QubtaHvIS 'ej joSDI' Heghpu' *polonyuS* QaQqu' 'e' lubuSmo'
'ej ghaH wImolDI' mapo'Ha'bejpu' Qu'vetlh wIpeghmo' 'ej wImoDmoHmo'
Do'Ha' je yabDajvo' *'ovelya* wavlu'
meqlaHDajvo' ghaH wav je
yaHDI' laHvetlh Ha'DIbaH neH Dep Hotlhlu'bogh ghap maH
ghu' Qav'e' ram law'be' latlh ram puSbe' romuluSvo' chegh loDnI'Daj pegh'eghtaHvIS
ghaH je' Dotlh yay'qu'
'engmey SepDaq pol'egh
'ej chay' Hegh vavDaj qan 'e' Delbogh SoQmey luja'lI' teSDaj ngejbogh petaQ'e'
ngoDna' ghajbe'mo' chaH vaj 'utDI' ghu' qoghmeyDaq jIH mupummeH Hoch lu'oghqang tlhIvqu'taHvIS chaH
Hu'tegh *ghertlhuD* bang DIHom ghorwI' rur ghu'vam
'ay'wIj law'Daq jIHeghqu'meH mumuptaH
chuS nuq
nuqDaq 'avwI'pu'wIj
lojmIt lu'avjaj
qaS nuq
yItoD'egh joH
veHHeHDaj juSDI' vupQo' bIQ'a' 'ej puHmey SoDmeH moDbej
'utlhpu'lI' SoDqu' je *layerteS* Qup Daw'meH DuHIvDI'
"joH" lujachtaHvIS lupong ghom'a'
'ej chaHvaD chu'law' 'u' bov tIQ lulIjlaw'
tIghmey luSovbe'law'
SoQ Hoch 'olwI' ngaqwI' je Hoch lujuS
'ej jach "mawIvjaj maH
ta' moj *layerteS*
" 'ej 'engmey SovmoH mIvmey ghop je jat je
"ta' moj *layerteS*
mojjaj qaH *layerteS*
jachlI' chaH Quchmo' HeS larghHa'taHvIS
va SuwamHa'bej maghbogh Qo'noS targhmey
lojmIt lughormoHlu'
'eH nuqDaq ta'qoqvetlh
HurDaq peratlh qaH
Qo' joH
'eb HIchaw' juppu'
luq luq
lojmIt yI'av
'eH ta'qoq mIghqu' vavwI' HInob
yIjot *layerteS* QaQ
va jotchugh 'IwwIj 'ay'Hom neH vaj maq 'oH "ben bIboghHa'
vavwI''e' toj SoSwI'
" tlhIvbe'bejbogh SoSwI' Quch chunqu' quvDaq ngaghHa'wI' DeghHey lan 'oH
qatlh *layerteS* tengchaH rur Daw'lIj Dojqu'mo'
'eH *ghertlhuD* ghaH yInISbe' 'ej jIHvaD yIyepQo'
ta' yoDbej San
'ej yoDDI' San bejHa' neH 'urmang 'ej Qu''e' Hechbogh chavlaHbe' 'oH
yIja' *layerteS* qatlh bIQeHqu'taH
*ghertlhuD* ghaH yInISbe'
yIjatlhchoH qaH
nuqDaq vavwI''e'
'ach HoHbe' ghaH
yu'lI'jaj ghaH
qatlh Heghpu'
Hu'tegh jIH vItojlu'Qo'
matlhjaj veqlargh neH
'Ipmey ngaSjaj ghe''or
ghob chut je ghupjaj rIntaH wa' luSpet jay'
yo' qIj bIj Hoch vISIQrup
pavmo' Qu'wIj ghe''or QI'tu' je vIqImHa'
vaj jIHvaD qaSjaj Hoch jay'
'ach DaH vavwI' Heghmo' bortaS vISuqbej
toH Dubotrup 'Iv
mubotlaH neHtaHghachwIj
botlaHbe' qo' naQ HoS jay'
'ej SupmeywIj vIvu'chu'mo' vaj Qapqu' puStaHvIS je bIH
SuH *layerteS* QaQ vavlI' Hegh vIt DaSov DaneHqu'chugh vaj jupDaj jaghDaj je DayotlhnIS'a'
QapwI' lujwI' je Hoch DabechnISmoH DaH SoHvaD 'e' poQ'a' bortaS
ghobe' 'ach jaghDaj neH
'ej jupDaj Daghov'a'
juppu'DajvaD DeSDu' vIpoSmoH
'ej qeylIS SoS vIDarup
chaH vIje'meH 'IwwIj vInobrup je
toH DaH vajna' SoH
puq quv DaDabej
HeghtaHvIS vavlI' qan jIchun
'ej Heghmo' ghaH jIQoSqu'bej
yojlIjDaq baHDI' vItmeyvam vaj mInvaD jajlo' luDalaw'
chuStaH nuq
Ha' QeDjaj yabwIj
Sochlogh mInbIQqutmey mInDu'wIj HoS noch laH je Hoch yImeQjaj
bImaw'taH tugh net DIl
'ej DIllu' rIntaH Huch DIlbogh 'ughDI' law' SoH 'ughDI' puS
SuH wo'maj naDmoHbogh Degh'e'
be' 'IH
be'nI'wI' matlh
*'ovelya* quv
DuH'a' wanI'
Heghpu'DI' loD qan yIn SIbI' Hegh'a' je be'Hom Qup yab
muSHa'taHvIS nong puq
'ej nongDI' Dol muSHa'bogh tlhejtaHmeH wa' 'ay'Daj waghqu' ngeH
molghomDaq porghDaj tlhol luqeng QI'yaH QI'yaH QI'yaH
'ej molDaq SaQlu'mo' chen ngeng
bIpIvjaj Qa'oy
wej Sabchugh yablIj 'ej bortaS chora'chugh vaj SoH chopon DaH law' yab pIv pon puS
"baQa' baQa'" yIbom
'ej "yIra' ghuy'cha'" yIbom SoH
toH QoQ 'IHmoHchu' je QuQ
HoD puqbe' tlhu'moH qalmoHbogh je lagh'e'
DapHeyvam yajmoH law' SoQ yajmoH puS
Dargh qanob
DIch 'oS
DIch yIghajneS bang
Dom qanob je
yoj 'oS
maw'taHvIS ghaH maghojqu'laH
tlhejchuqchu' 'IQmoHbogh qechDaj qawmoHbogh qechDaj je
SoHvaD noSvagh ngat je vInob
'Iw qanob 'ej 'IwHom jInob'egh je
chaq QI'lop vaj nIn wIpong
'IwlIj DatuQtaHvIS DapImnISmoH
Qab vInob
toplIn qanobqangpu' je 'ach ngoS 'oH HeghDI' vavwI'
batlh rInta' ghaH net jatlh
muQuchqu'moHmo' qoreQ 'IH
'It ghaH 'ej roptaH
bech 'ej ghe''or SIQ
'a ghaHvaD bel 'IHwI' je mojlaw' Hochvetlh
naDev not cholqa''a'
naDev not cholqa''a'
Hu' Hegh
SIbI' yIjegh
naDev not cholqa'ba'
peDwI' rur rolDaj chIS
ram qIj rur patlhDaj ngup
DaH yaH
DaH yaH
QI'tu' Da'eljaj qup
'ej SuvwI' Hoch Hugh vIlo'taHvIS qeylIS vItlhob
qeylIS boghomjaj
bI'IQtaHvIS *layerteS* DaH qatlhejjaj
'ej DIbvam HIbotQo'
'a loQ yIDoH neH
juppu'lI' Hoch val vay' DawIvpu'DI' tugh ghu'maj lut lu'Ijjaj 'ej lunoHjaj
'ej DuQmoHmo' pagh DuQmo' ghIHtaH ghopwIj chaq 'e' lutu'chugh yonchu'meH bortaSlIj vaj wo'wIj ta'mIvwIj je yInwIj je Hoch je vIghajpu'bogh qanobrupneS
'a ghIH 'e' lutu'be'chugh vaj yIloS bItultaH jIHvaD 'e' DavangtaHvIS
'ej yonmeH rIntaH qa'lI' batlh jIyeqrup
'a morghmeH chalDaq yuQDaq je jach HeghDaj meq 'ej jachqu' nolDaj moD
HomDu'Daj DungDaq Dach nagh 'etlh je ghItlh je Dach je noltay 'ej Dach SuvwI'na' van
'ej Hochvam QIjlu' 'e' vIpoQ
'ej HeSta'bogh petaQDaq pumjaj taj
HItlhej qatlhob
lut 'ay' loS
lut 'ay'Hom jav
ta'qach'a' pa' latlh
toH jIHvaD jatlhqang 'Iv
yo' negh jawwI'
lujatlh "jabbI'IDmey DIghajlI'
yuQDaq 'Ivvo' van ghItlh vISuq labbe'chugh joH *Hamlet*'e'
'oH labba'pu' pagh latlh
DuHoSmoHjaj qeylIS qa'
DuHoSmoHjaj je ghaH
muHoSmoHbej qaH taHvIS neH wo'
lab tera'Daq Hechpu'bogh Duy'a'
SoH Dungu'chugh *Horey'So* pong'e' qapongmeH vISovmoHlu'bogh
*Horey'So* SoQvam Daqelta'DI' ta' luSammeH ghotpu'vam He yIngeDmoH
ghaHvaD jabbI'ID ghajlI' chaH
loghDaq qaSpu'DI' cha' jajHom nutlha'choH nuH vIDqu' lo'bogh HeS mech Duj
maHaw'meH yapbe'mo' chuyDaHmaj pe'vIl mavaQchoH
HotDI' HIchDalmaj nIteb vItIj
Dujmaj cholHa'choHDI' Dujchaj vaj qama'chaj vImoj jIH pagh latlh je
gharqoqvaD vangtaHvIS lotlhwI' yuDHa' Da chaH 'a gharwI' 'ong Da je SutlhtaHvIS vaj chaHvaD DIb vInobnIS
ta'vaD jabbI'ID vIlabpu'bogh je yIngeH 'ej jIHDaq bIchIj'eghmeH yo' qIj la'Duj pIvlob'e' yIchu'
teSDu'lIj DuQbej mu'mey vIja'rupbogh 'a De'wIj nIch baHmeH 'umchu'be' moy'bI'vam
QIvwIjDaq nIqem ghotpu'vam QaQ
tera'Daq He polba' je *roSenQatlh* *ghIlDeSten* je
chaH qelbogh De' law''e' qaja'nIS
Ha' jup
jabbI''IDlIjvaD He vI'ang
'ej nom yIHev
jabbI'IDvam labwI'vo' De'vam qaqengmo' Do' tugh ghaH choSammoH
lut 'ay' loS
lut 'ay'Hom Soch
ta'qach'a' pa' latlh
jIchunqu' DaH 'e' 'olbej ghoblIj pov 'ej jup vIDamo' tIqlIjDaq cholannIS
Hu' yInwIj wampu' je vavlI' HoHwI' DaH 'e' Da'Ijmo' valbejtaHvIS teSlIj
net QochlaHbe'
'ach jIHvaD ghu' yIQIj chavvam DabIjmeH qatlh bIvangpu'be'
HeS webqu' bIH 'ej Hegh 'oH bIjchaj'e'
bInurmeH 'ej bIche'meH 'ej bIvalmeH bInoDqangqu'bej
toH cha' meqmey potlhmo'
chaq SoHvaD pujqu'law' 'ach jIHvaD HoS bIH
yInmeH *Hamlet* mInDu' neH wuvlaw' SoSDaj 'ej jIHvaD
batlh QIH ghap 'oH ghu'vam'e' ram wIv
toH yInvaD qa'wI'vaD je 'ut ghaH
bavtaHvIS ghoDajvo' Haw'be'ba' yuQ ghaHvo' jIHaw'laHbe' je jIH
meq cha'DIch meqba'Daq peghlu'be'bogh vIngeHbe'nIS ghaH luparHa'qu'ba'taHmo' ghom'a' Qut
parHa'ghachchajDaq ngoSmo' Duy'meyDaj Hap choHmoHwI' luDa
qammIr lurIHDI' chenchoH batlhDeghHey
vaj ghaH puSDI' pu'wIj ghom'a' ghoghHoS luSpetDaq pujqu' tIH
'ej pu'HIchwIjDaq chegh tIH lujmo' vI'wIj
vaj jIHvaD loj vav quv
'Itqu' be'nI'wI' net ral
'ej qun potlhwI' wInaDqa'DI' je vaj bov potlhwI' Hoch qaDlaHchu' be'nI'wI' po'pu'mo' ghaH
'a tugh bortaS vIchav
bortaS DanablI'meH bIQongHa'Qo'
pujmo' 'ej buDmo' HapwIj vaj jItIvlaH rolwIjvaD Qoblu'DI'
'e' yIHarQo'
toH tugh De' chu' Da'Ij
vavlI' vIvuvpu' jIvuv'egh je
Do' ghu'vammo' qaponbej
De' nuq
*Hamlet* jabbI'ID joH
SuH SoHvaD ghItlhvam 'ej ta'be'vaD ghItlhvetlh
qem 'Iv
yo'mang net jatlhneS
chaH vIleghpu'be'
bIH HevDI' bIH munobpu' *tlhaw'DIyo*
yI'Ij *layerteS*
wa'leS chuQunqablIj 'etDaq jISaHmeH qatlhob 'ej qatlhIjpu'DI' pay' jIcheghmeH wanI''e' DuHmoHta'bogh San Do' qaQIj
nuq Hech ghaH ghItlhDI'
cheghpu''a' Hoch latlh
chaq mutoj'a' neH
chaq qaSbe''a' Hochvam
ghItlhmIwvetlh Daghov'a'
nav ghItlhbej *Hamlet*
"nuH vIghajbe'"
ghItlh'o'Daq chel "jImob"
jIHvaD DaQIjlaH'a'
mumISmoHbejneS joH
'a choljaj neH
pay' tIqwIj ropHey vor wanI'vam Do' jIHeghpa' Ho'Du'DajvaD pum vIjatlh "HeSvetlh Dachavta'"
teHchugh ghu' *layerteS*
toH teHlaH'a'
'a ngeblaHbe'ba' je
vaj chIch cholobqang'a'
HIja' joH quv ghaHvaD jIrojmeH chora'be'chugh neH
SoHvaD rojbej yab bortaS Dachavmo'
lengDaj Qu'vo' Haw'law'mo' 'ej DaH 'oH HechlI'Qo'
vaj San mIqta'Daq vIghuSmoHlI'bogh tugh ghaH'e' vIqIch
mIqta'mo' pumnISbej
jaS wIvlaHbe' ghaH
'ej HeghDaj pIch lutlhutlhlaHbe' ghogh vay'
'a nabmaj 'ongqu' pIHlaHbe' je SoSDaj 'ej "bong qaS" jatlhqang
luq joHwI'
qalobrupqu' je nab chavwI' vIDameH Da'oghlI'neSchugh
jIHvaD lI'bej
bIlengtaHvIS nIbuStaH naD joSwI'
'ej Qoy je *Hamlet*
Dojqu'mo' wa' laHlIj
po' 'oH net jatlh
'oH tIqDaj qeHmoH law' laHmeylIj Hoch ghaH qeHmoH puS
'a teH ramba' neH laHvetlh
laHwIj nuq joH quv
SuvwI' Qup mIvDaq naDbogh DeghHom neH
'ach 'ut je 'oH
mop paH je ghajnIS qup 'ej chep 'ej Sagh ghaH 'e' lu'ang 'ej 'um
'ach reHmeH Sutmey tISqu' ghaj vaj Qup net pIH 'ej 'um je bIH
DaH rIn cha' jar nuSuchpu'DI' wa' rIymuS qaH
jItu'pu' 'ej romuluS vIQojpu' lIghchu' chaH
'a lIghDI' qa'pu' SeHlaw' qaHvam yoH
porgh'ay'Daj mojlaw' quS
lupDujHom'e' SeHchu'mo' jo'vetlh vIDqu' QuQHey mojpu'
laH'e' vIpIHbogh juSmo' rIntaH ghaH vaj QoD 'ej jun ghaH 'e' vIDelchu'meH Human vImojchugh je vaj lujbej Qu'wIj
toH rIymuSngan ghaH'a'
*lamoD* ghaH
ghaH vISovchu'
wo' Degh joqwI' je ghaH
toH maHvaD laHlIj chID ghaH
bIHub'eghmeH bIpo'qu' 'ej bIqeqchu' 'e' naDDI' 'ej 'etlhvI'lIj naDqu'DI' tugh jach "chaq vI'Daj rapchugh neH vay' vI' vaj Dunbej 'etlhchaj Quj
DaHay'moHchugh vaj HIvmeH chaH pagh HubmeH chaH pagh tu'meH Soy' wo'Daj 'etlhvaj Hoch ghaH qellu'DI'
" 'ej naDDaj 'IjDI' *Hamlet* tarHey tlhutlhlaw' qeHqu'mo' ghaH
'ej SoHvaD vI'Daj tobmeH SIbI' bIchegh 'e' loS 'ej neHqu' ghaH
ghu'vammo' qaSneS nuq
*layerteS* vavlI''e' DamuSHa''a'
pagh lotHey Hotlhlu'bogh neH DaDa'a'
SaHba' qab QeHqu'
'ach SaH'a' tIqna'
nuq DaghojmeH mu'tlheghvam Dajatlh
vavlI' DamuSHa'be' 'e' vIghojbe'meH muSHa'ghach taghtaH poH
'ach 'e' vISov
'ej qulDaj HatDaj je qIl rIntaH poH
tobtaHmo' ghu'mey vaj reH 'e' vItu'
muSHa'ghach qulDaq weQ wa' tlheghHom tu'lu'
meQlI' pagh meQpu' tlhegh
vaj qul HoSHa'moH
'ej DotlhDaj QaQqu' leHlaH pagh QaQwI'
lach'eghDI' Dotlhvam
SoD'eghmo' leS Hegh
toH Qu' wIneHDI' Qu' wIchavnISbej choHlaHtaHmo' "wIneH"vetlh
mogh 'ej mIm 'oH 'oH SevtaHmo' jatDu' ghopDu' je ghu' je
vaj tlhuHmey buDqu' DanISchoH "wIchavnIS" leSmoHDI' QIH 'oH
'ach Daq potlh vIDuQjaj DaH cheghlI' *Hamlet*
vaj vavlI' puqna' SoH batlh 'e' DatobmeH SoQmey yIlo'Qo'
'ach ta' yIlo'
vaj ta'na' nuq Dachavqang
chIrghDaq HughDaj vIpe'qang
toH bIlugh
chotwI' Qanbe'nIS qech neH
bortaS'e' vuSbe'nIS Hoch
'ach pa'lIjDaq yIratlhtaH *layerteS* QaQ
bIcheghpu' 'e' Sov *Hamlet* cheghDI' je ghaH
bIpo'qu' 'e' vInaDmoH
batlh'e' Dunobbogh romuluSnganlI' lughurmoH
vaj tugh SoH ghaH je SaghommoH
'ovmeH SuHay'DI' yaylIjvaD jISuD
pIHQo'mo' quvmo' 'ej tojQo'mo' ghaH Quj'etlhmey nuDchu'be'
vaj bIH DatammeH loQ ghaH Datojpu'DI' pagh 'eqDI' wIvlIj 'etlh jej DawIvlaH
'ej SuQujlaw'taHvIS vavlI'vaD ghaH DanoD
maj Qu' vIta'rup
'ej Qu'vaD 'etlh vIngoH je
Qelqoqvo' wa' tar vIje'pu'
HeghmoHqu'bej 'oH
vaj taj vIchaghmoHDI' 'ej jaghwI'vo' 'IwHom vIlelDI' 'aw'mo' tajwIj neH Heghbe'meH ghaH yapbe' Hergh qubqu' vay'
maSwovDaq tI Hochvo' wIboSlaHbogh chenchugh je Hergh
HoHtaSvamDaq 'etlhDungwIj vIchaghmoH
vaj vIqotlhmeH neH vIDuQDI' Hegh rIntaH
vaj nab wIQublI'jaj
nabvaD maDa chay' 'e' lungeDmoHlaH poH 'eb je 'e' wIqeljaj
lujchugh Qu' 'ej nuq wInab net leghchugh mata'Ha'mo' vaj qaqbej wInIDbe'chugh
vaj nab chach nab cha' joq tu'nISlu'
'ej jorchugh wa'DIch wIDajtaHvIS vaj ratlhlaH latlh
SuHay'DI' yaylIjvaD jISuD
SuSuvtaHvIS SutujchoH 'ej SuQaDchoH
'ej qaSmeH ghu'vam ralqu'nIStaH 'etlhlIj
toH tlhutlhmeH tlhobDI' may'qoqraj vIlopmeH HIvje''a' Dun vIqeqta'
tlhutlhchoHDI' neH bong tarlIjvo' DaDuQbogh narghpu'chugh vaj tarwIjmo' Qap nab
'ach SuH chuS nuq
nuqneH ta'be'
wa' lot qam 'o' gho' lot latlh qam
moDqu'lI' lot
*layerteS* Hegh be'nI'lI'
bIQtIqHom DungDaq banglojwI'Sor tu'lu'
pa' baSHey bIQDaq tIHomDaj qIj 'ang 'oH
pa' Sor tItlheghmey taQqu' chenmoH ghaH
Qa'tIvo' DuStIvo' tI jejqu'vo' nI'wI'mey Doqvo' je bIH chenmoHtaH
nI'wI' lupongmeH Doch wIjwI'pu' mu' ngIlmo' chaH jatlhDI'
pongmeH chuQunbe'pu' "lomnItlh" lujatlh
pa' Dung SorDeSmeyDaq mIvHey tItlheghDaj HuSmoHmeH ghaH toSDI' ghor DeSHom mIgh
'ej SaQtaHbogh bIQHalDaq pum tImey popDaj ghaH je
beQchoH SutDaj
'ej qaStaHvIS poH mach DungDaq luratlhmoH
vaj wIch ngengqa' rur
QoQ qan DImey bomtaH 'ej SengDaj yajlaHbe'law' qoj bIQyInvaD ghaH 'ummoHlaw'pu' DujDaj porghDaj je
'ach tugh 'ugh SutDaj tlhuHqu'pu'mo' bIH
'ej qaSnIS bel bomvo' bIQlammey HeghDaq Qugh ghot luyaHmoH
vaj Hegh'a'
Hegh ghaH
Hegh rIntaH
SoHvaD law'qu'pu' bIQ *'ovelya* quv
jISaQ vaj 'e' vIbot
'a ghotvaD motlh 'oH
tIghDaj leH tIqwIj Duj
vaj DaH jISaQnIS 'ej ram jItuHchugh
yaHpu'DI' mInbIQvetlh yaHbej je pujbogh tIqwIj
joH Qapla'
qul SoQ vIghaj
'ej meQqang 'oH
'ach QI'yaH
SoQvetlh luSoD mInDu' Dogh
Ha' wItlha'nIS
QeHqu' ghaH 'e' vIqIlmeH Qatlhpu' Qu'wIj
QeHqa' 'e' taghlaH ghu'vam chu'
vaj *ghertlhuD* ghaH wItlha'
lut 'ay' vagh
lut 'ay'Hom wa'
quv'a' nol mIw yo' qIj 'elmeH qIghqoq nejpu'chugh je
HISlaH qaja'
vaj yImolchu'
Matlh ghu' qelpu' 'ej nol quv ra' *Heghutlh*'a'
nuqmo' NuH HuM'eghmeH SoN'eghMe'chugh
toH NuHmoHlu'Mej
*In Self Offense* qaSMejpu'
jaS qaSlaHMe'pu'
toH qar meqvam'e' chIch taghNu'wIj vISoNchugh vaj mIw vIta'
wej Qu' ghaj mIw
Hechghach vangghach chavghach je ghaj
*tlherevore* chIch SoN'eghpu'
'a ghoMe' HInISMe' molneSwI'
MIjatlh 'e' yImev
naNev MIQ tu'lu' maj
naNev ghot tu'lu' maj
SoN'eghmeH MIQvam lo'chugh HechMe'taHvIS HechghachNaj loj
'e' yItu'
'ach chIch ghaH SoNchugh MIQ'e' vaj SoN'eghqu'Me'
*tlherevore* yInpoH rInmoHMe' HoH'eghMe'wI'
'ach 'e' ra''a' ruv
HISlaH vIt
ruvvam'e' Matlh wuq *Heghutlh*'a'
vItna' NanuSHa'qang'a'
yaS ghaHMe'chugh vaj nolNaj quvMe'nISmoHlu'
toH MIvItMa'
'ej SoN'eghchu'meH pagh voQ'eghchu'meH NIM ghajMogh yaS muM law' NIM ghajMogh latlhpu' tlhIvHa' muM puS
Ha' molluchwIj
ben negh chaH pochwI' lamwI' molwI' je neH
Qu' naMpu'Mogh qeng lutaH
muvmoH'a' qeng
wo'mangghom'a' wa'NIch muvmoH 'ej qeqmoHqu'
SevNI' jagh Haw' 'ej ghatlhqa' yo' tuH
'a SevvaN tuHMe'Ma'
vajMatlh NanuS'a'
chay' vajMatlhHeylIj NapaM
vajMatlh paMlu'meH 'ut tuH'e' Sevmo' jagh
tlhoMMogh mu'tlhegh cha'NIch qaQoymoH 'ej qoghlIjNaq Nap rarchugh vaj Hov ghajMe' ram
'Iv lo'laH law' latlhvam lo'laH puS jonwI' QumpIn chamwI' joq
yIH je'wI''e'
yIH roghvaH vu' 'e' lo'laH ghaH'e'
MI'ong 'e' vInuSHa' majQa'
yIH je'wI''e' vInuSHa'
'a nuqmo' vInuSHa'
yIH ghung je'
Nol Naje'laHMe'chugh nol Natu'
'a Soj NamechmeH yIH Nalo'laHMe'
*tlherevore* yIH roghvaH tInmo' MIMechjaj
yIjangqa' Ha'
'Iv lo'laH law' latlhvam lo'laH puS jonwI' QumpIn chamwI' joq
HISlaH HIjangpu' 'ej yIvergh
Hu'tegh NaH jIjanglaH
MaQa' jIjanglaHMe'
yaMlIj yIngepMe' qoq MuN NaraNmeH je MuQ HIch net lo'laHMe'mo'
tlhoMMogh tlheghvam NatlhoMlu'meH NaQoyqa'moHlu'NI' "molwI''e'" yIjatlh
San puyjaq SIQ juH chenmoHMogh
ruch yavnganNaq yIjaH
jIHvaN ghargh 'Iw puMmeH yIra'
jIQuptaHvIS muSoN Melna' vay' vImuSHa'NI'
vItoN 'e' poQlaw' pagh ghoM ra'NI'
malja' Qu' ta'taHvIS QorghHa'qu'law''a' ghotvam'e' bommo' moltaHvIS
Qorghchu'meH ghopDaj ruQHa'moHlaH molbogh DujDaj'e'
Qu' Qorghqu'nIS laH Soy''e' tambogh Duj
'ach ro'NajNaq mujonpu' Mov qu'
mujonNI' MIvlaw'
yav MIrqu'Naq mulonpu' 'ej Men jIQup 'e' jIvlaw'
jat ngaSpu' Homvetlh 'ej ben bomlaH
va Dochqu' petaQ Doch pummoHDI' *molor*Hey pIgh pumlaw'taHvIS
yabvaH'e' ghajpu'bogh HeSwI''a' chaq DaH Sev je Qovpatlhvam
chaq yejquv junqang qar'a' HeSwI''a'vetlh
chaq HIja' joHwI'
chaq 'oH ghajpu' boQ jatlhlaHpu' "qavan joH webHa'
pIvtaHghach 'oH nuq'e' joH quv
" chaq joHwI' pong vay' ghaH 'ej joHDaj pong vay' Qogh'e' naDqu' Qochbogh vuD QubtaHvIS je chaq qar'a'
HISlaH joHwI'
toH qarba'
'a DaH Su' ghaH yIvqang ghew yo' 'aj Dej woS 'ej lamDaq nachmey pIgh DuD molwI' luch
naDev jaS Qeq San pu' net tu' bortaS QaQqu' jabtaHbogh San nuH'e' DItu'laHchugh
HomDu' DaH QujmeH neH ben tlholHa'choHpu''a' bIH
vIqeltaHvIS 'oy'qu' HomDu'wIj'e'
wa' lamnge'wI' wa' naghghorwI' lomSut je MIH jan'e'
'ej lamNaq NIS vIchenmoHNI' vaj yonnIS mol ngan'e'
Ham toH latlh
chaq bo'DIj meqwI' nach Hom 'oH qar'a'
DaHjaj nuqDaq bIH pojbogh 'ej ponbogh mu'Daj'e' yojDaj'e' chaw'Daj'e' meqDaj'e' je
DaH pIpDegh qIptaH lamluch qatlh 'e' SIQ ghaH qIpmeH meq mub QIjbe'taHvIS vIDwI'
va qaStaHvIS yInbovDaj chaq malja' gharwI''a' ghaH ngIpHa'moHbogh 'ej nojHa'moHbogh woQ vu'meH qummeH 'ej loHmeH chaw' je ghajtaHvIS
naDev ngIpmoHbogh 'ej nojmoHbogh woQ nej lamDaq nujvo' nIj 'e' najmo'
HuqtaHghach vu' 'e' chaw'lu'meH 'um ghaH DaH 'e' lu'olQo''a' 'ummoHwI'Daj'e' 'ummoHbogh cha'rIp'e' je jochlaHbe'mo' chopDI' pe'vIl Sutlhbogh 'ej tlhongbogh mu'meyDaj
yoS malja' ta ngaSlaHbe'mo' DISvam vaj je'wI' QavvaD chuvbe'nIS yoSDaj naQ Ha' qar'a'
yoSDaq chuvbe' je wa' naghHom joHwI'
malja' Huqlu'meH tera'ngan De'wI' lulo'lu' qar'a'
HISlaH joHwI' verengan De'wI' je
tera'nganbatlh verenganbatlh je ghaj De'wI' luvoqbogh nuv'e'
ghotvamvaD jIjatlh
molvam ghaj 'Iv qaHHom
vIghaj qaH
'ej lamNaq NIS vIchenmoHNI' vaj yonnIS mol ngan'e'
Daghajbej SoHvaD lulIghHom 'oHmo'
ghoMe' NIS 'oH neH
lulIghlaHMe' Hom
vIghaj 'ach 'oHNaq jIMa'Me'
chonISbej Duma' 'e' DaDISQo'mo'
pa' bIQamlaHbe'
vaj bIpum
QamMe' pumlIj
chojun 'a MIchunMe'
loD 'IvvaD DamollI'
loNvaN vImolMe'
toH be' 'IvvaD
Me'vaN vImolMe' je
pa' 'Iv Damol
Me' ghaHpu' qaH
'a qeylIS ghomjaj Heghmo'
reH mu' Donqu' Qovpatlh yajtaHvIS
machIjnISchu' QIch wIQoDtaHvIS
jaS Deghmeymaj Qotlh DuDchuqlaw'taHbogh rI'Se' ngoqmaj
qeng HoS *Horey'So* qaStaHvIS wej benvam vItu'taH 'Itlhqu'mo' nugh chuQun toy'wI' quvDaq Sumqu'mo' tlha'bogh rewbe' motlh qam'o'Daq yaDbutlh ngoH
ghorgh molwI' Damoj
NIS jajmey Hochvo' vImoj *vortIMraS* jeyNI' che'pu'Mogh ta' *Hamlet*ma'
ghorgh qaS wanI'vetlh
'e' NajanglaHMe''a'
'e' janglaH qoH Hoch
quq wanI'vetlh wanI'vam je Mogh *Hamlet* Qup
NaHjaj maw'moHlu'pu'Mogh 'ej tera'Naq ngeHlu'pu'Mogh
HISlaH vIt qatlh tera'Daq ghaH ngeHlu'
pa' mISNaj SuqHa'qa'
SuqHa'Me'chugh pa' ram ghu'
pa' ghaHNaq mIS lutu'Me' mISmo' je Sung
maw'moH nuq
Hujqu' maw'moHwI'Naj net joS
chay' Huj
Su' yaHlaw' yaM
meq nuq
Su' naNev Qo'noSNaq molghomvam Meq jIH neH
wejmaH NIS mol vIQan jIqanNI' 'ej jIQupNI'
qaStaHvIS DIS 'ar wutlhDaq QottaH lom wej nontaHvIS
Heghpa' nonMe'chugh
toH law'qu' roplom'e' NItlhapnISMogh
wej non qaStaHvIS chorgh Hut ghap NIS
qaStaHvIS Hutna' wej non SurghwI'
qatlh poHDaj nI' law' latlh poH nI' puS
toH malja' Qu'Najmo' letchu'mo' NIrNaj HurNajNaq MIQ pol qaStaHvIS poH nI'
reH Quch HaM lom nonmoHqu' MIQ
toH nach Hom 'oH wutlhNaq 'oHtaH Homvam qaStaHvIS cha'maH wej NIS
ghajpu' 'Iv
ghajpu' Quch HaM ghot Nogh
ghajpu' 'Iv 'e' yIloy
Qo' 'e' vISovbe'
naSjaj yIntagh Nogh yIvqangMogh ghewmey
ben HIvje''a' teMHa'meH nachwIjNaq puMtaHMogh gharghHIq chagh
nach Homvam'e' ghajpu' *yorIq* ta' HaghmoHwI'
va Do'Ha' *yorIq*
yIntaHvIS vISov *Horey'So*
HaghmoH not 'e' mevqang
tIvmoH reH 'e' tob
wa'SanIDlogh DubDaj vIlIgh 'ej DaH qech qIch najbogh yabwIj
vIqawDI' poqwIj laQ
naDev HuS woS'e' pIj vIchopbogh
"pIj"vetlh vItoghlaHbe'
DaH nuqDaq bIH jIpHommeylIj tlhaQ'e'
QujlIj'e' QoQlIj'e' pay' meb Hoch HaghmoHtaHbogh lutlIj tlhaQ'e' je DaH tIvlaH 'Iv
bIHagh DaH 'e' vaq qar'a' paghna'
Dej'a' woS
DaH be'oywI' quv pa'Daq yIjaH 'ej yIja' bI'IH'eghmoHmeH wa'SaD Haq DaSIQchugh rurchuq qabDu'maj 'e' DabotlaHbe'mo'
HaghmeH yIja'
vay' HISovmoH *Horey'So*
nuq DaSovrup joHwI'
wutlhDaq pIghvam rur qeylIS pIgh 'e' DaHar'a'
pIwvam rur'a' je pIwDaj
HIja' He'So'bej
lo'mey ramqu'Daq macheghlaH *Horey'So*
HIq HIvje''a' SoQmoHchu'bogh lamHom'e' qeylIS lom Dunvo' ghochlaH qar'a' najbogh yab
Dalach 'e' vItu' ghu'vetlh vIqelDI'
ghobe' vIt vIlachbe'chu'
'a ghaH ghochmeH San DuH lachbe'taHvIS 'ej yojmey qItqu' neH buStaHvIS vaj qaS Hegh qeylIS wutlh ghoS qeylIS tlholqa' qeylIS Hap lam 'oH Hap tlhol'e' SoQmeH HIvje''a' lam lo'lu' 'ej HIq polmeH chom lam'e' (bong mojpu'bogh qeylIS) lo' chaq qar'a'
lom mojDI' qeylIS lam moj je voDleH
SuS waQmeH pa'Dop DISHom ghoDlaH neH
nunuQ bov bIr 'e' botmeH vaj nuboQ 'e' laj ben qo'maj HajmoHbogh lamtlhoQ
'a tam
'eH tam
DaH chollI' ta'
*layerteS* nolwI'pu' je
tlha' ta' ta'be' toy'wI'pu' je]
toy'wI'pu' je
'Iv tlha'lI' Hoch
'ej tayDaj nupqu'lu'
vaj pIHmoH ghu'vam quvHa'law' lomvetlh ghop lutlha'lI'bogh yInDaj polHa'mo' Heghvetlh raDpa' batlh
'ej chuQunghotHey ghaHpu'
loQ maba'jaj
naDev maqImlI'jaj
DaH tlha' tay nuq
*layerteS* ghaH
loD quvqu'
DaH tlha' tay nuq
lalDan'utlh 1 nolDaj wInI'moHmeH chaw'maj wIpabta'
nub HeghDaj'e'
'ej lalDantIgh ngepbe'chugh nura'pu'bogh DunwI' vaj yav quvHa'Daq QotnISbej porgh ghIpDIjpa' ghe''orpIn
ghaHDaq vanbommey DIjachbe'nISpu'
'ej naghmey DI je veQ je baHnISlu'
'a ghaHvaD nuH luqenglu' DaH net chaw' 'ej ghItlh wIlanpu' 'ej tlhogh Qav wIqaSmoH 'ej jaq chuS'ugh noltay je
Hat'a' latlh
lalDan'utlh 1 Hatjaj jay'
lommey tay wIwebmoHbej mInDu'DajDaq majachchugh 'ej yo' qIjDaq pe'vIl Heghbogh vajpu''e' tlha'chugh ghaH
yavDaq yIlan
'ej porghDaj 'IHqu' chunvo' boghjaj DuStImey
'utlhqoq qej qajatlh yo' qIjDaq boQbogh qa''a' moj be'nI'wI' Dujoy'taHvIS veqlargh
'IHwI'na'vaD 'IHwI'Hommey
*Hamlet*wI' be'nal SoHchoH reH vIneH
be' 'IH bInayDI' tlhogh QongDaqrajDaq tImey vIchaghrupmoH
'a nolDaq chagh not 'e' vIpIH
SuH wejlogh qIch wa'maHlogh wejlogh nachvetlh webDaq pumjaj qIch yablIj valqu' nge'mo' chavDaj mIghqu'
loQ lam yImIm
DeSDu'wIjDaq vIvanqa'
SIbI' yInwI'Daq lomDaq je yav lam yIghommoH
Daqvam beQDaq chenjaj HuD
*peDSoS* HuD ngo'qu' qa'HuD'a' chalnach je juSjaj 'oH jay'
Ha' 'IQtaHghach lach 'Iv
lengtaHbogh yuQmey yay'moH 'Iv SoQ 'It
'ej 'Iv ghogh 'IjmeH yev bIH merDI' ghoghvetlh
Qo'noSngan *Hamlet* jIH
Dughupjaj ghe''or
QaQbe'law' QIch Dajatlhbogh
'eH HughwIjvo' nItlhDu' tIteq qatlhob
jIvIDqang 'ej jImoDqang 'e' vISeH
'ach jIHDaq QoblaH vay'
vaj Hojjaj yablIj
'eH yaHjaj ghoplIj
Ha' tIchev
SuH *Hamlet*
joHwI' QaQ SuH yIjot
vItobmeH pe'vIl ghaH vISuvrup jIleghmeH vIHlaHtaHvIS mInyoDDu'wIj
va puqoy
nuq DatobmeH
*'ovelya* vImuSHa'
mujuSlaHbe' loSnetlh loDnI' muSHa'ghachHom tlhoQ naQ
'ej not mururchoH
ghaHvaD nuq Data'rup
va maw'ba' ghaH *layerteS*
'eH yISolQo'
'eH nuq Data'rup 'e' HI'ang
rughtaS tlhutlh'a'
wa' mughato' Sop'a'
vIta'rup je
naDev bIvIngrup'a' neH
choqaDqang'a' neH nolDajDaq bISupmo'
bIyIntaHvIS DatlhejchoHmeH yImollu' qatlhejbej
HuDmey DabuS'a' bIjaw'DI'
maHDaq wa''uy' qelI'qam woDlu'jaj
'ej woDDI' rIntaH Hovmey qulDaq DungDaj meQmoHjaj Dungmaj HuD
'ej qellu'DI' 'er ghIch neH rurjaj *SISSoS*'a'
mu' Doj Dalo'chugh vaj jIjach je jIH
'ej yabDaj DantaHvIS QeHmISvam nI'be' neH poH
tugh Qa'be' tuvqu' rurchoH bogh Qa'puqmeyDaj SuD 'e' tu'DI' 'oH
ba'taHmo' DotlhDaj tam 'ej 'av'eghmo'
yIja' qaH
qatlh bIDoch
reH qaparHa'pu'
'a ram
batlh mIwmaj raDchugh je veqlargh vaj jaS jach Qogh 'ej jajDaj tIvnIS targh
qatlhob *Horey'So* QaQ
'eH ghaH yItlha'
SIbI' ghu' naQ wItI'
'eH *ghertlhuD* QaQ puqlI'vaD mang tI'avmoH
molvamDaq nI'qu'jaj lom wIqawtaHmeH Hegh vanmaj
tugh qaS rep jot
'a qaSpa' tuljaj Sanmaj
lut 'ay' vagh
lut 'ay'Hom cha'
ta'qach'a' vaS
pItlh qaH
DaH latlh yIbej
chay' qaS wanI' 'e' naQ Daqaw qar'a'
vIqawbej joH
tIqwIjDaq Suvlaw' vay'
jIQong 'e' bot 'oH
jIH bItlaw' law' qammIr qama' bIt puS
ghu' vIqelQo'DI'
toH rut lI' qelQo'ghach
vInaDbej maHvaD QaplaHchu'mo' 'oH lujtaHvIS nabmaj 'ong
vaj Sovlu'jaj nemmaj lISbogh San'e' reH tu'lu'bej nemvetlh qeqHa'taHvIS je qa'ma' Soy'
DIchna' 'oH joH
raQpo'pa'vo' jIHu'
ngengpaH vItuQDI' jIqat'eghpu' neH
'ej pa' Hurghqu'taHvIS chaH'e' vISammeH Dat nejHa'lI' ghopwIj
Qap Qu'wIj
ta'nobchaj vInIH
'ej rInDI' pa'wIj vIghoSqa'
pa'Daq jaqmo' DujwIj DochHa'meH mIw vIlIj 'ej ghItlhchaj Dun'e' vIpoSmoHmeH jIngIlchoH
'ej *Horey'So* ghItlhDaq voDleH 'urmang vItu'
pa' ra'
nav 'IHmoHtaHvIS meqmey Sarqu' law' 'ej chepnIS Qo'noS wo' tera' DIvI' je jaS 'e' lubuStaHvIS 'ej ratlhchugh yInwIj vaj qaS maQmIghmey Dojqu' 'e' luDelDI'
ra' ghItlhvetlh bejlu'DI' mImbe'jaj lenHom
Qo' nom QIghpej rIHbe'lu'jaj je jay'
DaH *Hamlet*'e' yImuH
SuH ra'bogh ghItlh yItlhap
tugh 'oH yIlaDchu'
'a chay' jIruchchoHpu' DaH 'e' yI'Ij
jonmeH muDech mIghwI' mIqta'Hey 'ong
vaj yabwIjvaD vIlIHpa' lut luDachoH
'ej ra'bogh ta'ghItlh chu' vI'ogh
vIghItlhlI'meH pIqaDmey 'IH vIlo'
wa'ben che'wI'pu' vuD vIghajtaH je pIqaD 'IH SovDI' vay' naDHa'nISlu' toy'wI''a' Qu' neH 'oHmo'
chIch vIlIjqang
'a qaH DaH ne' matlh Qu' muchavpu' laHvetlh
nuq Hechpu' ghItlhwIj 'e' DaSovqang'a'
HIja' joHwI'
tera'vaD ra'qu' ta' "SumatlhlI'meH rojmab boDIltaHvIS 'ej targh Doj rurmeH maparHa'chuqghach 'ej quvmeH DeghDaj'e' wej woDmeH roj 'ej reH jupna' ngo' maHbogh nuQmeH pagh"
'ej DujDaj chIDmeH "meH" latlh law'qu' pongDI' "ghItlhvam DabejDI' 'ej DaSovpu'DI' yIghoHchoHQo' 'ej Qu' yIchovchoHQo'
'a ghItlh qengwI'pu''e' SIbI' yImuH 'ej HeSchaj DISmeH chaH pagh poH yIchaw'
chay' navvaD woQ DaghItlh
toH SeHlI' SanwIj
Sengvam qay'Ha'moH je 'oH
tepwIjDaq vavwI' woQDegh vIghaj
Qo'noS Degh'e' Do' rapchu' 'oH wej DeghDaj choHmo' ta'
vaj SoQmeH navwIj nav latlh mIw vIlo'
Degh ghItlh vI'uy
DaqDaq vIlan
'ej not choH'e' luSov
toH qaSDI' wa'leS vID bIQ'a' may'maj
may'vetlh tlha'pu' nuq Hu' 'e' DaSovchoH
vaj rIntaH *ghIlDeSten* qaH *roSenQatlh* je
va Qu'chaj ra'meH ta' luSawqanglaw'
tIqwIjvo' Hop chaH
QIHchaj naQ luDuHmoH nISqangmo'
pe'vIl Hay'DI' cha' ghol HoSqu' 'etlh QeHqu' botlhDaq gho'qangchugh Qovpatlh vaj ghaHvaD Qob
baQa' quvHa'bej ta'vam
Qu' vIpabnIS
vavwI' quv HoHpu'
SoSwI' ngaghHa'pu'
patlh vItulpu'bogh nISpu' ta' chu' luwIvrupDI' yejquv
'ej yInwIj yotlhqangpu' je tojqu'taHvIS muvoqqangmoHmo'
vaj tIq Say' vIghajbej chIch popDaj nobpu'DI' qar'a' 'etlh ghopvam
'ej ghurmeH mIghbogh laHDaj qo'maj ropvetlh vISangchu'Qo'chugh vaj jIwem qar'a'
'a tugh tera'vo' ghaHvaD pawnIS De'
'ej chay' QapHa'pu' Qu'Daj tugh 'e' Sov
vaj "tugh" SeH ghaH
'ach "wej" vISeHlI' jIH
'ej "baH" neH jachmeH yapqu' wa' ghot yIn
'a batlhjupwI' *layerteS*vaD jIberghmo' jIQoSqu'
Qu'wIj nach vIbejchu'DI' tugh Qu'Daj mIv vIleghchoHlaHlaw' je
jup ghaH vIneHqu'bej
'a mIymo' 'ItDI' ghurqu' je DotlhwIj nongqu'
chol 'Iv
Qo'noSDaq SoHqa'taHneSghach wIlopjaj
qatlho'neS qaH
pIpyuSvam Daghov'a'
ghobe' joHwI' QaQ
ghu'lIj chep law' ghu'wIj chep puS qay'mo' ghu' ghaH ghovlu'DI'
yoSmey tIn ghaj lIng je bIH
Ha'DIbaHmey ghom vu'wI''a' Dachugh je wa' Ha'DIbaH'e' neH vaj voDleH Sojpa'Daq yaH ghaj 'oH tugh net chaw'
Qa' ghaH 'ach lam tIq ghaj 'e' vIDellaH
joH wIbHa' leSpoH DaghajneSchugh SoH quv ta'vo' wa' Doch SoHDaq jIja'nIS HIchaw'jaj
vIHev qaH buSchu'rupvIS qa'wIj
mIvlIj yIlo'chu' nachDaq 'oH DaqDaj'e'
joH quv qatlho' tujqu'
ghobe' bIrqu' 'e' yIHar
chuch Sepvo' joqmoH SuS
loQ bIrlaw'bej joHwI'
'ach vuD vIwuqmeH berghqu' 'ej tuj muDDotlhvam
HIja'bej joHwI'
qaSmeH 'e' mIw vISovchu'laHbe' jIH 'ach
joHwI' mutlhob ta' batlh SoHneS vItlhojmoHnIS tonSaw'lIjmo' mIymeH SuDpu' ta'
qaH *fact of the matter* 'oHna' De'vam'e'
yIqaw qatlhob
Qo' joHwI' pIvbejwIjvaD
qaH Hu' puS naDev ta'juHDaq ghaHqa' *layerteS*'e'
HIHar Suvchu'wI' pupqu' ghaH Dotlhmey quv Sar ngaS jup'a' Da 'ej po' qIp'egh nachDu'chaj tlhIngan SuvwI' je ghaH
HIja' nong ghaHneSvaD *critique*'a'wIj qamuchmeH SuvwI' mem HIDjolevDaq joq wa'DIch ghaHchu' toH batlhDotlhmey law' ghajwI'meyvaD tIqDaj 'angqu' ghaH
Delqu'ghachDaj mu'mey DapujmoHHa'be' SoH 'ach batlhDotlhDaj Hochna' wIbuv 'e' wanI'qoq ta'meHchu' yapbejbe' bong vIt junlaw'wI' naDmey qu''e' yabmIw DIngtaHmoHmo' DotlhDu'HeyDaj
tIchHa'taHghachQIchwIj DaDI' teHna''e' ghaH vIqelchu'bej qa'DajDaq quvmey law' lubuvlu'laH povmo' qoj le'mo' DujDaj'e' naDDaj vItlu'taHvIS neH vaj quvna'qu' wojDaj lu*tranSmI'*laH nom qabDaj gheghvo' qetqa'bogh 'otlh neH'e'
'ej QIb neH'e' QeqHa' 'otlhbIQtIqvamDaq lIghwI' rurnIDwI' ghap
bIQaghHa'bejqu' SoHneS ghaH DaDelchu'meH
Hechghach'e' qaH
SuvwI'vam quvwojvItHey HoSghaj law'bogh ghaH wIDechmeH mu'peQchemmaj'e' HoSghaj puSbogh nuqmo' wIlo'taH
Hol pIm DayajmeH bIQapbej'a'
yInID neH
SuvwI'vam'e' DaqelmeH Qu' DughajmoH meq nuq
lojchu' HuchDaj
QIchDaj DIlmeH mu'DeQmeyDaj Hoch lo'pu'
ghaH'e' qaH
bIghuHmeH DuSovmoHba' ngoD
paghna' ngoD vISovba' qaH
'ach wejpuH 'e' Dajatlhpu'chugh choDelmeH vaj choquvmoHHa'ba'
taH qaH
bIghuHmeH ngoD DaSov pov *layerteS*
'ach povba'mo' *layerteS* 'utbe' ghuH ghaH vI'ovQo'mo'
'a gholHey pov ghovchugh ghov'egh je povwI'
pov ghaH nuH ruQtaHvIS 'e' vIHechpu'
'ach batlhDaj quvmoHbogh law'wI' qellu'DI' ghaH rurlu'chu'be'
nuHDaj nuq
qutluch 'etlh je
vaj cha' nuH ruQ
'a ram
qaH ghaHvaD jav toQDuj SuD ta' 'ej ta'vaD jav romuluSngan may'morgh veSjo' je DoQHa'qang ghaH 'e' vIqawlaw'
bIH tlhej je luchchajvam pu'DaH begh latlh je
'ej *I'll be damned* luHo'lu'meH 'umbej je wej Qanghachpat'e' nom beq toy'beH Qanghachpat lI'qu' 'ej mIqta' 'IHchu' bIH
nuq DapongmeH Qanghachpat Dajatlh
QIch notlh DayajmeH 'ut bIngghItlh
'e' vISovchoH rInpa' SoQDaj
begh 'oH Qanghachpat'e'
chaq SoQvaD qar mu' yoDSut tuQlu'chugh je
'ach qarbe'mo' ghu'vam begh 'oH
'a taH
SuDmeH jav toQDuj 'ov jav romuluSngan may'morgh luchchaj wej Qanghachpat 'IHchu' je
tlhIngan jo 'ov romuluSngan jo 'e' luSuD
qatlh Hochvam luDoQHa'qang
mu'lIj vIlo'meH jIvaq
wa'maHcha'logh SuQujchuqlI'taHvIS SoH ghaH je wejlogh SoH DuqIppu'chugh ghaH vaj SoHDaq *infliction*mey chelbe' ghaH SuDmeH 'e' loy ta'
wa'maHcha'logh QujmeH ghaH Doq law' Hutlogh SuDmeH ta' Doq puS 'ej SIbI' tob qoj Daj wanI' janglIj maghajmeH 'e' chochaw'chu'bejneSchugh
'ej chay' qaS "Qo'" vIjangchugh
joHwI' SuDwI'vaD tob qoj Daj wanI' "lu'" Dajangba'DI' 'e' vIHechpu'
qaH naDev vaSDaq jIyItchu'taH
berghbe'jaj ta' quv DaH qaS qeqpoHwIj
toy'beHDI' nuH SuvrupDI' SuvwI' 'ej reH may' tungbe'chugh ta' vaj ghaHvaD jIQap laH vIghajchugh vIghajbe'chugh vaj jISaHbe' 'ach jItuHchoHmeH 'ej loQ jIrIQmeH jIQap
De'lIjvam vIQaynIS'a'
loQ yIQay qaH
'IHmoHlaw'pu'DI' QIchlIj
reH jIvum jItoy' je joHwI' quv vIHeQmeH
lu' lu'
vummeH HeQDI' po' ghaH
jaS ghaHvaD HeQ pagh
Haw' mughato' moH nachDaq Soy'taHvIS QuchyoD
SoS je'wI'Du' vanchu' ghaH choppa'
vaj reH mu' Hach lIS neH ghaH latlhpu''e' je QatmoHtaHbogh bov qal
nughDaq QoD'eghtaHvIS potlhpu' vuDmey 'etDaq mu'tlheghmeyDaj bagh 'ej SIghmeH luHlaH 'a chIch tlheghmeyDaj lupochHa'lu'DI' HuSHa'
joHwI' vaSDaq ta' loStaH *Hamlet* ja' *'oSrIq* Qup'e' batlh ngeHpu'bogh ta'
DaH *layerteS* DaQujqang'a' pagh Quj DamImqang'a' 'e' SovchoHmeH ngeHqa'neS ta'
choHbe' mIw vIHechbogh ta'vaD matlhtaH
mughomrupDI' jeywIj ra' jeyDaj qaSDI' tupvam tupvetlh joq laH vIghajtaHvIS neH
tugh paw ta' ta'be' Hoch je
Do' maj
batlh *layerteS* Davanchu' Quj botaghpa' neH ta'be'
nu'oDchu' ghaH
Qujvam Daluj joHwI'
'e' vItem
romuluSDaq tlheDpu'DI' reH jIqeqtaH muQaHmo' Quj pab wuqpu'bogh jIQap
jotHa'qu' tIqwIj ghu' 'e' DajuvlaHbe' 'ach ram
ghobe' joHwI' QaQ
Doghlu' 'ach chaq qoH ghIjlaH Qobqoqvam'e'
Duj yIvoqtaH
naDev paw 'e' vImev 'ej chaHvaD ropqoqlIj vIQIj
va Qo' jay' maQmIgh vIqImQo'
leHlI' San pumDI' je Qa'
DaH qaSchugh leS qaSbe' leS qaSbe'chugh DaH qaS DaH qaSbe'chugh leS qaS
reH Suvrup SuvwI'
leSmey'e' lonlu'bogh Sovmo' pagh nuv qatlh ramHa' lonlu'meH wanI'
'etlhmey latlh je qengtaHvIS]
Ha' *Hamlet*
jIHvo' ghop'e' yItlhap
bortaS yIqIlneS qaH
qaQIH jIH rIntaH
'ach QIH yIlIj SuvwI' DaDarupmo'
ghu'vam luSov yejquv
Da'Ijlaw'pu' je muSengtaH DotlhwIj maw''e'
pe'vIl qa'lI' batlhlIj je noDqangghach je vemmoHbogh Hoch'e' vIvangbogh qaSmoH rIntaH DotlhwIj maw''e'
SuH 'e' vImaq
*layerteS* QIHlaH'a' yaS *Hamlet*
*Hamlet*vo' yaHchugh *Hamlet* 'ej *layerteS* QIHchugh ghaH *Hamlet*na' ghaHbe'taHvIS vaj QIH vangbe'pu' *Hamlet*
tembej *Hamlet*
toH vangpu' 'Iv
Dotlh maw''e'
teHchugh ngoDvam bortaS SuqwI'ghom'e' vaj jeS je *Hamlet*
*Hamlet* Do'Ha'vaD jegh Da DotlhDaj maw''e'
qaH SaHtaHvIS yejquv chIch chavvam mIgh vIvangpu' 'e' vItemmo' pung 'angbogh yablIjvaD jIchunqu'jaj
vaj juHDaj DungDaq pu' baHHa'chugh vay' 'ej bong loDnI'Daj rIQmoHchugh ghaH vaj ghaH DIvjaj law' jIH DIvjaj puS
yon tIqwIj
'ej jIHvaD ghu'vammo' bortaS tungHa'nIS tIq Duj
'ach batlhwIj Dotlh vIqelnISmo' SoHvo' jIHopnIS
boqlIj vIjeSQo' je
lambe'meH pongwIj batlh wej jIHvaD vuDchaj rojmab nubwI'na' joq lunobtaHvIS quppu'
'ej qupvam batlh Honbe'nIS Hoch
wej qaSDI' poHvetlh batlh muSHa'ghach 'oHmeH muSHa'ghachlIj vIlaj 'ej vInoDQo'
vIneHqu' neHtaHghachlIj'e' vInaD
'ej jIyuDHa'qang jup HuchQujvam'e' wIruchtaHvIS
Ha' maHvaD 'etlh tInob
Ha' 'etlhmey
'etlh vItobnIS
wa' HInob
chojeymeH 'etlhlIj jey qa'ang *layerteS*
jItlhIbmo' tugh ramna' Hov wov rur laHlIj povmo' tugh bochbej 'oH
chovaqlaw' qaH
ghobe' qaH
ghop vI'IpmoH
'eH *oSrIq* chaHvaD 'etlhHommey tInob
qorDu'ghot *Hamlet* SoHvaD jo vISuDpu'
jo DaSov'a'
HIja' vISovchu'neS
lujwI' DangaqmeH jo DaSuDlaw'neS
ben Suvbogh cha'ra' laH vIbejpu'
'a Dubpu' ghaH
vaj SoHvaD Quj vImaSmoH
'ughqu' 'etlhvam
jIHvaD latlh yI'ang
mubelmoH 'etlhvam
tIqmeH rapchuq'a'
HIja' joH QaQ
yaHvetlhDaq HIq HIvje' tIlan
peqIm Qapla' wa' cha' ghap Suqchugh *Hamlet* qIpDI' pagh wejDIch Suqchugh jeyDaj cha'DIch noDDI'
vaj bachjaj may'morgh Hoch
'ej *Hamlet* vanmeH HIqvam tlhutlh ta'
HIvje'Daq qut vIchaghmoH
tlho'qut tIn law'qu' qut Hoch'e' ben ngaSbogh loS Qo'noS ta'pu' Qav patlhmIv tIn puS
HIvje' tInob
chuS'ughvaD jachjaj DIr
bachwI'vaD jachjaj je chuS'ugh
'ej chalvaD jachjaj je pu'beH
yuQvaD jachjaj chal "DaH *Hamlet* vanmeH tlhutlhlI' ta'"
'ej noHwI'pu' HojlI'jaj mInDu'raj
Ha' qaH
Ha' joH
ghaH mupta'
ghaH mupbejta'
SuH maHay'qa'jaj
HIq HInob
SuH *Hamlet* qutlIj 'oH
Qapla' yIghaj
ghaHvaD HIvje' yInob
Qo' joH
'ay' cha' vIrInmoHqang jItlhutlhpa'
nuq DaHar
tugh Qap puqma'
va ror 'ej tlhovchoH ghaH
*Hamlet* SutDI yItlhap
SuH Huy' yIQaDmoH
bIDo'meH tlhutlhlI' je ta'be'nal *Hamlet*
majQa' joH
*ghertlhuD* yItlhutlhQo'
jItlhutlh joHwI'
Do' jIHvaD yInoDQo'
tarwIj HIvje' 'oH
paSbej Hoch
jItlhutlhmeH jIngIlQo' joH
tugh vItlhutlh
Ha' qab qaQaDmoHjaj
joH tugh vIqIpbej rIntaH
'e' vIHon
'a ghobwIj SujchoHlaw' wanI' wInabbogh
*layerteS* Ha'
may' wej wIruchjaj jay'
bIHoblaw' neH
bIHIvtaHvIS yIralchoH
choHay'taHvIS puq tlhIb jIH 'e' DaHarlaw'
Qapbe' cha' ghol
DaH ruv vISuq
DaH QeHchoH
'eH pa' ta'be' yIQorgh
cha' DopmeyDaq chagh 'Iw
chay' SoH joH QaQ
chay' SoH *layerteS*
qoHQa' vIDa 'ej bong jIjon'eghpu'
muHoH 'urmangwIj may
ta'be' Dotlh nuq
vulchoHba' rIQmo' chaH
va *Hamlet* tIqwIj puq
muHoHpu' tar
ta' mIghqu'
'eH lojmIt yISoQmoH
'eH 'oH yISam
naDev 'oH *Hamlet*
*Hamlet* quv DaHoHlu'
DaH SoHvaD lo'laH 'u'vam naQ pagh Hergh
bIyInmeH SoHvaD ratlh rep bIDHom neH
bong ghoplIjDaq 'urmang chavwI' Daghaj
jej 'etlh 'ej tarDaq chaghmoH
chegh nab mIgh 'ej DaH mumuppu' 'oH
naDev jIQot 'ej not jIHu'qa'bej
tar tlhutlh SoSlI'
pagh latlh vIja'laH
pIch ghaj ta'
ghaj ta'
'etlhDaq tar lanlu' jay'
vaj tar DaH rInjaj Qu'lIj
'oS jawpu' je 'urmang
HIHub juppu'wI'
DaH jIrIQchoH neH
'eH wembogh chotbogh Qo'noS pIn quvHa'
tarvam yItlhutlhchu'
tlho'qoq DaSam'a'
SoSwI' yItlha'
ruv Suqpu' ghaH
tar qeqta' ghaH
'a DaH manoDchuqQo'jaj *Hamlet*
vavwI' HoH HoHwIj je pIch Hoch vIqIl
'ej HoHlIj pIch yIqIlneS je
DuchunmoHjaj yo' qIj
SIbI' qatlha'
*Horey'So* tugh jIHegh
ta'be' Do'Ha' Qapla'
SuH lotvam bejvIpbogh ghot'e' SuH lut DawI'pu' tam 'IjwI'pu' joq ratlhchugh neH poH
va moDlaw' qoptaHvIS Sogh bergh Heghqa'
vaj tugh Saja'laHbej
'a ram
jIHegh *Horey'So*
wej bIHegh
jIHvaD yIja' 'ej batlhwIj Honchugh vay' vaj chaHvaD 'oH yItI'
Qo' vIta'Qo'
tlhIngan jIHQo'
romuluSngan vIDarup
wej lojlaw' HIqvam
Qu'vatlh batlh Daghajchugh HIvje' HInob
ghop teq
baQa' vIjonbej
wanI'mey teH luSovlu'be'mo' tugh rIQbej pongwIj batlh jIHeghDI' rIntaH
'eH qaStaHvIS poH vay''e' choparHa'chugh vaj loQ neH Dotlhvetlh Do'qu'vo' yIDach 'ej 'u'vam webDaq lutwIj naQ Daja'meH 'oy'lI'jaj tlhuHlIj jup
qatlh chuS veS QoQ
*qInSaya*vo' chegh charghbogh *vortIbraS*
tera'Duy vanmeH baH
jIHegh *Horey'So*
'ej qa'wI' DungDaq mIytaH tarvetlh HoS
tera'vo' De' vI'IjlaHbe' jIyaHmo'
'a cho'meH *vortIbraS* luwIv yejquv 'e' pIH leSSovwIj
'ej jIHeghtaHvIS cho'meH vIwIvmeH jIH jIjeS
vaj ghaHvaD ghu' ram ghu' potlh je Hoch Daja'pu'DI' 'ej chay' Hu' mutungHa'
DaH tamchoH Hoch
DaH ghor tIq quv
Qapla' joH quv
bIleSmeH DaH DuDorjaj yo' qIj Dujmey
naDev qatlh chol chuS'ugh
nuq mIgh vIlegh jay'
toH nuq mIgh Daleghqang
'ItmeH pagh yay'meH vay' Daleghqangchugh bInej vaj 'e' yImev
qaSpu' HoH'a' 'e' maq lomghomvam
va bIHemba' Hegh
molvenglIjDaq yupma' Daqeqlaw'lI'mo' joHpu'vam law' DamupmeH quqta' lotlIj
Duy wa' qaSbej Qugh'a'
DaHjaj naDev mapaSlaw' tera'vo' De' wIqengDI'
De' wIja'DI' lu'IjnIS teS
'a DaH pagh De' lutu' bIH
vaj Qu''e' ra'ta'bogh voDleH wIchavmoH 'ej Heghpu' *roSenQatlh* qaH *ghIlDeSten* je 'e' QoylaHbe'
'Ivvo' Qu' tlho' wISuq
not nujDajvo' tlho' vay' boSuqbej Duy lItlho'meH ghaH wej yaHpu'chugh je yInDaj
Hegh not 'e' ra'
'a DaH naDev Supawmo' rInDI' 'Iwna' may' qu'
tera'vo' tlhIH *qInSaya* veSmeyvo' SoH
DaH yIra' lubejlu'meH muchDaqmey jenDaq lomvam lulanlu'jaj
chay' qaS wanI'vam Hoch wej ghu'vam Sovbogh qo'vaD 'e' vIja'jaj
HeS'a' wem'a' je 'Iw je ta'mey ral Qagh yoj je HoH lunablu'be'bogh je Hegh'e' je raDpu'bogh Duj 'ong meq ngeb je 'ej qaSmo' Hoch 'oghwI'pu'chajvaD Qaw'bogh Qu''e' ta'Ha'lu'bogh je Hoch bo'IjlaH
'ej Hoch vIja'laHchu'
SIbI' DI'Ijjaj
'ej 'IjmeH chuQunghot potlh Hoch yIra'
jIDo'choH batlh DaH 'e' vIlajqang jIH jI'IQtaHvIS je
wo'vam Dun vIche'meH DIb lulIjbe'lu'bogh vIghajtaH jIH
'ej wo' vIDoQmeH DaH mura'law' 'ebwIj
tugh ghu'vam De' vIja' je
De'vetlh'e' jatlhmo' nuj potlh vaj nujmey law'qu' jIjmoH
'ach DaH SIbI' ghu' naQ vIja'choHjaj qu'taHvIS ghot yabDu'
vaj tugh qaSbe'jaj lot latlh
DaH yapbej QuSmey Qaghmey je
'eH muchDaq'a'Daq *Hamlet* quv luqengjaj loS HoD
vaj batlh SuvwI''a'vaD tIDa
joH *Hamlet* toblu'chugh vaj ta'na' mojlaw'
'ej yo' qIj 'elmeH ghaHvaD HoSqu'jaj mang QoQ veS tay je
lommey tIwoH
may'DaqDaq motlh 'Iwngengvam
baQa' naDev 'ach joch 'ej taQqu' Sengvam
baHmeH negh yIra'